ГъэшхэкIхэм къахэхъуэнущ

Налшык гъэш комбинатыр зэман гъунэгъум иужь ихьэнущ гъэшыр къыщыIах IуэхущIапIэщIэ иухуэным. Абы Iэмал къаритынущ шэуэ зы жэщ-махуэм къыщIагъэкI тонн 350-р тонн 900-м нагъэсыну.

1998 гъэм къызэрагъэпэщауэ щыта мы IуэхущIапIэр ноби щыпашэщ Къэбэрдей-Балъкъэрым. Абы цехи 10-м щIигъу иIэщ, ди хэкуми хамэ къэралхэми къыщыщIагъэкI иджырей IэмэпсымэхэмкIэ къызэгъэпэщауэ. Нэхъыщхьэращи, лэжьыгъэ IэнатIэу 800-м щIигъу  къы­зэIуихащ.
IуэхущIапIэм цIэрыIуэ хъуауэ къыдигъэкI ерыскъыпхъэу 8-м лIэужьыгъуэ 200-м щIигъу къызэщIеубыдэ икIи ди республикэми гъунэгъу щIыналъэхэми ахэр щIэупщIэ яIэу щащэ. 
Къапщтэмэ, Налшык гъэш комбинатым къыщIигъэкI шэм, тхъуцIынэм, шатэм, йогуртым, кхъуей лIэужьыгъуэхэм, шхум Кавказ Ищхъэрэ федеральнэ округым адрыщIкIи ущрихьэлIэнущ.
Ерыскъыхэм я фIагъымрэ ахэр щэхуакIуэхэм ягу зэры­дыхьэмрэ щхьэусыгъуэ нэхъыщхьэ хуэхъур я лэжьыгъэр къызэрызэрагъэпэщым зэ­пы­мыууэ зэрыкIэлъыплъырщ, псом хуэмыдэу гъэшыр къезышалIэхэр къызэрыхах щIыкIэм гулъытэ хэха хуащI.  
- Комбинатым фIагъым кIэ­лъыплъ и къудамэм и лэ­жьакIуэхэм щIэх-щIэхыурэ гъэш фермэхэм къэпщытэныгъэхэр щрагъэкIуэкI. Ахэр кIэ­лъоплъ Iэщхэр зэраIыгъ щIы­кIэм, къызэрашым, гъэшым и фIагъым. Мардэхэм зымащIэ дыдэкIэ къытекIмэ, дадэ­лэжьэ­жыркъым, - къыхегъэщ зи гугъу тщIы къудамэм и унафэщI Ващейкин Алексей. – Гъэшыр къы­щеIытхыну пунктыщIэр къы­зэIутхмэ, къыщIэдгъэкIым и куэдагъымрэ ерыскъы лIэу­жьы­гъуэхэмрэ тхухэгъэхъуэнущ.