Путин Владимир щыдаIыгъыну штаб къызэIуахащ

Урысей Федерацэм и адрей хэгъэгухэми хуэдэу, Къэбэрдей-Балъкъэрым къы­щызэIуах Путин Владимир президент хэхыныгъэхэм хэтыну и кандидатурэр къи­гъэлъэгъуэн папщIэ, абы и телъхьэхэм я IэщIэдзхэр щызэхуахьэс хэщIапIэ.       КъБР-м и Профсоюзхэм я унэм къыщы­зэIуаха штабыр жэщ-махуэм зэпымыууэ лэжьэнущ, IэщIэдзхэр зэхуэхьэсын щэ­кIуэ­гъуэм и 23-м щIадзэнущ. ЩIыналъэ штабым и унафэщI Дадэ МуIэед зэрыжиIамкIэ, республикэм икIа лIыкIуэхэр хэтащ Москва щекIуэкIа зэхуэсым, абы щызэхыхьащ Урысей президент хэхыныгъэхэм Путин Владимир хэтыным жэрдэмщIакIуэ хуэхъуа гуп. 

«Дэ иджыпсту долъагъу зы къэрали щымыIэ цIыхубэ зэкъуэтыныгъэр ди деж зэрыщызэфIэувэр - къэрал псом деIыгъ иджырей президентым и кандидатурэр. Зарядье щекIуэкIа зэIущIэм щызэхуэсат политикхэм, жылагъуэ лэжьакIуэхэм, артистхэм, блогерхэм нэмыщI, къызэрыгуэкI цIыху­хэри: дзэ Iуэху хэхам и ветеранхэр, абы щыIахэр, жылагъуэ лэжьакIуэхэр, доху­тырхэр, егъэджакIуэхэр, хьэрычэтыщIэхэр.
Шэч хэмылъу, Путин Владимир пашэщ. Ар къэрал унафэщIу щытыныр деIыгъ дэтхэнэ зы урысей цIыхуми. Путиныр ди къэралым и щхьэхуитыныгъэмрэ зэкъуэтыныгъэмрэ зыхъумэфын, нэхъ быдэ зыщIыфын цIыхущ. Нобэ къызэIудох Путин Владимир  и хэхыныгъэ штабу Къэбэрдей-Балъкъэ­рым щылэжьэнур, - жиIащ Дадэм зэIущIэм и пэщIэдзэм. 
Апхуэдэ штаб къыщызэIуахащ Москва щыIэ Гостинэ дворми, абы и унафэщIхэщ Машков Владимир, Жогэ Артем, Лысенкэ Марьянэ сымэ. Къэбэрдей-Балъкъэрым щылэжьэну шта­бым и унафэщIым и гъусэ­хэщ: Текуев Амырбий, Нэхущ Чэрим, Ореховэ Каринэ сымэ. ХэщIапIэм и тхьэмадэм и къуэдзэщ Бакаев Евгений, Амщокъуэ ФатIимэт, Парафилов Дмитрий. 
«Иджыпсту Путин Владимир дэтIыгъын хуейуэ къызолъытэ, сыт щхьэкIэ жыпIэмэ, ди хэкум и шынагъуэншагъэр къызэригъэ­пэщу, и къэкIуэнури дахэ хъунымкIэ сэбэп хъунущ», - жиIащ Нэхущ Чэрим. 
Текуев Амырбий къыхигъэщащ ди Президентыр дуней псом пщIэ щызиIэ лIыщхьэу зэрыщытыр, абы и Iулыджым зыри къызэ­рытемыкIуэнур.
Путин Владимир и кандидатурэр президент къулыкъум щхьэкIэ къагъэлъэгъуэн папщIэ щIышылэм и 31 пщIондэ Урысейм и ЦИК-м IэщIэдз мин 300 ирагъэхьын хуейщ. 

Къэбарт Мирэ.