Пушкиныр Къулъыкъужын Ипщэм «щохьэщIэ»

         Бахъсэн щIыналъэм хыхьэ Къулъкъужын Ипщэм и курыт еджапIэ №2-м иджыблагъэ щекIуэкIащ «Тхылъ псэу» тхылъаджэхэм я клубым и зи чэзу зэIущIэ. Иджырей пшыхьыр траухуат урысей тхакIуэ цIэрыIуэ Пушкин Александр и «Пиковая дама» (Цыхубз фIыцIэ) IэдакъэщIэкIым.

         ЕгъэджакIуэхэмрэ еджакIуэхэмрэ зэхаша зэIущIэр щIэщыгъуэу, гъэщIэгъуэну икIи удихьэхыу екIуэкIащ икIи ахэр зыщIэса пэшыр Пушкин Александр и таурыхъхэм къытращIыкIа сурэтхэмкIэ ягъэщIэрэщIат.

         ЕджакIуэ цIыкIухэм пшыхьым щагъэлъэгъуащ «Пиковая дама» повестым къытращIыкIа теплъэгъуэ хьэлэмэтхэр, иужькIэ псори зэгъусэу тепсэлъыхьащ тхакIуэ цIэрыIуэм и IэдакъэщIэкIым, ар зытеухуам, езыхэм къазэрыщыхъуам, абы гупсысэу хэлъым.

         Пушкин Александр и тхылъым тепсэлъыхьын щагъэта нэужь пшыхьыр игъэдахэу къызэхуэсахэм я пащхьэм уэрэд зыбжанэ щыжиIащ Налшык къалэм дэт КъБР-м МэкъамэмкIэ и къэрал театрым и уэрэджыIакIуэ Абей Рустам. Абы игъэзэщIахэм ящыщщ Рахманинов Сергей и «Алеко» оперэм и уэрэд пычыгъуэмрэ Пушкин Александр и «Цыджанхэр» поэмэм къытращIыкIа уэрэдымрэ.

         Пшыхьыр зэхуащIыжу къызэхуэсахэм ягъэзэщIащ тхакIуэ цIэрыIуэ Чехов Антон и «Драма на охоте» повестым къытращIыкIа «Мой ласковый и нежный зверь» кинофильмым хэта вальсымкIэ.

          «Тхылъ псэу» тхылъаджэ клубым и дамыгъэ лъапIэхэр иужьым иратащ пшыхьым жыджэру хэта еджакIуэ цIыкIухэм.

                                                               ХЬЭЩЫКЪУЕЙ Олег.