Хабзэхэм щIэхэр къахохъуэ

КъБР-м и Парламентым и УнафэщI Егоровэ Татьянэ республикэм и хабзэубзыху орган нэхъыщхьэм и президиумым и зи чэзу зэIущIэ иригъэкIуэкIащ.

Депутатхэм унафэ къащтащ Парламентым и зи чэзу зэIущIэр 2023 гъэм жэпуэгъуэм и 31-м зэхуэгъэсыным теухуауэ.
Ахэр хэплъащ хабзэубзыху проект зыбжанэм. Абыхэм ящыщщ «Къэбэрдей-Балъкъэр Республикэм и къэрал дамыгъэхэм я IуэхукIэ» Къэбэрдей-Балъкъэр Республикэм и Законым и 11-нэ, 16-нэ статьяхэм зэхъуэкIыныгъэхэр хэлъхьэным теухуауэ» КъБР-м и законым и проектыр. Ар КъБР-м и Правительствэм къыхилъхьащ икIи хуэгъэзащ «Къэбэрдей-Балъкъэр Республикэм и къэрал дамыгъэхэм я IуэхукIэ» республикэ Законым щIэуэ «Къэбэрдей-Балъкъэр Республикэм информацэ технологиехэмрэ связымрэ я IэнатIэм щIыхь зиIэ и лэжьакIуэ» цIэ лъапIэр хагъэхьэным.
- Мы Iуэхур зэпха министерствэм къелъытэ апхуэдэ унафэр зи гугъу тщIы IэнатIэм зегъэужьыным щIэгъэкъуэн хуэхъуну: зи лэжьыгъэм кууэ хэзыщIыкI IэщIагъэлIхэр къешэ­лIэнымкIэ, ахэр нэхъри тегъэгушхуэнымкIэ,- къыхигъэщхьэхукIащ абы теухуауэ къыщыпсалъэм КъБР-м и Парламентым Законо­дательст­-
вэмкIэ, щIыпIэ самоуправленэм ехьэлIа Iуэху­хэмкIэ и комитетым и унафэщI Мэлбахъуэ Борис.
Депутатхэр тепсэлъыхьащ «Къэбэрдей-Балъкъэр Республикэм дыкъэзыухъуреихь дунейр щыхъумэным и IуэхукIэ» Къэбэрдей-Балъкъэр Республикэм и Законым и 3-нэ статьям зэхъуэ­кIыныгъэхэр хэлъхьэным теухуауэ» республикэ законопроектым. КъБР-м и Парламентым ­мэкъумэш IуэхухэмкIэ, щIыуэпсыр къэгъэ­сэ­бэпынымкIэ, экологиемкIэ, дыкъэзыухъуреихь дунейр хъумэнымкIэ и комитетым и унафэщIым и къуэдзэ Щхьэгъэпсо Сэфарбий къазэрыгуригъэIуамкIэ, пэхуэщIэм а Законым и 3-нэ статьям 2-нэ Iыхьэу дыкъэзыухъуреихь дунейр хъумэн и лъэныкъуэкIэ КъБР-м и гъэзэщIакIуэ властым и органым и зэфIэкIхэр зыубзыхум, мы къэкIуэнухэр къыщыгъэлъэгъуа 13-1-нэ, 13 - 2-нэ пунктхэр щIагъужыну: «13.1-нэ, дыкъэзыухъуреихь дунейм зэман кIыхькIэ зэраныгъэ щрагъэгъуэта щIыпIэхэр къэхутэныр, 13 - 2-нэ, дыкъэзыухъуреихь дунейм зэман кIыхькIэ ирагъэгъуэта зэраныгъэр гъэкIуэдыжыныр къызэгъэпэщыныр».
