Къэбэрдей-Балъкъэрыр къызэрызэрагъэпэщрэ илъэси 100 щрикъум ирырагъэхьэлIэу, республикэм и къалащхьэмрэ и районхэмрэ зэIузэпэщ щIыным хуэгъэзауэ къыщрахьэжьа лэжьыгъэхэр и кIэм нэблэгъащ.
«Къалэ кIуэцIхэм тыншыпIэхэр къыщызэгъэпэщын» программэр гъэзэщIа хъуным хуэгъэзауэ, республикэм зыгъэпсэхупIэрэ цIыху екIуэлIапIэу иIэхэм ящыщу 13-р къагъэщIэрэщIэж.
Налшык къалэм и гугъу тщIымэ, ар, псом япэрауэ, Къэбэрдей-Балъкъэр къэрал университетым и щIыбагъымкIэ щыIэ лъэс къэкIухьыпIэ-етIысэхыпIэрщ. КIэлъыкIуэу, «Курортнэ» зыфIащауэ Долинск щыIэ зыгъэпсэхупIэрщ, Темрыкъуэ Идар и цIэр зезыхьэ уэрамышхуэм егъэщIылIа егъэзыпIэрщ, Амщокъуэ зэкъуэшхэм я цIэр зэрихьэу Вольнэ Аул щыIэ уэрамым къыщыунэхуа щхъуантIагъэ Iэрамэшхуэм и Iэгъуэблагъэрщ, Лениным и цIэр зезыхьэ проспектымрэ Тэрчокъуэм ейр зыфIащамрэ я зэпылъыпIэм пэгъунэгъу зыгъэпсэхупIэрщ, нэгъуэщIхэри.
ИщхьэкIэ къызэрыщыхэдгъэщащи, республикэм и адрей щIыналъэхэми щыIэ зыгъэпсэхупIэхэмрэ цIыху зекIуапIэхэмрэ ящыщ зыбжанэми, зи гугъу тщIа программэм ипкъ иту, лэжьыгъэ щрагъэкIуэкI. Апхуэдэу, Прохладнэм Лениным и цIэр зезыхьэ и уэрамым лъэныкъуэкIэ пыIудза лъэс зекIуапIэмрэ а районым хыхьэ «Победэ» колхозым щыщу Хэку Зауэшхуэм хэкIуэдахэм я фэеплъу а къалэм дэтым къедза етIысэхыпIэмрэ къагъэщIэрэщIэж. КъищынэмыщIауэ, Май къалэм и сабий джэгупIэр, Тырныауз и ут нэхъыщхьэр, Дыгулыбгъуей къуажэм кIуэцIрыкIыу Бахъсэн къалэм ухуэзышэ гъуэгу нэхъыщхьэм ижь лъэныкъуэмкIэ щыIэ и Iыхьэр.
Зи гугъу тщIа псоми лъэс зекIуапIэу яIэхэм иджырей мардэхэм къитIасэ плиткэхэр щралъхьэ, сабийхэмрэ ныбжьыщIэ цIыкIухэмрэ щыджэгу, я Iэпкълъэпкъым зыщрагъэужь хъуну утыкущIэхэр къыщызэIуах, къэзыгъэнэху уэздыгъэхэр дэнэкIи щыпадзэ. Лэжьыгъэ псори шыщхьэуIум къриубыдэу зэфIагъэкIынущ.
Налшык къалэмкIэ къедгъэзэкIыжынщи, автомобиль зекIуапIэ нэхъыщхьэу иIэхэм зэгъэзэхуэжыныгъэ лэжьыгъэхэм щыпащэ.
Лениным и проспектым и лъэс зекIуапIэхэм плиткэщIэхэр тралъхьэ. АбыхэмкIэ къагъэщIэрэщIэжыну лъагъуэхэм, псори зэхэту, метр зэбгъузэнатIэу мин 45-рэ яубыдынущ. КъищынэмыщIауэ, мыбдежым «Уафэ къабзэ» программэм ипкъ иту, ток кIапсэхэр щIы щIагъкIэ щаутIыпщ, зэман гъунэгъум къриубыдэу, машинэ зекIуапIэ нэхъыщхьэм телъ асфальт «уэншэкужьри» и кIыхьагъкIэ трагъэкъэбзыкIынущ.
Кулиевым и проспектым инженер Iэмэпсымэрэ-зэпыщIапIэу щыIэхэр зэрахъуэкIащ, машинэ зекIуапIэм зыузэхуж асфальт-бетон «уэншэкущIэр» трагъэзэгъащ. А уэрам дыдэм къэзыгъэнэху уэздыгъэхэр зыпащIэну пкъохэр щагъэуващ, лъэс лъагъуэхэм плиткэщIэхэр тралъхьащ.
ЩоджэнцIыкIум и проспектри къощIэрэщIэж. Къапщтэмэ, машинэ зекIуапIэ нэхъыщхьэр зыузэхуж асфальт-бетоныр трагъэзэгъащ. Толстойм и уэрамым къыщыщIэдзауэ Захаровым ейм нэсыху гъуэгум и лъабжьэм щIэлъын хуей пшахъуэ-мывэкIэщхъ «уэншэкур» щаузэхуащ. Лъэс лъагъуэхэм плиткэ телъхьэным щыпащэ. «Уафэ къабзэ» программэм ипкъ иту щрагъэкIуэкI лэжьыгъэхэр и кIэм нагъэсащ.
Къэбэрдей уэрамым, Идар Темрыкъуэ и цIэр зезыхьэм деж къыщыщIэдзауэ къалэ дэкIыпIэм нэс дэлъ километри 4,6-м асфальтыщIэ тралъхьащ, адэкIэ щыIэ километри 3,5-м къриубыдэу гъуэгум и лъабжьэм щIэлъын хуей пшахъуэ-мывэкIэщхъ трагъэзэгъащ. Языныкъуэ щIыпIэхэм автомобиль зекIуапIэр нэхъ бгъуэ щащIащ, жыгыщIэхэр щыхасащ.