пхъэщхьэмыщхьэр къехьэлIэжынымкIэ пэрытхэр

Пхъэщхьэмыщхьэмрэ мэракIуэхэкIхэмрэ къехьэлIэжыным республикэм зэрыщыщIадзам теухуа тхыгъэ КъБР-м и Iэтащхьэ КIуэкIуэ Казбек телеграм-каналым щиIэ напэкIуэцIым иритхащ.

«Къэбэрдей-Балъкъэрым мэракIуащхъуэр (голубикэр) къе­хьэ­лIэжын щыщIадзащ. А къэкIыгъэр зехьэным республикэм и мэкъумэшыщIэхэм зэрыщIадзэрэ куэд дэмыкIами, ерыскъы­хэкIхэм я урысей рынокым абы щиIэ щIэупщIэм псынщIэу хохъуэ. Иджы ар Шэджэм, Аруан районхэм зыубгъуауэ щагъэкI икIи хозяйствэ зэмылIэужьыгъуэхэм хасауэ щыта гектари 125-рэ хуэдизым нэгъабэ лъандэрэ аргуэру гектар 20 къахэхъуащ», - къыхигъэщхьэхукIащ республикэм и унафэщIым.
Къэбэрдей-Балъкъэрыр пхъэщхьэмыщхьэмрэ мэракIуэхэмрэ къехьэлIэжынымкIэ иджыпсту къэралым щыпашэ щIыналъищым ящыщщ.
Мы зэманым республикэм зыубгъуауэ къыщыпачыж мамкъу­тыр, хурэджэр, санэ, шэфталыр, пхъэгулъ зэмылIэужьыгъуэхэр. Балиймрэ балийIэрысэмрэ къыпычыжыныр къэблэгъащ, мэра­кIуэIэрысэри мы гъэм бэгъуащ. Псори зэхэту мэкъумэш организацэхэм, фермерхэм, щхьэзакъуэ хьэрычэтыщIэхэм мы гъэм кърахьэлIэжа пхъэщхьэмыщхьэмрэ мэракIуэхэкIхэмрэ тонн минни 4,8-м ноблагъэ икIи ар нэгъабэ и апхуэдэ зэманым елъытауэ зыкъомкIэ нэхъыбэщ.
МэкъумэшыщIэхэм хадэхэкIхэри щIадзауэ кърахьэлIэж. Республикэм и консерв заводхэм горох щхъуантIэр, нащэр ирашалIэ, мыгувэу помидорхэри къыщIачыжу щIадзэнущ. 
Прохладнэ районым и мэкъумэш предприятэхэм бжьыхьэсэ къэкIыгъэхэр Iухыжын ирагъэжьащ. Фигу къэдгъэкIыжынщ нэ­гъабэ псори зэхэту гъавэу тонн мелуан 1,3-м нэблагъэ республикэм къызэрыщрахьэлIэжар,зэи къэмыхъуауэ, нартыху тонн мелуа­ным щIигъу къызэрыдачар. «Мы гъэми ди гъавэр бэву щытыну дыщогугъ», - къыщыгъэлъэгъуащ щIыналъэм и Iэтащхьэм и тхыгъэм.