Абыхэр къадэкIуэу тепсэлъыхьахэщ икIи елэжьын щIадзащ «Языныкъуэ республикэ законхэм зэхъуэкIыныгъэхэр хэлъхьэным и IуэхукIэ» законым и проектым. Ар ягъэхьэзыращ «Къэрал социальнэ дэIэпыкъуныгъэм и IуэхукIэ» Федеральнэ законымрэ «ХуэмыщIауэ къалъытэн икIи къэрал социальнэ дэIэпыкъуныгъэ иратын папщIэ унагъуэм къыIэрыхьэ хэхъуэхэр къызэрабж, икIи цIыху къэс ику иту хэхъуэхэр зэрытращIыхь, зи закъуэу псэу цIыхум и хэ­хъуэхэр къызэрапщ щIыкIэм и IуэхукIэ.» Федеральнэ законымрэ зэхъуэкIыныгъэхэр хэлъхьэ­ным теухуауэ» 2023 гъэм бадзэуэгъуэм и 24-м Федеральнэ закон №342-ФЗ-р къызэрищтам къы­хэкIыу
- Къапщтэмэ, Федеральнэ законым егъэтэмэм зи хэхъуэхэр цIыхур псэун папщIэ нэхъ мащIэ дыдэу иIэн хуейм нэхърэ нэхъ мащIэ унагъуэ хуэмыщIахэмрэ апхуэдэу зи закъуэу псэу цIыху хуэмыщIахэмрэ ику иту яIэрыхьэ хэхъуэр «Урысей Федерацэм цIыхур псэун папщIэ нэхъ мащIэ дыдэу зыхуейм и IуэхукIэ» Федеральнэ законым тету зэригъэувыр, - къыхигъэбелджылыкIащ ­КъБР-м и Парламентым ЛэжьыгъэмкIэ, социальнэ политикэмкIэ, узыншагъэр хъумэнымкIэ и комитетым и унафэщI Къэжэр Хъусен. - Абы къыхэкIыу къыхыдолъхьэ «Унагъуэр, анагъэр, адагъэр, сабиигъуэр хъумэным и IуэхукIэ», «Къэбэрдей-Балъкъэр Республикэм уэндэ­гъухэр, сабийхэр зыгъашхэ анэхэр, апхуэдэу зи ныбжьыр илъэсищым нэмыса сабийхэр ерыскъы къэуаткIэ къызэгъэпэщыным и IуэхукIэ», «Къэбэрдей-Балъкъэр Республикэм унагъуэ хуэмыщIахэм, хуэмыщIауэ зи закъуэу псэу цIыхухэм къэрал социальнэ дэIэпыкъуныгъэ щетыным и IуэхукIэ» республикэ законхэм апхуэдэ зыхуэфащэ зэхъуэкIыныгъэхэр къыщагъэлъэгъуэну.
Депутатхэр хэплъащ «Къэбэрдей-Балъкъэр Республикэм автомобиль гъуэгухэм ехьэлIа Iуэхухэмрэ гъуэгу лэжьыгъэмрэ зэрыщагъэувам и лъэныкъуэкIэ» Къэбэрдей-Балъкъэр Республикэм и Законым зэхъуэкIыныгъэхэр хэлъ­хьэным и IуэхукIэ», «Егъэджэныгъэм и IуэхукIэ» Къэбэрдей-Балъкъэр Республикэм и Законым и 5-нэ статьям зэхъуэкIыныгъэхэр хэлъхьэным и IуэхукIэ» КъБР-м и законхэм я проектхэм. Ахэр ягъэхьэзыращ федеральнэ законодательствэм игъуэта зэхъуэкIыныгъэхэм тращIыхьу.
ПэхуэщIэхэр Iуэхухэр зэгъэщIылIа псоми хуа­гъэхьащ къыпэджэжын, зэгъэзэхуэжыныгъэхэр халъхьэн, къазэрыщыхъухэр жаIэн папщIэ. Ахэр къалъытэу жэуап зыхь комитетхэм пэхуэщIэхэр КъБР-м и Парламентым и зэIущIэм къыщыхалъхьэн хуейщ.
Къызэхуэсахэр тепсэлъыхьащ федеральнэ законхэм я проектхэу, зыкъыхуэгъэзэныгъэхэу къэралым и щIыналъэхэм къикIахэм. Ахэр ехьэлIащ УФ-м щIыпIэ самоуправленэр щызэтеухуэным, сабий зиIэ унагъуэхэр къэралым зэрыдиIыгъым хэгъэхъуэным, егъэджэныгъэ IэнатIэм, нэгъуэщIхэми.
КъБР-м и Парламентым ЕгъэджэныгъэмкIэ, щIэныгъэмкIэ, щIалэгъуалэм и IуэхухэмкIэ и комитетым и унафэщI Емуз Нинэ и лэжьэгъухэр щыгъуазэ ищIащ «Къэбэрдей-Балъкъэр Республикэм щIалэгъуалэ политикэр зэрыщыгъэувамрэ абы зегъэужьынымкIэ щыIэ Iэмалхэмрэ я IуэхукIэ» КъБР-м и Парламентым и Президиумым къищта унафэм къыщыгъэлъэгъуа чэнджэщхэр пхыгъэкIа зэрыхъум.
КъБР-м и Парламентым Физическэ щэнхабзэмкIэ, спортымкIэ, туризмэмкIэ и комитетым и унафэщI Бэрэгъун Арсен яжриIащ «Къэбэрдей-Балъкъэр Республикэм туризм IэнатIэм ехьэлIа лэжьыгъэр зэрыщыгъэувам и IуэхукIэ» Къэбэрдей-Балъкъэр Республикэм и Законыр зэрагъэзащIэм теухуауэ» ирагъэкIуэкIа правительствэ сыхьэтым» къыщаIэта Iуэхухэр зэрызэфIагъэ­кIыр.
Къагъэхьа дэфтэрхэми хэплъэри, президиу­мым хэтхэм унафэ къащтащ КъБР-м и Парламентым и ЩIыхь тхылъыр IэнатIэ зэмылIэужьыгъуэхэм я лэжьакIуэ зыбжанэм етыным теухуауэ.