Я нэIэ тетщ

2022 гъэм мэкъуауэгъуэм и 3-м  республикэ прокуратурэм федеральнэ хабзэр зэрагъэзащIэм кIэлъыплъынымкIэ и къудамэм и унафэщI Санаров Андрей зауэм, лэжьыгъэм, IэщэкIэ зэщIэузэда къарухэмрэ хабзэхъумэ органхэмрэ я ветеранхэм я Налшык къалэ жылагъуэ организацэм я лIыкIуэ щIыгъуу яIущIащ я щхьэ IуэхукIэ закъыхуэзыгъэза цIыхухэм.  

Ахэр нэхъ зыгъэтхьэусыхэр псэупIэм теухуа хабзэр зэрамыгъэзащIэм къишэ гугъуехьхэрщ: фэтэрыр зейм ар и щхьэм къызэрихьэм хуэдэ\у щызэрихъуэкIкIэ, газ, псы бжьамийхэм, пэш блынхэм ягъуэт зэхъуэкIыныгъэхэр унэм щIэс псом я дежкIи шынагъуэ зэрыхъур.

Санаров Андрей зыхуэза дэтхэнэми  гуригъэIуащ я тхьэусыхафэм теухуауэ прокуратурэм ищIэфынур, хабзэм къигъэувыр зыхуэдэр.

Прокуратурэм зэхигъэкIынущ Iуэхур зытетыр, икIи кIэлъыплъынущ хабзэншагъэхэр зэрагъэзэкIуэжым.