Дэ дыщопсэу илъэсищэ гъуэгуанэ къызэзынэкIа, гъащIэм декIуу зызыужь, лъэпкъ куэд зэгурыIуэрэ-зэдэIуэжу щызэхэс хэку телъыджэ. Къэбэрдей-Балъкъэр Республикэм нобэ иIэ ехъулIэныгъэхэр щынэрылъагъущ цIыхухэм я псэукIэр зэрефIакIуэм, ахэр псэун щхьэкIэ зыхуей Iэмал псори хэгъэгум къызэрыщызэгъэпэщам, нэхъыжьхэмрэ нэхъыщIэхэмрэ я зэхуаку пщIэ дэлъу, зи къару илъыгъуэр лажьэу, щIалэгъуалэр еджэу, сабийхэр гъащIэм щыгуфIыкIыу зэрыпсэум.
Набдзэгубдзаплъэу, жэуаплыныгъэ ин яхэлъу зи къулыкъум пэрыт ди унафэщIхэм псом япэ ирагъэщ цIыхубэм я псэукIэр зэIузэпэщ щIыныр, жылагъуэ-политикэ зэпIэзэрытыныгъэр, жылагъуэ зэкъуэтыныгъэр, лъэпкъ зэныбжьэгъугъэр, властымрэ жылагъуэмрэ я зэгурыIуэныгъэр.
Уи щIэныгъэм хэбгъэхъуэнуми, уи узыншагъэр ебгъэфIэкIуэнуми, удэзыхьэх Iуэхум зыхуэбгъэсэнуми, уи нэгу зебгъэужьынуми республикэм уимыкIыу псори къызэбгъэпэщыфынущ. IэнатIэ псори гъэ къэс ефIакIуэ зэпытщ. Иужьрей илъэсхэм къэралым, республикэм щызэтеубла хъуа ухуэкIэр нэрылъагъуу сэбэп мэхъу псэукIэмрэ зэпIэзэрытыныгъэмрэ зэтеIыгъэнымкIэ, егъэфIэкIуэнымкIэ. Псалъэм папщIэ, дызэрыт илъэсым республикэр хэтщ лъэпкъ проект 11-мкIэ ягъэзащIэ щIыналъэ проекту 45-м. А Iуэхухэм трагъэкIуэдэнущ сом мелард 11,7-м щIигъу. Республикэм и хэхъуэм къыхалъхьэну инвестицэр сом мелард 56,3-рэ мэхъу. 2022 гъэм щIыналъэм щекIуэкIыну ухуэныгъэхэм сом мелард 38,3-рэ хухахынущ.
Республикэм бгъэдэлъ хъугъуэфIыгъуэхэм ящыщщ адыгэхэм, балъкъэрхэм, урысхэм нэмыщI лъэпкъи 100-м нэс зэныбжьэгъуфIу, зэгъунэгъуфIу къызэрызэдэгъуэгурыкIуэр. Дэтхэнэ зыми пщIэшхуэ хуещI дин зэмылIэужьыгъуэ зезыхьэ цIыхухэм яку дзыхьрэ пщIэрэ зэрыдэлъым. А псом я лъабжьэр жыжьэ къыщожьэ икIи тхыдэ къулей зиIэ лъахэр экономикэ, социальнэ, щIэныгъэ, щэнхабзэ зыужьыныгъэм сыт щыгъуи быдэу тетащ. Аращ Хэкум и къэрал саугъэтхэр плIэнейрэ къыщIыхуагъэфэщари.
Бжыгъэхэмрэ IуэхущIафэхэмрэ, псэукIэмрэ Iуэхутхьэбзэхэмрэ, IэнатIэхэмрэ лэжьыгъэмрэ къызэгъэпэща зэрыхъум укIэлъыплъмэ, нэры- лъагъущ ди лъахэм щекIуэкI зэхъуэкIыныгъэфIхэр.
ЗэрыжытIащи, псэукIэр езыгъэфIакIуэхэм ящыщщ лъэпкъ проектхэмрэ федеральнэ программэхэмрэ. Псалъэм къыдэкIуэу жыпIэмэ, ахэр гъэзэщIэным нэгъабэ сом меларди 8,6-рэ хухахащ. ЩIыналъэ мыхьэнэ зиIэ проектхэм хиубыдэу лэжьыгъэшхуэ зэфIагъэкIащ социальнэ IуэхущIапIэхэр ухуэнымкIэ, ахэр къэгъэщIэрэщIэжынымкIэ, капитальнэу зэгъэпэщыжынымкIэ, апхуэдэу жылагъуэхэр зэIузэпэщ щIынымкIэ.
Зэрыщыту къапщтэмэ, IуэхущIапIэу 500 хуэдиз яухуащ е зэрагъэпэщыжащ икIи абыхэм сом меларди 4,2-рэ трагъэкIуэдащ.