КIуэкIуэ Казбек мы махухэм лэжьыгъэ IуэхукIэ щыIащ Херсон областым хыхьэ щIыпIэхэм ящыщу ди республикэм и нэIэм щIэтхэм. Ар яхуэзащ Скадовск, Голопристанск, Каланчак дзэ-граждан щIыпIэ администрацэхэм я Iэтащхьэхэу Швайко Сергей, Недялков Геннадий, Мустиянович Пётр сымэ.
ЗэIущIэм щытепсэлъыхьащ нэхъапэIуэкIэ зэращIылIауэ щыта зэгурыIуэныгъэхэм япкъ иткIэ щIыпIэхэм зегъэужьыным, гуманитар дэIэпыкъуныгъэ етыным, Къэбэрдей-Балъкъэрым и санаторэхэм а щIыналъэхэм ящыщ сабийхэм зыщегъэгъэпсэхуным епха Iуэхухэм адэкIэ къызэрыпащэну щIыкIэхэм. Нэгъабэ зэфIагъэкIа апхуэдэ Iуэхугъуэхэми щыхэплъэжащ зэхуэсым. Къэбгъэлъагъуэмэ, Скадовск къалэм зэпэщ щащIыжащ фэтэр 24-рэ хъу псэупIэ унэшхуэр, «Колокольчик» гъэсапIэм и унащхьэр зэрахъуэкIащ, Каланчакскэ жылэм дэт курыт школ №1-р зэрагъэпэщыжащ. А жылэхэм, апхуэдэуи Антоновкэ къуажэм щызэрагъэпэщыжащ сабий джэгупIэхэр, Новониколаевкэми мыгувэу щаухынущ апхуэдэ лэжьыгъэ щхьэпэр.
А щIыпIэхэм щыпсэухэм 2022 гъэм и бадзэуэгъуэм къыщыщIэдзауэ Къэбэрдей-Балъкъэрым къыбгъэдэкIыу яIэрыхьащ гуманитар дэIэпыкъуныгъэ зэмылIэужьыгъуэхэр: ерыскъыпхъэхэр, псэуныгъэм къыщагъэсэбэп хьэпшыпхэр, псы, медицинэ Iэмэпсымэхэр, нэгъуэщIхэри. Социальнэ IуэхущIапIэхэм папщIэ щIыпIэм яшащ ухуэныгъэм ирахьэлIэ пкъыгъуэхэр, компьютерхэр, еджэным къыщагъэсэбэп школ хьэпшыпхэр, сабийхэм папщIэ саугъэтхэр зэрылъ хъуржынхэр.
КIуэкIуэ Казбек щыIащ Каланчак дэт школым икIи зригъэлъэгъуащ ухуэныгъэ-зэгъэпэщыжыныгъэ лэжьыгъэхэр абы зэрыщрагъэкIуэкIар. Республикэм и Iэтащхьэм КъБР-м и Правительствэм къалэн щищIащ еджапIэм и спорт залышхуэмрэ зэIущIэхэр щрагъэкIуэкIымрэ зыхуей-зыхуэныкъуэ псомкIи къызэригъэпэщыну. Скадовск, Голопристанскэ, Каланчак жылэхэм я дзэ-граждан щIыпIэ администрацэхэм я Iэтащхьэхэм Къэбэрдей-Балъкъэрым, абы и цIыхухэм фIыщIэ псалъэ куэд къыхужаIащ, мыхьэнэшхуэ зиIэ социально-щэнхабзэ IуэхущIапIэхэр, псэупIэ унэхэр зэрыхузэрагъэпэщыжам папщIэ, я сабийхэр республикэм къашэурэ абы и санаторэхэмрэ курортхэмрэ зэрызыщрагъэгъэпсэхум щхьэкIэ.
Къэбэрдей-Балъкъэрым адэкIи пищэнущ а щIыпIэхэм ядэIэпыкъуным. Мы илъэсым къриубыдэу зэрагъэпэщыжынущ Скадовск къалэм и Джарылгачскэ уэрамым кIуэцIрыкI псы зэрыкIуэ бжьамийр, абы дэт курыт школ №1-м и медицинэ пэшыр, Михайловкэ къуажэм дэт амбулаторэр.
Республикэм и Iэтащхьэм апхуэдэу захуигъэзащ Скадовск къалэ сымаджэщ нэхъыщхьэм Къэбэрдей-Балъкъэрым икIауэ волонтёру щылажьэ анестезиологхэм, реаниматологхэм. Апхуэдэ IэщIагъэлIхэр зэримыIэм къыхэкIкIэ нэхъапэм абы нэсу щеIэзэфыртэкъым сымаджэхэми уIэгъэ хъуауэ кърашалIэхэми. Сымаджэщым и унафэщIым нэгъабэ зыкъыхуигъэзауэ щытащ КIуэкIуэ Казбек, IуэхущIапIэр зыхуэныкъуэ медицинэ лэжьакIуэхэмкIэ дэIэпыкъуэгъу къыхуэхъу-ну лъаIуэу. Апхуэдэ псалъэм пIалъэ къыхамыгъэкIыу пэджэжащ ди щIыналъэм и унафэщIхэри дохутырхэри икIи зэман кIэщIым къриубыдэу абы ягъэкIуащ сымаджэщыр зыхуэныкъуэ IэщIагъэлIхэр. Иджыпсту абы лэжьыгъэр щрахьэкI ди республикэм щыщ дохутыр гуп ещанэм. Ахэр хуабжьу сэбэп яхуохъу сымаджэхэ-ми уIэгъэхэми. Сымаджэщым и дохутыр нэхъыщхьэ Руденкэ Константин фIыщIэ ин хуищIащ КIуэкIуэ Казбек а гулъытэм папщIэ. Апхуэдэуи къыхигъэщащ республикэм икIа дохутырхэм Iэзагъышхуэ зэрабгъэдэлъыр.
И зекIуэм и кIэухыу КъБР-м и Iэтащхьэр яхуэзащ Къэбэрдей-Балъкъэрым икIауэ Херсон областым СВО-м щыхэт ди зауэлIхэм. Фигу къэдгъэкIыжынщи, КIуэкIуэ Казбек нэхъапэIуэкIэ яIущIащ апхуэдэ ди зауэлIхэу Запорожскэ областым къулыкъур щезыхьэкIхэм.