Сатууэ зэдащIым хагъахъуэ

Ди зэпыщIэныгъэхэр

Къэбэрдей-Балъкъэрым Экономикэ зыужьыныгъэмкIэ и министерствэм и пресс-IуэхущIапIэм къызэритамкIэ, республикэм и промышленнэ, мэкъумэш IуэхущIапIэхэм дызэрыт илъэсым зэрыщIидзэрэ Белоруссием хурагъэша продукцэр хуэдитIкIэ нэхъыбэщ, нэгъабэ и шыщхьэIу - фокIадэ мазэхэм къриубыдэу сатууэ дащIам нэхърэ.

Къэбэрдей-Балъкъэрым и Iэтащхьэ КIуэкIуэ Казбек республикитIым я правительствэхэр зэрызэдэлэжьэнум теухуауэ Iэ зыщIидзауэ щыта зэгурыIуэныгъэм, абы къыщыгъэлъэгъуахэр зэрагъэзащIэм ипкъ иткIэ сатууэ зэдащIым хэпщIыкIыу хэхъуащ. Псалъэм папщIэ, КъБР-м икIыу Беларусым хуаутIыпщ продукцэм хуэдищкIэ хэхъуащ 2022 гъэм, абы ипэ ита илъэсым зэрыщытам елъытауэ. Мы гъэм къриубыдэу щIыналъитIым адрей хэкухэм ирагъэша я продукцэхэм процент 76,8-кIэ хэхъуащ, ди республикэм икIыу а къэралым хуаутIыпщар процент 94,4-кIэ нэхъыбэщ, - къыщыхагъэщащ КъБР-м Экономикэ зыужьыныгъэмкIэ и министерствэм.

Къэбэрдей-Балъкъэрым нэхъыбэу а къэралым ирегъашэ мэкъумэшхэкIхэр, IэфIыкIэхэр, хьэжыгъэхэкIхэр, ди деж къыщыщIаш псыхэр, псыIэфIхэр. Нобэ республикэм и мэкъумэш IуэхущIапIэхэр зэрылажьэ трактор 5077-м я процент 70-р Минск дэт трактор заводым къыщыщIагъэкIащ. Илъэс къэс дэ къыдощэху а къэралым щащIа мэкъумэш техникэу, оборудованэу, нэгъуэщI Iэмэпсымэу 100-м щIигъу.

Абыхэм ящыщу 70-м щIигъур трактор зэмылIэужьыгъуэщ, къызыхуагъэсэбэпхэр зэтемыхуэу. Абыхэм яхэтщ Iусыпхъэхэр, гуэдзыр, нартыхур зэрыIуахыж комбайнхэр, машинэхэм пащIэ прицепхэр, нэгъуэщI оборудованэхэр.

Министерствэм къызэритамкIэ, ди республикэм сату пыщIэныгъэхэр иджыпсту яхуиIэщ къэрал 71-м. 2021 гъэм елъытауэ а бжыгъэм проценти 7,6-кIэ хэхъуащ (иджыри къэралитхум дэлэжьэн щIадзащ).