КъБР-м щыIэ МВД-м къет

17 августа, 2021 - 10:27

ДыгъуакIуэр яубыдащ

 
Урысей МВД-м Налшык къалэм щиIэ Управленэм 2021 гъэм шыщхьэуIум и 6-м зыхуигъэзащ илъэс 50 зи ныбжь, Толстойм и уэрамым тет сату щIыпIэхэм я зым и лэжьакIуэм. ЦIыхубзым зэрыжиIамкIэ, а махуэм абы и бохъшэм дэкIуэдыкIащ сом 7500-рэ. Бохъшэр тыкуэнтетыр зыбгъэдэт стIолым деж телъащ, пэшым щэхуакIуэхэр щIэтащ. 
Къэлъыхъуэныгъэ Iуэхухэр щрагъэкIуэкIым хабзэхъумэхэм яубыдащ шэч зыхуащIыр. Ар Iуащхьэмахуэ районым щыпсэу, илъэс 54-рэ зи ныбжь цIыхубзырщ. Абы зиумысыжащ илэжьамкIэ, жиIащ тыкуэным щIэту стIолым бохъшэ зэрытелъым гу зэрилъытар. Сату зыщI цIыхубзыр зэрыIукIар къигъэсэбэпщ, ахъшэр къищтэри, тыкуэным къыщIэкIыжащ.
Урысей МВД-м Налшык къалэм щиIэ Управленэм полицэм и къудамэ №1-м СледствэмкIэ и IэнатIэм шэч зыхуащIым теухуа уголовнэ Iуэху къиIэтащ, УФ-м и Уголовнэ кодексым и 158-нэ статьям и 2-нэ Iыхьэм къыщыхьа щIэпхъаджагъэр илэжьауэ шэч хуащIу.
 

НаркотикхэкIхэр къытрах

Прохладнэ, Тэрч районхэм я полицейхэм цIыхуитIым афиянхэкI килограмм ныкъуэм щIигъу къытрахащ. 
Мы гъэм шыщхьэуIум и 10-м хабзэхъумэхэм Урысей МВД-м и «Прохладнэ» къудамэм полицэм и плъыр-пост къулыкъум и лэжьакIуэхэр ящIыгъуу, Алътуд къуажэм къыщагъэувыIащ нэхъапэм суд зытращIыхьауэ щыта, илъэс 37-рэ хъу цIыхухъур. Абы иIыгът къэкIыгъэмэ къызыхих вещество зэрылъ хъуржын. 
Экспертизэм къызэригъэлъэгъуамкIэ, къытрахар грамм 201.1-рэ хъу марихуанэ наркотикхэкIщ. 
Урысей МВД-м Тэрч районым щиIэ къудамэм и лэжьакIуэхэм КъБР-м щыIэ МВД-м и «Гром» гуп хэхар я щIэгъэкъуэну, абыкIэ хуитыныгъэ яIэу Тэрч къалэм щыпсэу, нэхъапэм суд зытращIыхьауэ щыта, илъэс 57-рэ зи ныбжь цIыхухъум и лъапсэр шыщхьэуIум и 11-м къыщащым, абы и хьэщпакъымрэ щIыунэмрэ къыщагъуэтащ къэкIыгъэмэ къызыхих вещество зэрылъ хъуржын, апхуэдэуи абы ещхь пкъыгъуэ зыкIуэцIылъ тхылъымпIэ шыхьауэ 2. 
Экспертхэм къызэрагъэлъэгъуамкIэ, къытраха зэкIуэцIышыхьахэмрэ хъуржынымрэ илът гр. 339,61-рэ хъу, марихуанэ жыхуаIэм хуэдэ афиянхэкI. 
ЦIыхухъур яубыдащ УФ-м и УПК-м и 11-нэ 91-нэ статьям ипкъ иткIэ. 
СледствэмкIэ къудамэхэм тIуми ехьэлIа уголовнэ Iуэху къаIэтащ УФ-м и УК-м и 228-нэ статьям и 2-нэ Iыхьэм ипкъ иткIэ (хабзэм къемызэгъыу наркотикхэкIхэр зыIэрыгъэхьэн, хъумэн, гъэIэпхъуэн, гъэхьэзырын, елэжьын). 
 
 
 
 
 
 
Дыгулыбгъу Жантинэ.
  • 19 просмотров
Поделиться: