Къэбэрдей-Балъкъэр Республикэм и Iэтащхьэ КIуэкIуэ Казбек хэтащ Гундэлэн къуажэм дэт, Доттуев Ахъмэт и цIэр зезыхьэ курыт еджапIэ №1-м гъэ еджэгъуэщIэм ирихьэлIэу къыщызэрагъэпэща гуфIэгъуэ зэIущIэм.
КIуэкIуэ Казбек еджапIэм къыщызэхуэса сабийхэм, абыхэм я адэ-анэхэм, егъэджакIуэхэмрэ гъэсакIуэхэмрэ Къэбэрдей-Балъкъэрым и къэралыгъуэр илъэси 100 зэрырикъумрэ ЩIэныгъэм и махуэмкIэ ехъуэхъуащ, гъэ еджэгъуэщIэр къадэхъуну, ехъулIэныгъэфIхэр яIэу ар кърахьэлIэну зэригуапэр къыхигъэщащ. «Мы къуажэр адрей жылэхэм сыт щыгъуи нэхъ хызолъагъукI, мыбы пщIэрэ хьэтыррэ зиIэ цIыху гъэщIэгъуэнхэр щопсэу. Ар ауэ сытми жысIэркъым - мы къуажэм щыщу зы унагъуэкъым сцIыхур, зы лъэпкъкъым си нэIуасэр. Фи жылэр ефIэкIуэну, мамырыгъэрэ зэгурыIуэрэ дэлъыну си гуапэщ», - жиIащ КIуэкIуэ Казбек.
Апхуэдэу КъБР-м и Iэтащхьэм къызэхуэсахэм лъэпкъ зэгурыIуэныгъэм и мыхьэнэми и гугъу яхуищIащ. «Илъэсищэ хуэдизкIэ узэIэбэкIыжмэ, ди нэхъыжьхэр зэдэпсэуну, зэгъунэгъуну, зэгъусэну унафэ къызэдащтауэ щытыгъащ. Фэрэ дэрэ дрищыхьэтщ абы щыгъуэ ящIа унафэм нобэми пщIэ зэриIэм, къыхаха гъуэгури пэжу зэрыщытым. Адыгэхэмрэ балъкъэрхэмрэ дызэрызэкъуэувам ди щэнхабзэмрэ ди бзэмрэ тхъумэну, ди жылагъуэ зэхэтыкIэм зедгъэужьыну, ди экономикэ псэукIэм зедгъэIэтыну Iэмал къыдитащ. Сэ зымащIэкIи шэч къытесхьэркъым илъэ-си 100 ипэкIэ ди нэхъыжьхэм къащта унафэр зэрымыкъутэнум, дызэрызэбгъэдэс илъэсищэ бжыгъэхэм къытхалъхьа зэкъуэш зэхущытыкIэхэр къызэрымытIэсхъэнум. Къэралыгъуэ диIэ зэрыхъуам и фIыгъэкIэ ди лъэпкъыщхьэр дохъумэ, дяпэкIи абыхэм зэрызедгъэужьынум дыхущIэкъунущ», - жиIащ КIуэкIуэм.
Апхуэдэу еджапIэр зэрызэрагъэпэщыжар УФ-м и Президент Путин Владимир къыхилъхьа унафэхэм къызэрыхэкIар КIуэкIуэм и псалъэмакъым къыщыхигъэщащ. «ЕджапIэхэр зэгъэпэщыжыным, зыхуей хуэгъэзэным ехьэлIауэ лажьэ къэрал программэхэм Iэмал къыдат ди сабийхэр зыщIэс, кхъахэ хъуа унэхэр къэдгъэщIэрэщIэжынымкIэ. Сабий мин 20 здэкIуэ апхуэдэ еджапIэхэм ящыщу Iуащхьэмахуэ щIыналъэм щыIэхэм 2024 гъэ пщIондэ ухуэныгъэ лэжьыгъэхэр щедгъэкIуэкIыну икIи ахэр зэфIэдгъэкIыну ди гугъэщ. Программэм ипкъ иткIэ Терскол къуажэм еджапIэщIи щыдухуэну Iэмал диIэ хъуащ. Егъэджэныгъэр ирагъэфIэкIуэну къыхалъ-хьэ сыт хуэдэ жэрдэмри дэтIыгъынущ», - ядэгуэшащ Iэтащхьэр и гупсысэхэмкIэ гуфIэгъуэ зэIущIэм кърихьэлIахэм.
ЩIыналъэм и Iэтащхьэм сабий 300-м щIигъу зыщIэс еджапIэр къиплъыхьащ. НобэкIэ ар зыхуей зэрыхуэзам шэч хэлъыжкъым: еджапIэм и щхьэр, бжэхэмрэ щхьэгъубжэхэмрэ зэрахъуэкIащ, пэшхэм я лъэгу щар кърахри, щIэ ирадзыжащ, уэздыгъэ зэрыкIуэ кIапсэ-хэр, бжьамийхэр щIэуэ щIашэжащ, унэ кIуэцI блынхэр зэрахьащ, техникэщIэхэр щIагъэуващ. Апхуэдэу еджапIэм и хъуреягъкIэ жыгхэр щыхасащ, уэздыгъэ пкъохэмрэ тетIысхьэпIэхэмрэ щагъэуващ, еджапIэ пщIантIэм къыдыхьэмрэ дэкIыжымрэ зэрыкIэлъыплъыну Iэмэпсымэхэри трагъэуващ.
