Псыкъелъэ Iэхэлъахэ

Шэджэм ЕтIуанэ – Булунгу автомобиль зекIуапIэм и зы Iыхьэу Шэджэм псыкъелъэхэм егъэщIылIар къэгъэщIэрэщIэжыным хуэгъэза лэжьыгъэхэм щIадзащ. Ахэр йокIуэкI «ГъуэгуфI шынагъуэншэхэр» лъэпкъ проектым ипкъ иту. 
Гъуэгуухуэхэр мы зэманым яужь ихьащ зыплъыхьакIуэ-зыгъэпсэхуакIуэхэм куэд щIауэ къагъэунэхуа икIи яфIэтелъыджэ нэгузегъэужьыпIэ гъуэзэджэу а лъэныкъуэмкIэ щыIэ Шэджэм псыкъелъэхэм я Iэгъуэблагъэ гъуэгум щыщу километри 2 зи кIыхьагъыр зыхуей хуэгъэзэным.
IэщIагъэлIхэм илъэсыщIэр къызэрихьэу щIадзащ Шэджэм псыр щежэх ныджэм гъуэгумкIэ къэгъэза и Iуфэр мардэщIэхэм къитIасэу къегъэбыдэкIыным. ЗэрызэкIэлъыкIуэу къедбжэкIынщи, япэщIыкIэ щIыр, къырылъэ-мывалъэр къыщIэщыху, къратхъунщIыкIынущ, итIанэ бетон блынхэр а лъэныкъуэмкIэ къыщыдращIеинущ, кIэлъыкIуэу и гущIыIур, гъуэгури зэдищтэу, цементкIэ трагъэжыхьыжынурэ, асфальтыщIи тралъхьэжынущ. 
Къыхэгъэщыпхъэщ, проектым хыхьэу уэшх-псыкIантIэ IушыпIэу а щIыпIэм щыIахэри зэрыщызэрахъуэкIынур, лъэс зекIуапIэхэми зэрызыщрагъэубгъунур, машинэ гъэувыпIэхэри зэрыщрагъэфIэкIуэнур. 
Шэджэм ЕтIуанэ – Булунгу автомобиль гъуэгум щыщу километритI зи кIыхьагъыр мардэщIэхэм къитIасэу зэгъэпэщыным тегъэпсыхьа лэжьыгъэр къезыхьэжьахэм 2024 гъэм ар яухыну я мурадщ. ПIалъэр кIыхь щIащIар епхащ къагъэщIэрэщIэж щIыпIэр зэрыкъуейщIеймрэ Iуэху ирахьэлIэнухэр бащэу зэрыщытымрэ.