Къэбэрдей-Балъкъэр Республикэм и Iэтащхьэм и Указ

Къэбэрдей-Балъкъэр Республикэм и Iэтащхьэм щытыкIэр зи нэIэ щIэт и центр къызэгъэпэщыным теухуауэ 

Къэбэрдей-Балъкъэр Республикэм и Iэтащхьэм и Указ

Урысей Федерацэм и Президентым 2013 гъэм бадзэуэгъуэм и 25-м «ЩытыкIэхэр зи нэIэ щIэт центр щхьэхуэхэр, зы регламентым тету зэдэлажьэхэр, къызэгъэпэщыным и IуэхукIэ» къыдигъэкIа Указ №687-м къыщыгъэлъэгъуахэр гъэзэщIэным, къэрал унафэхэр къэщтэным хъыбарегъащIэ-аналитикэ и лъэныкъуэкIэ щIэгъэкъуэн хуэхъуным, щытыкIэр зыхуэдэр къэпщытэным, къэкIуэну зэманым абы игъуэтыну зэхъуэкIыныгъэхэр зэпэлъытыным, къэхъукъащIэхэм зэрызаужьынкIэ хъуну щIыкIэр унэтIыным, мыхьэнэшхуэ зиIэ, пIалъэ кIэщIым тещIыхьа икIи икIэщIыпIэкIэ унафэ зытещIыхьыпхъэ Iуэхухэм хуэхьэзыру щытыным, къэрал унафэ щIыкIэр егъэфIэкIуэным хуэунэтIауэ унафэ сощI:
1. Къэбэрдей-Балъкъэр Республикэм и Iэтащхьэм щытыкIэр зи нэIэ щIэт и центр къызэгъэпэщын (адэкIэ - щытыкIэр зи нэIэ щIэт центрщ).
2. Къэбэрдей-Балъкъэр Республикэм и Правительствэм:
а) 2023 гъэм мэкъуауэгъуэм и 1 пщIондэ:
щытыкIэр зи нэIэ щIэт центрым теухуа положенэм и проектыр зэхилъхьэу къыхилъхьэн хуейщ;
Къэбэрдей-Балъкъэр Республикэм и къэрал властым и гъэзэщIакIуэ органхэу, Къэбэрдей-Балъкъэр Республикэм и Iэтащхьэм и Администрацэм къегъэщIылIа IэнатIэхэу мыпхуэдэ IуэхухэмкIэ жэуап зыхьынухэр иубзыхун хуейщ:
щытыкIэр зи нэIэ щIэт центрым и лэжьыгъэр зэтеухуэным, абы зегъэужьынымрэ ар къэгъэсэбэпынымкIэ;
щытыкIэр зи нэIэ щIэт центрым зэрызиужьыну щIыкIэмкIэ, ар зэрылэжьэну мардэхэр щагъэувкIэ техникэ и лъэныкъуэкIэ зы жыпхъэм тетыныр къызэгъэпэщынымкIэ;
щытыкIэр зи нэIэ щIэт центрыр здэщыIэну унэхэр, псэуныгъэм, шынагъуэншагъэм ехьэлIауэ щIыналъэм и инженер системэхэр тэмэму лэжьэныр къызэгъэпэщынымкIэ;
б) 2023 гъэм бадзэуэгъуэм и 15 пщIондэ зэхилъхьэн икIи къищтэн хуейщ щытыкIэр зи нэIэ щIэт центрым зегъэужьыным пыщIа Iуэхухэр.
3. Къэбэрдей-Балъкъэр Республикэм и къэрал властым и гъэзэщIакIуэ органхэм, Къэбэрдей-Балъкъэр Республикэм и Iэтащхьэм и Администрацэм къегъэщIылIа IэнатIэхэм я унафэщIхэм яхуэгъэувын щытыкIэр зи нэIэ щIэт центрым и лэжьыгъэр тэмэму зэтеухуауэ екIуэкIын папщIэ хъыбархэр и чэзум къаIэрыхьэнымкIэ, ахэр нэсу икIи пэжу щытынымкIэ я щхьэкIэ жэуап зэрахьыр.
4. Мы Указым къару егъуэт ар официальнэу къыщытрадза махуэм щегъэжьауэ.

Къэбэрдей-Балъкъэр Республикэм
и Iэтащхьэ КIУЭКIУЭ Казбек
Налшык къалэ
2023 гъэм гъатхэпэм и 31-м
№29-УГ