Урысейм и цIыхухэм дронхэм зэрызыщахъумапхъэр

Дзэ политолог, МВД-м и полковникыу запасым щыIэ Иванников Олег ХъыбарегъащIэ аналитикэ агентствэм и Ura.ru сайтым щыжиIащ шынагъуэншагъэмкIэ зэран хъуну гурыщхъуэ ящIрэ цIыху имысу ягъэлъатэ Iэмэпсымэхэм хуэдэ къащхьэщыхьауэ ирихьэлIа дэтхэнэми ищIапхъэхэр.
Иванниковым къызэрыхигъэщащи, апхуэдэ Iэмэпсымэм ди цIыхухэм телефонымкIэ сурэт е видео трахыу, полицэм Iэмал имыIэу зыхуагъэзапхъэщ.
Абы къызэрилъытэмкIэ, апхуэдэ дронхэр зыгъэлъатэхэм гъунэгъу захуумыщIмэ нэхъыфIщ, хабзэхъумэхэр къэсыху упэплъэрэ, щытыкIэм теухуауэ узыщыгъуазэр яжепIэмэ нэхъыфIщ. 
Фигу къэдгъэкIыжынщи, «UNSW Canberra» къэпщытакIуэ гупым щыщ, американ экономист Бейкер Дин зэрыжиIамкIэ, Кремлым щхьэщыхьахэм къагъэсэбэпащ украин UJ-22 дроныр. Бейкерым къызэрилъытэмкIэ, зи гугъу тщIы Iэмэпсымэм хузэфIокI гъуэгуанэ жыжьэ къызэпичын. Ауэ, абы тегъэщIапIэ ищIым шэч къыщIытепхьэн щхьэусыгъуи щыIэщ - ар США-м и къэпщытакIуэу щытщ, а къэралым илэжь хьэгъэщагъэхэр щIэзыуфэну хэтхэм ящыщуи къэплъытэ хъунущ. 
ДронхэмкIэ Урысейм и щIыпIэхэм еуэ зэрыхъуам, абыкIэ цIыхухэр ягъэшынэну зэрыхэтым и зы щапхъэщ Москва и Кремлым ехуэну зэрыхэтари. Курск областым и Толмачевэ къуажэ цIыкIум накъыгъэм и 10-м ПВО-м къыщриудыхащ апхуэдэ Iэмэпсымэ. Апхуэдэ хъыбар къитащ а щIыналъэм и губернатор Старовойт Роман. А къэхъукъащIэм зыри хэкIуэдакъым, ауэ унэ гуэрым и щхьэр трихащ, газ зэрыкIуэ бжьамийр зэпиудащ.
Воронеж областым и губернатор Гусев Александр зэрыжиIамкIэ, а щIыналъэм ягъэлъатэ дроным хуэдитI еуащ. Зыр, зэрызахъумэжыным хуэщIауэ къагъэсэбэп Iэмалхэм я фIыгъэкIэ, зытрагъэпсам трагъэхуакъым, етIуанэр къраудыхащ. Шынагъуэншагъэр къызэгъэпэщыным ехьэлIауэ, властым и лэжьакIуэхэр ядолажьэ зауэ IуэхущIапIэхэм, - жиIащ Гусевым. 
Апхуэдэуи, Белгород областым и губернатор Гладков Вячеслав зэрыжиIамкIэ, Новооскольск щIыналъэм и Ольховаткэ къуажэм дронхэр къыщраудыхащ.