КъБР-м и Жылагъуэ палатэм иджыблагъэ щекIуэкIа зэIущIэр теухуауэ щытащ Къэбэрдей-Балъкъэрым ис лъэпкъхэм я зэхуаку зэгурыIуэныгъэрэ зэкъуэтыныгъэрэ дэлъынымкIэ хъыбарегъащIэ IэнатIэхэм ягъэзащIэ къалэным. Къыхалъхьа Iуэхугъуэм убгъуауэ икIи купщIафIэу тепсэлъыхьащ «КъБР-Медиа» ГКУ-м и унафэщIым и къуэдзэ Дзыгул МуIэед.
- Хъыбар нэпцIхэр хуабжьу къыщрахьэкI лъэхъэнэм зи Iуэхум хуэпэж хъыбарегъащIэ IэнатIэ-хэм яхь жэуаплыныгъэр инщ, цIыхухэри хуэныкъуэщ. Ди хэгъэгум щылажьэ къэрал, щIыналъэ СМИ-хэм и чэзум, пэжым тету къагъэлъагъуэ цIыхубэм я гъащIэр, республикэм и Iэтащхьэм, Парламентым, Правительствэм, нэгъуэщI къулыкъущIапIэхэм я лэжьыгъэр зэрекIуэкIыр, - жиIащ Дзыгул МуIэед. - «КъБР-Медиа» ГКУ IэнатIэм и нэIэ щIэтщ зы телеканал, радиоканал, газетих, журнали 6, интернетым щылажьэ къыдэкIыгъуэу 8. КъищынэмыщIауэ, щыIэщ ГТРК-м и къудамэу, район газету 13 къыдокI. УрысыбзэкIэ, адыгэбзэкIэ, балъкъэрыбзэкIэ лажьэ хъыбарегъащIэ IэнатIэ-хэм Урысей Федерацэми, хамэ къэралхэми интернетым и IэмалхэмкIэ щоджэф икIи щоплъыф. Республикэ къыдэкIыгъуэхэр жылагъуэ зэгухьэныгъэхэм, лъэпкъ щэнхабзэ центрхэм, нэгъуэщI зэщIэхъееныгъэхэм ядэлажьэкIэрэ КъБР-м ис лъэпкъхэм я зэкъуэтыныгъэр ирагъэфIакIуэ, лъэпкъ зыхэщIыкIыр гъэбыдэнымкIэ, цIыхубэм гупсысэ убзыхуа яIэнымкIэ сэбэп мэхъу. Апхуэдэ дыдэу дин зэгухьэныгъэхэм япыщIащи, зэпIэзэрытыныгъэ щыIэнымкIэ щхьэпэщ. Зи гугъу тщIы зэгухьэныгъэхэм я тхьэмадэхэмрэ лIыкIуэхэмрэ я къэпсэлъэныгъэхэр щIэх-щIэхыурэ къытрадзэ «Кабардино-Балкарская правда», «Адыгэ псалъэ», «Заман», «Горянка», «Советская молодежь» газетхэм. ЩIыналъэ газетхэм щIэх-щIэхыурэ къытохуэ лъэпкъ зэгухьэныгъэхэр зэрызэдэлажьэм, дин зэгухьэныгъэхэмрэ жылагъуэ зэщIэхъееныгъэхэмрэ хэтхэм къэхъуа Iуэху нэхъыщхьэм теухуа я еплъыкIэхэр, Урысей Федерацэм и къэрал лъэпкъ политикэр гъэзэщIа зэрыхъум ехьэлIа гупсысэхэр.
АдэкIэ МуIэед тепсэлъыхьащ КъБР-м ЩэнхабзэмкIэ и министерствэмрэ «КъБР-Медиа» ГКУ-мрэ нэгъабэ Налшык щрагъэкIуэкIа «Моя провинция» урысейпсо фестивалым хэтахэм кIуэжа нэужь, ятхыжа гупсысэхэм, ди республикэм ис лъэпкъ-хэм я зэхущытыкIэ гуапэмрэ зэгурыIуэныгъэмрэ псоми къызэрыхагъэщам.
Республикэ хъыбарегъащIэ IэнатIэхэр иджыпсту зэрыт щытыкIэм, зыхуэныкъуэу къилъытэхэм зэпкърыхауэ къытеувыIащ Жылагъуэ палатэм и унафэщIым и къуэдзэ, «Заман» газетым илъэс куэдкIэ и редактор нэхъыщхьэу щыта Аттаев Жэмал. Журналист нэсым хэлъын хуей Iэзагъымрэ IэнатIэр апхуэдэхэмкIэ къызэрызэгъэпэщамрэ тепсэлъыхьащ Жэмал.
