«Архъыз», «Iуащхьэмахуэ», «Ведучи» зыгъэпсэхупIэхэм я лэжьакIуэхэри хэтащ Къэбэрдей-Балъкъэр Республикэм къэралыгъуэ зэригъуэтрэ илъэси 100 зэрырикъум и щIыхькIэ Iуащхьэмахуэ дэкIуея гупышхуэм.
Кавказ. РФ командэр къэралым щынэхъ лъагэ дыдэ бгым дэкIуейри, КъБР-мрэ зыгъэпсэхупIэхэмрэ я ныпхэр щыгум щагъэхуэрзащ. Апхуэдэ щIыкIэкIэ Iуащхьэмахуэ и хъуреягъым альпинист, турист, спорт лIэужьыгъуэ куэдкIэ зыщыбгъэпсэху зэрыхъур дуней псом ягу къагъэкIыжащ.
А Iуэхур «Эльбрусиада»-м гъэ къэс къызэригъэпэщ зекIуэхэм ящыщ зыщ. Ауэ мы гъэм Iуащхьэмахуэ дэкIуеяхэм я бжыгъэр куэд хъурт. ЩыгуитIми зэхэту цIыхуи 100 хуэдиз дэкIащ, абыхэм яхэтт Урысейм и хэгъэгу 20-м къикIахэр. Гупым хэтхэм ящыщу зыри гугъуехьым къригъэкIуэтакъым, дунейм и щытыкIэр япэ махуэм зэран къахуэхъуами, трагъэзэжри, дэкIащ.
«Кавказ.РФ гупым къухьэпIэ лъэныкъуэмкIэ зыщаIэтащ икIи метр 5642-м нэсащ. ДэкIуеину щытраухуа махуэм дунейр къызэIыхьэри, метр 5200-м нэсауэ къагъэзэжын хуей хъуащ. Абы къыкIэлъыкIуэу яIа махуэращ щыгум щыдэкIыфар, абы щыгъуи уэфIу щымытами. ЖэщитI-махуитIкIэ жеякъым щIалэхэр, ауэ я мурадым лъэIэсащ. Абыхэм къагурыIуэрт мы дэкIыгъуэм мыхьэнэшхуэ зэриIэр икIи къимыкIуэту зыхуагъэувыжа къалэным зэрыпэлъэщам дэтхэнэ зыми пщIэшхуэ хууегъэщI», - жеIэ Кавказ.РФ-м и генеральнэ унафэщI ТIымыжь Хьэсэн.
«Эльбрусиада-2022»-м хэтахэр мызыгъуэгум ткIийуэ къыхахат. Мыхьэнэшхуэ зиIэ Iуэху зэфIагъэкIыну ежьэнухэр сыт и лъэныкъуэкIи хуэхьэзырын хуейт зекIуэ мытыншым, апхуэдэуи бгым дэкIуеиным и пIалъэ ящIэу щытыпхъэт. А псомкIи зэхуеплъу къыхаха нэужь, Iуащхьэмахуэ лъапэ къалэнхэм щыхуагъэсащ, итIанэ инструкторхэр я гъусэу гъуэгу техьащ.
Насып Iуащхьэм и щыгум нэса дэтхэнэ зыми «Iуащхьэмахуэ зэрыдэкIуеям папщIэ» бжыгъэ дамыгъэхэр къратащ. КъищынэмыщIауэ, республикэм и юбилейм ирихьэлIэу абы дэкIуеяхэм я цIэхэр зытет пхъэбгъу ягъэхьэзырыну я мурадщ къызэгъэпэщакIуэхэм. Гупым хэтахэр къыщехыжам яфIэфIу хэлэжьыхьащ «Бгы къабзэхэр» акцэм икIи Iуащхьэмахуэ и Iэхэлъахэр зэщIакъуащ.
«Эльбрусиада-2022»-р къызэзыгъэпэщар Урысейм АльпинизмэмкIэ и федерацэрщ, зи жэрдэмыр КъБР-м Туризмэмрэ курортымкIэ и министерствэрщ. Абыхэм щIэгъэкъуэн яхуэхъуащ Къэбэрдей-Балъкъэрым и Iэтащхьэмрэ Правительствэмрэ.