Бзылъхугъэм и пщIэр къэзыIэт

2022 гъэм щегъэжьауэ Урысейм «Анэ-лIыхъужь» цIэ лъапIэр бзылъхугъэхэм щрату щIадзэжынущ. Абы теухуа унафэр къэралым и Президентым къыдигъэкIащ. 

УФ-м и Правительствэм и УнафэщI Мишустин Михаил Iэ тридзащ «Анэ-лIыхъужь» зыфIащхэм, «Адэ-анэм и щIыхь» орденыр зыхуагъэфэщахэм ахъшэкIэ зэрызыщIагъэкъуэну щIыкIэр къыщыгъэлъэгъуа унафэм.
УФ-м и Правительствэм и сайтым къыщыхьа дэфтэрым зэритымкIэ, иджы «Анэ-лIыхъужь» цIэр зыхуагъэфэщахэм сом зы мелуан иратынущ. КъищынэмыщIауэ, «Адэ-анэм я щIыхь» орденыр зыхуагъэфэщахэр зэрагъэгушхуэ сом ­мини 100-р сом мин 500-м нэсу хагъэхъуэнущ, а орденым и медалыр зратхэр сом мин 200-кIэ ягъэгушхуэну я мурадщ.
«Анэ-лIыхъужь» цIэ лъапIэр зыхуагъэфащэр сабиипщI е нэхъыбэ зыпIахэрщ. А цIэр къэрал дамыгъэ нэхъ лъагэхэм пащI, псалъэм папщIэ, «Урысей Федерацэм и ЛIыхъужь», «Урысей Федерацэм ЛэжьыгъэмкIэ и ЛIыхъужь» цIэхэм. 
«Адэ-анэм я щIыхь» орденыр ират сабиибл е нэхъыбэ зыпIахэм, а орденым и медалыр - сабииплIрэ нэхъыбэрэ къэзыIэтхэм.
Мы зэманым Урысейм и Правительствэр и ужь ихьащ 2022 гъэм цIэ лъапIэхэр зыхуагъэфэщахэм хухахыну ахъшэр гъэтIылъыгъэ фондым къызэрыхагъэкIынум теухуа унафэр гъэхьэзырыным. АдэкIэ федеральнэ бюджетыр щызэхагъэувэкIэ мы Iуэхум текIуэдэнур къыщалъытэнущ.