Зызыгъэпсэху сабийхэм я хьэщIащ

КъБР-м щыIэ МВД-м и лэжьакIуэхэр, Сабийм и хуитыныгъэхэмкIэ уполномоченнэу КъБР-м щыIэмрэ республикэм Егъэджэныгъэмрэ щIэныгъэмкIэ и министерствэм и щIалэгъуалэ центрымрэ я лIыкIуэхэр ящIыгъуу, щыIащ узыншагъэр щрагъэфIакIуэ «Атажукино» комплексым щылажьэ «Лидер» сменэм. ХьэщIэхэм абы зыщызыгъэпсэху сабийхэм профилактикэ Iуэху щхьэпэ драгъэкIуэкIащ. 

Урысей МВД-м и «Баксанский» къудамэм балигъ мыхъуахэм я IуэхухэмкIэ и инспектор, полицэм и лейтенант нэхъыжь Хьэтэжьыкъуэ Мурат ныбжьыщIэхэм ягуригъэIуащ законодательствэм къигъэувхэр икIи ягу къигъэкIыжащ дэтхэнэри хабзэм тетын зэрыхуейр. Сабийхэм чэнджэщ яритащ нэхъ жыджэру, къарууфIэу щытын папщIэ запсыхьыну, я узыншагъэр ирагъэфIэкIуауэ гъэ еджэгъуэщIэм щIадзэжыну.
АдэкIэ сабийхэм захуигъэзащ лъэныкъуэ куэд къызэщIэзыубыдэ щIалэгъуалэ центрым и лIыкIуэ Къарэ Ратмир. Абы ахэр щыгъуазэ ищIащ наркотикхэкIхэр зэхьэлIэным пхуэмыгъэзэкIуэж щытыкIэм узэрыригъэувэм, фадэм, тутынымрэ жыджэр уищI хуэдэу къалъытэу ираф псыхэкIхэмрэ къашэ зэраныгъэм. Ратмир апхуэдэуи щIалэгъуалэр хуиущиящ гъащIэм и лъапIэныгъэхэм – цIыхум и унагъуэмрэ узыншагъэмрэ - хъумэным. 
Сабийм и хуитыныгъэхэмкIэ уполномоченнэу КъБР-м щыIэм и дэIэпыкъуэгъу Манияевэ Ламие тригъэщIащ сабийхэм я нэгу зэрызрагъэужьым. Ар щIэупщIащ ныбжьыщIэ цIыкIухэр дэзыхьэххэм, еджэныгъэм къыщыдэхуэм деж я зэманыр зэрагъакIуэм. Ламие зэрыжиIамкIэ, Къэбэрдей-Балъкъэрым щыIэщ балигъ мыхъуахэр кружок зэхуэмыдэхэм, спорт секцэхэм хэшэнымкIэ зыхуеину псори, апхуэдэуи щIалэгъуалэ IуэхущIапIэхэмрэ жылагъуэ зэщIэхъееныгъэхэмрэ, абы хэкупсагъэм хуэгъэсэным хуэунэтIари хыхьэу. 
НыбжьыщIэхэр хьэщIэхэм жаIахэм едэIуащ, упщIэхэр иратащ икIи жэуап зэпкърыха ягъуэтащ. 
Сабийм и хуитыныгъэхэмкIэ уполномоченнэу КъБР-м щыIэм егъэщIылIауэ лажьэ сабий жылагъуэ советым и лIыкIуэхэм цIыкIухэм драгъэкIуэкIащ жьакIуэу псэлъэным ухуэзыгъасэ гъуазджэмкIэ, актёр IэзагъэмкIэ тренингхэр икIи я зэфIэкIым зэрыхагъэхъуэфыну Iэмалхэм яхутепсэлъыхьащ.
 НыбжьыщIэхэм ягъэлъэгъуащ я творческэ зэфIэкIыр, илъэсий хъу Кувэжыкъуэ Самирэ усэ къеджащ. АдэкIэ Iуэхум и къызэгъэпэщакIуэхэм сабийхэм папщIэ къафэ флеш-моб зэхаублащ. 
ЗэIущIэм и кIэухыу «Атажукино» комплексым и унафэщIым и къуэдзэ Гъуо Симэ Iуэхур къызэгъэпэщыным жыджэру зэрыхэтам папщIэ фIыщIэ тхылъ яритащ КъБР-м щыIэ МВД-м балигъ мыхъуахэм я IуэхухэмкIэ и инспекторхэм.