Зэгъэпэщыжыныгъэ лэжьыгъэхэм къыпащэ

«КъБР-м узыншагъэр хъумэнымкIэ и IэнатIэм цIыхухэм япэ дэIэпыкъуныгъэхэр щыхуащIэ и IуэхущIапIэхэр къэгъэщIэрэщIэжын» щIыналъэ проектым хэту зэгъэпэщыжыныгъэ лэжьыгъэхэр щокIуэкI Нарткъалэ щыIэ, ЩIыналъэхэм зэдай, узыфэ зэмылIэужьыгъуэхэр зыпкърытхэм щеIэзэ сымаджэщым и пщIантIэм дэт поликлиникэм. А Iуэхум текIуэдэну сом мелуан 7I,2-р федеральнэ бюджетым къыхэкIащ.

Мы зэманым ирихьэлIэу унащхьэр яхъуэжащ, унэщIыбыр зэрахьащ, IуэхущIапIэм и кIуэцIми лэжьыгъэ пыухыкIахэр щызэфIагъэкIащ: унэлъэгур, инженер коммуникацэхэр зыхуей хуагъэзэжащ, щхьэгъубжэхэр зэрахъуэкIащ. Унэ щIыбым епха лэжьыгъэхэр 2023 гъэм ирагъэкIуэкIыну я мурадщ. 
Поликлиникэм щекIуэкI зэгъэпэщыжыныгъэхэр хуэунэтIащ абы и лэжьыгъэр ирагъэфIэкIуэным. Апхуэдэу иджы абы иIэнущ цIыхум и тыншыпIэм тещIыхьауэ чэзум щыпэплъэ плIанэпэ щхьэхуэ, IуэхущIапIэхэм хэт пэшхэр здэщыIэр къозыгъащIэ картэхэр. ДяпэкIэ абы щылэжьэнущ махуэ стационар, гъуэлъыпIэ 30 щIэту. Апхуэдэу медицинэ профилактикэмкIэ, физиотерапиемкIэ, рентген щащI къудамэхэр зэхэгъэщхьэхукIауэ – щIыхьэпIэ зырыз яIэу щытынущ.
Япэ медико-санитар дэIэпыкъуныгъэхэр къыщыпхуащIэ къудамэхэр унэ щхьэхуэу щытынущ, сыт и лъэныкъуэкIи тыншыпIэ псоми хуэщIауэ. КъищынэмыщIауэ, жэщми махуэми лажьэ, пIащIэгъуэкIэ медицинэ Iуэхутхьэбзэхэр зэфIэзыгъэкI IэнатIэр гъунэгъу корпусым щыIэнущ, абы и фIыгъэкIэ цIыхур зыхуэныкъуэ дэIэпыкъуныгъэр и чэзум къыIэрыхьэнымкIэ лэжьыгъэр нэхъ псынщIэу зэтеубла хъунущ.
IуэхущIапIэм щрагъэкIуэкI зэгъэпэщыжыныгъэ лэжьыгъэхэр 2023 и япэ мазищым къриубыдэу зэфIагъэкIыну мэгугъэ.