КъБР-м и Правительствэм и УнафэщI Мусуков Алий иригъэкIуэкIащ Iуэхугъуэ зыбжанэм щыхэплъа зэIущIэ.
Урысейм ЩIэныгъэхэмкIэ и академием и Къэбэрдей-Балъкъэр щIэныгъэ центрым илъэсищкIэ пщIэншэу къигъэсэбэпыну IуэхущIапIэ етыным теухуа пректыр къыхилъхьащ КъБР-м и Правительствэм.
КъБР-м и Правительствэм и мылъку гъэтIылъам щыщ КъБР-м ПромышленностымкIэ, энергетикэмрэ сатумкIэ и министерствэм зэрыратынур игъэбелджылащ министр Iэхъуэбэч Шамил. Мылъкур экономикэ IуэхукIэ къагъэсэбэпынущ.
КъБР-м лэжьыгъэмрэ цIыхухэм социальнэу къащхьэщыжынымкIэ и министр Асанов Алим тепсэлъыхьащ бадзэуэгъуэм и 3-м республикэм и къалэхэмрэ къуажэхэмрэ щIыхьэху зэрыщекIуэкIыну щIыкIэм. Ар къызэрагъэпэщ сабиихэм гулъытэ хуащIын папщIэ. Псапэ зыщIэну цIыхухэм а Iуэхум халъхьэну мылъкур хуэныкъуэхэм трагуэшэнущ. Министрым игъэбелджылащ республикэм и цIыхухэм зэрадэIэпыкъун нэгъуэщI проектищи.
Къэбэрдей-Балъкъэрым и къэрал программэхэр 2022 гъэм гъэзэщIа зэрыхъуам теухуауэ къэпсэлъащ КъБР-м экономикэ зыужьыныгъэмкIэ и министр Рахаев Борис.
- 2022 гъэм республикэм щагъэзэщIащ къэрал программэу 26-рэ. Абыхэм ящыщу 22-м федеральнэ бюджетым щыщ мылъку хэлъащ. Къэрал программэхэр гъэзэщIэным трагъэкIуэдащ псори зэхэту сом мелард 62-рэ мелуан 300-рэ: федеральнэ мылъкуу сом мелард 31-рэ мелуан 600-рэ, республикэм и ахъшэу сом мелард 30-рэ мелуан 700-рэ. Республикэм и къэрал программэхэм яхьащ сом мелард 51,4-рэ. Ар ягъэбелджылауэ щытам и процент 98,7-рэ мэхъу. Абы щыщу федеральнэ мылъкум къыхэкIащ сом мелард 31,5-рэ (процент 99,7-рэ), республикэм и мылъкум – сом мелард 29,9-рэ (процент 97,6-рэ). Нэхъыбэу мылъкур къызыхуагъэсэбэпар псэукIэр егъэфIэкIуэнырщ. ЦIыхухэм ядэIэпыкъуным хуаунэтIащ сом мелард18 (процент 93,3-рэ). Егъэджэныгъэм къыщагъэсэбэпащ сом мелард15,7-рэ (процент 25,2-рэ). Узыншагъэр хъумэным – сом меларди 10,5-рэ (процент17,2-рэ). Республикэм и транспорт Iуэхум ихьащ сом меларди 4,7-рэ (проценти 7,7-рэ). Мэкъумэш IэнатIэмрэ республикэр ерыскъыпхъэхэмкIэ къызэгъэпэщынымрэ текIуэдащ сом меларди 2,7-рэ (проценти 4,4-рэ). Мылъкум я нэхъыбэр яхьащ социальнэ мыхьэнэ зиIэ программэхэм. Абы бюджетым и процент 70 текIуэдащ, - жиIащ Рахаевым.
