Я махуэшхуэмкIэ йохъуэхъу

Бадзэуэгъуэм и 28-р Урысейм и МЧС-м и КъэлъыхъуакIуэ-къегъэлакIуэ IэнатIэм и махуэщ.

Зи гугъу тщIы IуэхущIапIэр 1992 гъэм бадзэуэгъуэм и 28-м къызэрагъэпэщащ УФ-м Граждан зыхъумэжыныгъэмкIэ, къызэрымыкIуэ щытыкIэхэмрэ къулейсызыгъэ къэзыхь къэхъукъащIэхэм я лъэужьхэр гъэкIуэдыжынымкIэ и къэрал комитетым турист, альпинист къегъэлакIуэ къудамэ зэмылIэужьыгъуэу 35-рэ щыхагъэхьам щыгъуэ.
Зи гугъу тщIы IэнатIэм и лъабжьэр щIыналъэхэм щылажьэ къэлъыхъуакIуэ-къегъэлакIуэ гупхэрщ. Урысейм и МЧС-м хэтщ зи IэщIагъэкIэ къегъэлакIуэу 4800-рэ, техникэ Iэмэпсымэ зэмыщхьу 2200-рэ къагъэсэбэп.
 Терскол жылэм и метр 2150 лъагапIэм хуэзэу щыIэщ Урысей МЧС-м и Iуащхьэмахуэ бгы лъагэ къэлъыхъуакIуэ-къегъэлакIуэ гупыр. Абы илъэс зыкъом хъуауэ и унафэщIщ Урысей Федерацэм щIыхь зиIэ и къегъэлакIуэ Гулиев Абдуллэхь.
КъБР-м щылажьэ гупым и кIэлъыплъыныгъэм щIэтщ республикэм и щIыналъэ псор - Кавказ бгыхэм я Iыхьэ нэхъыбэр; Урысейм метр минитху зи лъагагъ и къуршийм щыщу блыр. ЗэрыгурыIуэгъуэщи, я гулъытэр нэхъ зыхуэгъэзар къуршылъэ щIыпIэхэрщ. IэщIагъэлIхэм я нэIэ щIэту щIыналъэм щыпсэухэмрэ зыгъэпсэхуакIуэ къэкIуахэмрэ я шынагъуэншагъэр. IэнатIэр къызэгъэпэщащ альпинизмэм, бгы лыжэхэм, промышленнэ альпинизмэм ехьэлIа IэщIагъэлIхэмкIэ. Гупым хэтщ цIыху 90, 68-р IэщIагъэм хуэIэзэ къегъэлакIуэхэщ. Абыхэм ящыщу 5-м зэрахьэ Дунейпсо класс зиIэ къегъэлакIуэ цIэр, 4-р Урысейм щIыхь зиIэ и къегъэлакIуэщ, 9-р КъБР-м щIыхь зиIэ и къегъэлакIуэщ.
Урысей МЧС-м и Iуащхьэмахуэ бгылъэ лъагэ ПСО-м и къегъэлакIуэхэм илъэсыр къызэрихьэрэ цIыхухэр къуршхэм къыщыхъу къэхъукъащIэхэм щыхъумэным хуэунэтIа Iуэху 49-рэ ирагъэкIуэкIащ, цIыху 44-м я гъащIэр кърагъэлащ. ЦIыхухэр къегъэлыным ехьэлIа а лэжьыгъэр нэхъыбэу ягъэзэщIащ къурш лъагэхэм щыщыIэ щытыкIэ гугъу дыдэм иту.
КъегъэлакIуэ псоми дохъуэхъу я махуэмкIэ!