Бдзэжьейр куэдым и сэбэпщ

- Сыт хуэдэ бдзэжьей лIэужьыгъуэр нэхъыфI? Лымрэ бдзэжьеймрэ дэтхэнэр нэхъ сэбэп?.. апхуэдэ упщIэхэм махуэ къэс дрохьэлIэ. Бдзэжьейр Iэмал имыIэу щIэх-щIэхыурэ шхын хуейщ. Ди тыкуэнхэм щыкуэдщ абы къыхэщIыкIа ерыскъыгъуэ зэмылIэужьыгъуэхэр: бдзэжьей гъэгъуа, шыуа, гъэщта, хугу, консервхэр.

ЦIыхумкIэ бдзэжьейм сэбэпынагъыу хэлъым тхутепсэлъыхьыну зызыхуэдгъэза «Кавказ Ищхъэрэ МВЛ» ФГБУ-м и щIыналъэ IуэхущIапIэм ветеринар къэпщытэныгъэхэмкIэ и къудамэм и лэжьакIуэ Анимыкъуэ Сэтэней къызэрыджиIамкIэ, бдзэжьей дагъэм къыдэкIуэу, абы хэлъщ омегэ 3,6 пкъыгъуэхэр, витаминхэр (А, В, Д, Е). Къапщтэмэ, лым нэхърэ белок нэхъыбэ хэлъщ бдзэжьейм. ЗэрыфщIэщи, аминокислота сэбэпхэр (метионин) къызыхэтхыжыр а белок дыдэрщ.

Бдзэжьейм магний, кальций, фосфор, железэ, натрий, гъуаплъэ, уеблэмэдыщэ мащIи хэлъщ. Бдзэжьей нэхъ пшэрхэм я дагъэр процент 30-м нос. Абы къыхэкIыу, цIыхум нэхъ тыншу егъэткIуф, къэуату щIэлъри лым нэхърэ хуэдитIым нэскIэ нэхъ мащIэщ.

ЩIэныгъэлIхэм къызэрахутамкIэ, бдзэжьей нэхъыбэ зышххэм гу-лъытхуэ узыфэхэр яхуэлъэкъым, къару нэхъ яхэлъщ, щIэх ешыркъым. Тхьэмахуэм хуэзэу бдзэжьейр зэ нэхъ мыхъуми зышхыр инфаркт, инсульт узхэм щыхъума мэхъу.

Сэбэпынагъыу хэлъым къищынэмыщIауэ, бдзэжьей шхэпсыр (клейр) зи щхьэм лъы кIуахэм къахуосэбэп, уIэгъэхэр нэхъ псынщIэу егъэкIыж. Мы зэманым бдзэжьейм и пкъыгъуэ щхьэхуэхэм къыхащIыкI хущхъуэгъуэ зэмылIэужьыгъуэхэр: панкреатин, инсулин.