КъБР-м Террор щIэпхъаджагъэхэр къэмыгъэхъунымкIэ и комиссэмрэ Оперативнэ штабымрэ я зэIущIэ Къэбэрдей-Балъкъэрым и Iэтащхьэ КIуэкIуэ Казбек иджыблагъэ Правительствэм и Унэм щригъэкIуэкIащ.
ЗэIущIэм и пэщэдзэм КIуэкIуэ Казбек егъэджэныгъэм пыщIа къэрал къулыкъущIэ-хэм пщэрылъ ящищIащ УФ-мрэ Къэбэрдей-Балъкъэрымрэ я къэрал ныпхэмрэ гимнхэмрэ ехьэлIа дауэдапщэхэр курыт щIэныгъэ щызрагъэгъуэт IуэхущIапIэхэм къыщызэрагъэпэщы-ну. Къэрал ныпхэр Iэтыным ехьэлIа япэ Iуэхугъуэхэр накъыгъэм и 1-м ирихьэлIэу къызэра-гъэпэщыну я мурадщ. ЩIыналъэм ит еджапIэхэм апхуэдэ дауэдапщэхэр иужькIи щIэх-щIэхыурэ щрагъэкIуэкIынущ. «УФ-м и Президент Путин Владимир зэрыжиIамкIэ, ныпхэмрэ гимнхэмрэ ехьэлIа Iуэхугъуэхэр екIуу къызэгъэпэщауэ, абыхэм я лъапIэныгъэм елъы- тауэ хэIэтыкIауэ егъэкIуэкIыпхъэщ», - къыхигъэщащ КъБР-м и Iэтащхьэм.
АдэкIэ транспортымрэ транспорт хуэIухуэщIэхэмрэ епха IуэхущIапIэхэр террор щIэпхъаджагъэхэм щыхъумэным теухуауэ ирагъэкIуэкI лэжьыгъэм тепсэлъыхьащ КъБР-м транспортымрэ гъуэгу хозяйствэмкIэ и министр ДыщэкI Аслъэн. Абы зэрыжиIамкIэ, уэгу гъуэгухэмрэ гъущI гъуэгухэмкIэ IуэхущIапIэхэр, автовокзалхэр, транспорт екIуэлIапIэхэр зэрыкIэлъыплъ камери 180-кIэ къызэрагъэпэщащ, ахэр псори гъуэгу хуэIухуэщIэхэр зезыгъакIуэ къулыкъущIапIэм и «ЩIыналъэ шынагъуэншэ» системэмрэ полицэм и плъыр IэнатIэмрэ епхащ.
Урысей гвардием КъБР-м щиIэ къулыкъущIапIэм и унафэщI Васильев Сергей, КъБР-м промышленностымрэ энергетикэмкIэ и министр Iэхъуэбэч Щамил, КъБР-м курортхэмрэ туризмэмкIэ и министр ЩоджэнцIыкIу Мурат сымэ гъэсыныпхъэ-энергетикэ IэнатIэр, курортхэмрэ санитар къабзагъэм кIэлъыплъ IуэхущIапIэхэмрэ, турист-зыплъыхьакIуэ IэнатIэр террор шынагъэм пэIэщIэ щIыным, абы епха щIэпхъаджагъэхэр къэмыгъэхъуным ехьэлIа я къэпсэлъэныгъэхэм едэIуа нэужь, Iэтащхьэм къалэн зыщащIыжа Iуэхугъуэхэр гъэзэщIэным нэхъ егугъуну, шынагъуэншагъэр къызэгъэпэщыным- кIэ жэуап зыхьхэм я бгъэдыхьэкIэр ягъэткIиину унафэ яхуищIащ.
КъищынэмыщIауэ, зэIущIэм щытепсэлъыхьащ накъыгъэ мазэм екIуэкIыну махуэшхуэхэмрэ пэкIухэмрэ я шынагъуэншагъэми. Гъатхэмрэ Лэжьыгъэмрэ я махуэм, Хэку зауэшхуэм ТекIуэныгъэр къызэрыщытхьрэ илъэс 77-рэ щрикъу махуэм ирихьэлIэу екIуэкIыну пэкIухэм я къызэгъэпэщыкIэ хъунум, щIэпхъаджагъэ къэмыгъэхъунымкIэ хуэунэтIауэ зэфIагъэкIынухэм я гугъу ящIащ хабзэхъумэ къулыкъущIапIэхэм я лIыкIуэхэм. КъБР-м щэнхабзэмкIэ и министр Къумахуэ Мухьэдин зэхуэсым кърихьэлIахэр щигъэгъуэзащ а махуэхэм ирихьэлIэу щIыналъэм щекIуэкIыну гуфIэгъуэ Iуэхугъуэ-хэм.
КIуэкIуэ Казбек зэIущIэм хэтхэр къыхури-джащ Полк уахътыншэм зыхуагъэхьэзырыну. «Къэбэрдей-Балъкъэрым щыщыIэ эпидемие щытыкIэм Iэмал къыдет абы ехьэлIа пэкIур къызэдгъэпэщыну, цIыхухэр зэхэдгъэхьэну. Ар Iэтауэ зэрытщIынум фегупсыс», - жиIащ Iэтащхьэм.
ЗэIущIэм и лэжьыгъэм хэтащ КъБР-м и Правительствэм и УнафэщI Мусуков Алий, КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, УФ-м и Президентым Кавказ Ищхъэрэ щIыналъэм щиIэ и лIыкIуэм егъэщIылIауэ КъБР-м щыIэ федеральнэ инспектор нэхъыщхьэ Мэкъуауэ Тимур, министерствэхэр, къулыкъущIапIэхэм, щIыналъэхэм щIыпIэ унафэр щызезыхьэ IуэхущIапIэхэм я унафэщIхэр, хабзэхъумэ IэнатIэхэм я лIыкIуэхэр.