Къызэрагъэуам шэч хэлъкъым

Мы зэманым дуней псом щытопсэлъыхь газ бжьамийхэр Балт тенджызым къызэрыщагъэуам. Ар апхуэдэу зэрыщытым шэч къытезыхьэр мащIэщ. Ауэ хэт зи Iэужьыр? А упщIэм ират жэуапхэр зэщхьэщокI. Дауи, ди жагъуэгъухэм къэхъуамкIэ занщIэу ягъэкъуэншащ Урысейр - арыншамэ емыкIу хъунт: дэ десэжащ ди къэралым псори къызэрытралъхьэм. Пэжу, ар псом япэу зыгъэвар Польшэм и закъуэщ, адрейхэм а Iуэхум зыдрагъэхьэхакъым. Уегупсысмэ, ар акъылми къитIасэркъым, гугъу дехьу яукъуэдия бжьамийхэр икъутэным УФ-м и фейдэ гуэри хэлъкъыми. Ауэ ахэр зи нэхэм бжэгъуу къыщIэуэхэр щыIэщ. Псалъэм и хьэтыркIэ США-р. Абы зэи хузэфIэкI къигъэнакъым Европэр урысей гъэсыныпхъэм пигъэкIын папщIэ: езым и газ ткIуаткIуэр континентым лъапIэу ирищэну хуейщ. Ауэ арыншами, Европэм Урысейм деж щищэху газыр зыкIи зэран къыхуэмыхъуу ар абы ирищэфынущ. ЗэрыгурыIуэгъуэщи, Украинэри къащыгъупщакъым. АрщхьэкIэ а щIэпхъаджагъэр зэрызэхищIыхьын къару абы мы зэманым бгъэдэлъкъым.

 АтIэ, къэхъуар езы бжьамийхэм яIа дертым и Iэужьу пIэрэ? Абыи шэч къытехьэгъуейщ. Япэ «Ищхъэрэ унэтIыныгъэр» 2011 гъэм лажьэу яутIыпщащи, иджыри къэс зы тIасхъапIи гу лъатакъым. ИлъэсипщI дэкIа иужь яукъуэдия «Ищхъэрэ унэтIыныгъэ-2»-м гъэсыныпхъэ итыхэкъым, езы бжьамийхэри километри I00 хуэдизкIэ зэпыIухащи, зэуэ щIыпIищым къызэрыпхыщыриудам къыбжеIэ ар къэхъукъащIэ гуэру зэрыщымытыр.

 Аращи, къэхъуар политикэ щхьэусыгъуэхэм къыхэкIауэ къалъытэ политик куэдым.

Абыхэм ягу къагъэкIыж мы гъэм и мазаем, Урысейм Украинэм зауэ Iуэху щхьэхуэ щригъэжьа иужькIэ, «Ищхъэрэ унэтIыныгъэ-2»-р лажьэу яутIыпщыным, Германиери яхэту, европей къэралхэр къыпыкIауэ зэрыщытар. Хэбгъэзыхьмэ, и гугъу ящIыжыххэртэкъым. АрщхьэкIэ епэсэуауэ къыщIэкIащ США-м я текъузэныгъэкIэ. ЩIымахуэр къоблагъэ, ауэ я газ игъэхъуапIэхэр зэрыгъэнщIар ярытын хуейм я процент 87-кIэщ. Зэрахурикъунури щIышылэр къэсыхукIэщ. АдэкIэ-щэ? Вашингтон сыт щыгъуи тегузэвыхьу къекIуэкIащ я экономикр къызэтранэн мурадкIэ езым и жыIэм щIэт къэралхэм Урысеймрэ Украинэмрэ хуаIэ политикэм зрагъэхъуэжынкIэ зэрыхъунум. Венгрием и Iуэху бгъэдыхьэкIэм дэ дыщыгъуазэщ. Ауэ абы нэхърэ нэхъ лъэщыжщ «Евросоюзым и локомотив» Германиер. ЩIымахуэм а политикэм текIынкIэ зыхуаIуа щыIэкъым. Иджыблагъэ Берлин, Париж, Прагэ къалэхэм, нэгъуэщIхэм цIыху минипщIхэр зыхэта пэкIухэр щекIуэкIащ. Къызэхуэсахэм къагъэуващ «Ищхъэрэ унэтIыныгъэ-2»-р къызэIуахыну икIи жаIащ ар ямыщIэмэ, дяпэкIи уэрамхэм къызэрыдыхьэнур. Иджы, дауи, Вашингтон хуейт Европмрэ Урысеймрэ зэпызыщIэ псори лъэныкъуэ иригъэзыну…

 Абы щыгъуэми, экономикэм и лъэныкъуэкIэ мыр хэщIыныгъэшхуэкъым: Урысейм континентым хуиутIыпщ газым и нэхъыбэр Тыркумрэ УкраинэмрэкIэ пхырокI. Къэхъуам а гъэсыныпхъэм и уасэхэр аргуэру дригъэкIуеижынкIэ шынагъуэщ. Ауэ абы и зэран аргуэру зэкIынур США-м и унафэм щIэт Европэу мыгъуэр зи мыгъуарщ.