Уимытхыгъэ умыгъей

Питкярантэ къалэм щыщ Корепанов Максим цIэ лей кIэрыпщIащ: «Интернет-дыгъуэгъуакIуэ». ЩIалэм ар и жагъуищэ хъууэ суд пащхьэм ихьа щхьэкIэ, хеящIэхэми и хьэтыр къалъэгъуакъым. Абдеж дыдэм къыщыщIагъэщащ Максим и напэр зэрытекIамкIэ езым и нэпсеягъэм фIэкIа зыри зэрымыкъуаншэр.

Сыт интернетым къыщыпхуэдыгъунур? Ар узыхущIэкъум елъытащ. Псалъэм папщIэ, редактор зыфIумыщыжу мыхъунумэ, - журналистхэм я тхыгъэхэр. Бэзэрым тетым и хьэпшыпхэр нэрэ IэкIэ ихъумэмэ, корреспондентым и лэжьыгъэр зыхъумэр абы и лъабжьэм щIэт и цIэрщ. «Карельские вести» зыфIища электрон газет къызэIуихыу, абы редактор нэхъыщхьэу теувэжа Корепановым а «IункIыбзэм» IункIыбзэIух тынш къыхуигъуэтащ. Тхыгъэм и лъабжьэм щIэт цIэ-унэцIэр щIыбох, ар уи интернет-хэщIапIэм уогъэIэпхъуэри, лIыгъэ уиIэмэ, и кIапэр къэгъуэтыж. IуагъэкIынкIэ шынэ журналистхэр, хьэндырабгъуэхэм хуэдэу, псэ махэщ. Хэт мышынэу утыку къихьэу къодэуэфынур? Апхуэдэ щIыкIэу, Карелие республикэм къыщыдэкI газет зыбжанэм къытехуа тхыгъэу и нэ къыфIэнэхэм журналистхэм я цIэхэр щIихым, езым и электрон газетым игъэIэпхъуэурэ, Корепановым редакторыну зэрыхуэфащэр и фIэщ хъужыпащ.

Республикэм щылажьэ корреспондентхэр зыкъомрэ тэмакъкIыхьу кIэлъыплъащ Корепановым «и творчествэм». ИщIэр зэрымыхъунур жезыIаи къахэкIащ. Ауэ зи тэмакъыр къыщитхъыпар тхыгъэ жьэражьэ утыку къизыхьа, «Карелия.Ньюс» газетым и редактор нэхъыщхьэ Белянчиков Евгенийщ. «ПцIы упсыкIэ гуэрым и хъыбар» тхыгъэм журналистым редактор мыхъумыщIэр къыщыщIигъэщащ. ЕхьэкI-къехьэкI хэмылъу, Белянчиковыр тепсэлъыхьащ Корепановымрэ абы и дарэгъухэмрэ я напэр къемыныкъуэкъуу журналистхэм я тхыгъэхэр зэрадыгъум.

«Корепановым мыукIытэжу пщIэшхуэ зиIэ сайтхэм я лэжьыгъэхэр къафIедыгъури, ар езым ей хуэдэу утыку кърехьэ. Абы къигъапцIэр щIэджыкIакIуэхэм я закъуэкъым, атIэ зи Iэр дэни нэс Роскомнадзорым деж нэгъунэ «Карельские вести» зыфIища и хъыбарегъащIэ хэщIапIэр хабзэкIэ щыпхигъэкIащ», - щыжиIэрт Белянчиковым и тхыгъэм.

Напэр е уиIэщ, е уиIэкъым. УкIытэу зиукIыжа фи гугъэнщ Корепановым? Хьэуэ! Ахъшэм и кIуапIэм фIэкIа зыри къызыфIэмыIуэхуж «редактор дыгъуэгъуакIуэм» зи тхыгъэхэм хэпсэукI Белянчиковыр судым иритащ… «и цIэр зэригъэулъиям, и IэщIагъэм хуэмыфащэу зэригъэIуам, и напэр зэрытрихам» щхьэкIэ сом мин 400 къритыжын хуейуэ пиубыду. Корепановыр зэрегупсысымкIэ, зыри щымытхьэусыхэкIэ, абы тхыгъэхэр къидыгъуауэ жыпIэ хъунукъым. Белянчиковым пцIы къытрилъхьауэ аращи, зэригъэпудам къыхэкIыу, хуигъэлъэгъуа ахъшэр кърыретыж.

Пэжыр кIуэдыжыпатэкъыми, судым и зэхуэсым Карелием къыщыдэкI газетхэм я редактор нэхъыщхьэхэр ирагъэблагъэри, дэтхэнэ зыми псалъэ иратащ. Ахэри щыхьэту къэуващ я тхыгъэхэр зэрадыгъумкIэ. Псалъэм папщIэ, «Петрозаводск говорит» порталым и редактор нэхъыщхьэ Тихонов Максим, «ЦIыхубэ гъащIэ», «КъэхъукъащIэхэр» фIэщыгъэм щIэту къытридзэ лэжьыгъэ псори зэрыщыт дыдэм хуэдэу, сурэтхэри я гъусэу, Корепановым и «Карельские вести»-м зэрыIэпхъуэм и щыхьэту къэуващ.

Тихоновым зэрыжиIэмкIэ, ар арэзы къищIыркъым езым и нэIэ щIэт журналистхэм я къару, зэман, гукъыдэж, редакцэм и мылъку зытрагъэкIуадэ IэдакъэщIэкIхэм апхуэдэу къазэрыщыщIым. И унафэщIым жиIам щыхьэт техъуащ «Петрозаводск говорит» сайтым и лэжьакIуэ Чентемиров Георгий.

Тхьэусыхахэм къахэуващ Карелием къыщыдэкI «Московский комсомолец» газетри. Абы и редактор нэхъыщхьэ Берштейн Максим мыщхьэхыу ибжащ Корепановым тхыгъэ мин 90-м нэс я сайтым зэрыридыгъукIар, апхуэдэ хуитыныгъэ зыми иримытауэ.

Корепановыр щахуэмыгъэукIытэм, къаугъэр къэзыгъэхъея, «Карелия. Ньюс» газетым и редактор нэхъыщхьэ Белянчиковым къызыкъуихащ ар къэзыумыс псалъэмакъ телефоным иригъэтхауэ. Абы редактор-дыгъуэгъуакIуэм щыжеIэ лэжьакIуэ зэримыIэм къыхэкIыу, адрей сайтхэм тхыгъэхэр къизыдыгъукIыф робот зэрызэригъэпэщар. НэгъуэщIу жыпIэмэ, пцIыупсым езым зыкъыщIигъэщыжащ.

Судым хуэтхьэусыхар лей зытехьа журналистхэрамэ, пэжыр къыщIэмыщынкIи хъунт. Ауэ захуагъэм щIэбэныр имытхыгъэ зэрызрихьэлIэм нэмыщIыж, и «дыгъуэгъуакIуэ напэр» зэрытрахам щхьэкIэ иджыри мылъку зыIэрызыгъэхьэну мурад зыщIа Корепановырт. Белянчиковым и уэчылыр Iуэхум губзыгъэу хэлэжьыхьри, судым тхьэусыхафэр IуигъэкIуэтащ. Уэчылым щыхьэту къигъэуващ Корепановым езым и сайтым игъэIэпхъуа тхыгъэхэр зытхахэм я цIэхэр псори зэрыкIэригъэкIыжар.

«Мы суд Iуэхум щызэныкъуэкъухэр зыр адрейм и пIэ диувэн хуей къыщIэкIынт, - щыжиIащ судым лIыгъэр зи бащэ Белянчиков Евгений. - Сэрэ си лэжьэгъухэмрэтэкъым заухеижу утыку итын хуейр, атIэ мыбдежым къыщызэхуэса журналистхэм я лэжьыгъэр напэншэу къызэрыдигъуар зыщIэж Корепановырт».

Езы Корепанов Максим суд зэIущIэр екIуэкIыху зэм и напэм епхъуэу, зэм и Iэгухэр зэтригъауэу щысащ, пцIы къызэрытралъхьэм къигъэуIэбжьа хуэдэ. ХеящIэ Iуэхур щекIуэкIа Петрозаводск судым журналистхэм я лъэныкъуэр къищта щхьэкIэ, Корепановым зыгуэр иригъэпшынауэ аракъым, абы пцIы зытрилъхьа Белянчиковыр химыгъэзыхьауэ аркъудейщ.