«Прохладненские известия» район газетым и редактор нэхъыщхьэ Даврановэ Светланэ жиIащ республикэ хъыбарегъащIэ IэнатIэхэр нэхъ гъунэгъуу зэдэлэжьэн зэрыхуейр.
ЗэIущIэм къыщыпсэлъащ РИА «Къэбэрдей-Балъкъэр» агентствэм и унафэщI Аттаев Азнор. Куэдым я дежкIэ мыгурыIуэгъуэу къыщIэкIа гупсысэщ а щIалэм и докладым къыщигъэлъэгъуар. Абы жиIащ адыгэбзэрэ балъкъэрыбзэкIэ къыдэкI газетхэм а бзэхэр зыIурылъхэм фIэкIа зэремыджэфым къыхэкIыу, я мыхьэнэр нэхъ лъахъшэ хъууэ икIи ахэр зытетхыхьхэр псоми къагурыIуэ бзэкIэ къызытехуэ газет къызэгъэпэщыпхъэу. «Лъэпкъ псом я дежкIи гурыIуэгъуэу щымыт бзэхэмкIэ газет къыдэбгъэкIкIэ, сыт хуэдэ зэгурыIуэныгъэ республикэм илъынур? Анэдэлъхубзэр зыщIэхэм фэкIа зыми къыхуэмысэбэп лъэпкъ газетхэм лъэпкъ зэхущытыкIэхэр егъэфIэкIуэнми, урысейм и цIыхухэр зэкъуэгъэувэнми хэлъхьэныгъэ хуащIыркъым».
Лъэпкъхэр зэрызэгурыIуэ къэралыбзэхэр куэду тетщ дунейм, Аттаевым зи гугъу ищI IуэхухэмкIэ къэсэбэпу, ди республикэми къыщыдокI апхуэдэхэр. Дэ къызэрытлъытэмкIэ, анэдэлъхубзэм и мыхьэнэри, абы лъэпкъым дежкIэ игъэзащIэ къалэнри нэгъуэщIщ. ди республикэм къэралыбзэу щыщыт адыгэбзэрэ балъкъэрыбзэкIэ къыдэкI газет закъуэхэр зэхуэпщIыжмэ, тфIэкIуэдынум и уасэр хэт къилъытэфыну? Дэтхэнэ лъэпкъым дежкIи мыхьэнэшхуэ иIэщ и бзэр зыгъэлажьэ сыт хуэдэ IуэхущIапIэми. Абы елъытамэ, лъэпкъ газетхэми къалэнышхуэ я пщэ къыдохуэ. Къэралым, республикэм къыщыдэкI адрей газетхэм хъыбарыщIэ къибджыкIмэ, «Адыгэ псалъэ», «Заман» газетхэр ди бзэкIэ къыдопсалъэ, анэдэлъхубзэр ехъумэ, зрегъэужь, цIыхубэм яхехьэ, тхыдэр, щэнхабзэр хъума хъунымкIэ сэбэп мэхъу. Бзэр щыIэнымкIэ иIэ мыхьэнэращ псом япэ игъэщыпхъэр. АнэдэлъхубзэкIэ традзэ газетхэр энциклопедие, уеблэмэ институт псо ирокъу. Абы и Iуэхур инщ икIи купщIафIэщ лъэпкъыр, бзэр, хэкур щыIэнымкIэ, заужьынымкIэ. Ди бзэр тщIэжмэ, ди хабзэр зетхьэмэ, лъэпкъ зэгурыIуэныгъэ зэрыщыIэнум шэч хэлъкъым. Мис абыкIэщ лъэпкъ газетхэр зэрыщхьэпэр.
ЗэIущIэм къыщаIэта Iуэхухэм мыхьэнэшхуэ зэраIэр жиIащ КъБР-м и Жылагъуэ палатэм и унафэщI Берд Хьэзрэталий икIи дыщIигъуащ къэралым, республикэм я социально-экономикэ зыужьыныгъэр зэрекIуэкIыр; жылагъуэр зэкъуигъэувэн, тхыдэм и пэжымрэ урысей лъапIэныгъэхэмрэ хъума хъун папщIэ къулыкъущIапIэхэм зэфIагъэкIхэр цIыхубэм ящIэн папщIэ, СМИ-р псоми ялъэIэсын зэрыхуейр. ЗэIущIэм къыщыхалъхьа-хэм теухуа чэнджэщхэр къулыкъущIапIэхэм хуагъэхьынущ, апхуэдэуи хъыбарегъащIэ IэнатIэхэр иджырей мардэхэм изагъэу, зыхуэныкъуэ щымы-Iэу лажьэу къызэрагъэпэщыным текIуэдэну ахъшэр къэугъуеин зэрыхуейри дыщIагъуащ.