Куэдым фIыуэ ялъагъу МузыкэмкIэ театрым и солист, зи макъ дахэм ди республикэм щыпсэу куэд дихьэха, КъБР-м щIыхь зиIэ и артист Абэнокъуэ Рустам.
Тэрч щIыналъэм хыхьэ Борыкъуей къуажэм дэт курыт еджапIэр къызэриухыу Абанокъуэр ГъуазджэхэмкIэ Кавказ Ищхъэрэ институтым щIэтIысхьауэ щытащ. Уэрэд жыIэнымкIэ къудамэм илъэсиплIкIэ щеджауэ абы и щIэныгъэм щыпищащ Саратов дэт консерваторэм. Ар къиуха иужь уэрэджыIакIуэ щIалэщIэр Москва кIуэри, абы и къару щеплъыжащ. Котельники дэт «Белая дача» щэнхабзэмкIэ уардэунэм и художественнэ унафэщIу, къищынэмыщIауэ, Назаров Владимир и музыкэ театрым, Александровым и хор цIэрыIуэм щылэжьащ. Абэнокъуэм и зэфIэкIым зегъэубгъунымкIэ IэмалыфIхэр къыхукъуэкIырт, ауэ адыгэ псалъэжьым зэрыжиIэщи, «Бланэ щалъху мэкIуэж». 2010 гъэм Рустам нэхъ къищтащ къыщалъхуа щIыналъэм къигъэзэжу абы и сэбэп иригъэкIмэ.
Налшык къалэ дэт Музыкэ театрым щылэжьэн зэрыщIидзэрэ абы игъэзэщIащ Трубадур («Бременские музыканты»), Генерал («Сказка про Федота-стрельца»), Карабас («Буратино») сымэ я ролхэр, нэгъуэщI куэди. И лэжьыгъэм, дяпэкIэ и мурадхэм теухуауэ щытащ ди зэпсэлъэныгъэри. И IэщIагъэр къызэрыхихаращ япэу дызыщIэупщIар.
- А упщIэр къыщызаткIэ, сыт щыгъуи яжызоIэ си IэщIагъэм езым сыкъыхихауэ къызэрыслъытэр. Сэ абы куэдрэ къыпэскIухьащ, ауэ сыпэлъэщакъым (мэдыхьэшх). Ди къуажэм дэт ЩэнхабзэмкIэ унэм и лэжьакIуэ Алшагъыр Ритэ 4-нэ классым сыщIэсу макъамэм сызэрыхуэтхьэкIумафIэр зэрымыщIэкIэ къихутэри, абы игъэлажьэ гупжьейм сыхигъэхьэн папщIэ хузэфIэкI къигъэнакъым. Сыкъыщыхутемыгъэхьэм, си адэ-анэм епсалъэри, Iэпэдэгъэлэл пщIы мыхъун зэфIэкIхэр макъамэм зэрыщызиIэр я фIэщ ищIат. Апхуэдэ щIыкIэкIэ, ди классым щIэс хъыджэбз цIыкIухэм я гъусэу, уэрэд жыIэнымкIэ гупжьейм щхьэхуимыту кIуэн щIэздзат. Зыкъэзумысыжынщи, япэ дерсхэм сыкIуатэкъым, уэрэд жызмыIэн щхьэкIэ сыти къэзгупсысырт. Абы яужь Алшагъырым и чэнджэщкIэ си адэм Тэрч къалэ дэт макъамэмкIэ сабий школым сишати, къызэдэIуэну зызыгъэхьэзыра егъэджакIуэхэм я пащхьэм зыри щахужысIатэкъым. ИкIэм - икIэжым Ритэ и ерыщагъыр текIуэри, уэрэд жыIэным сыдригъэхьэхат. 6-нэ классым сыщIэсу «Батыр» зэпеуэм сыхыхьэри ди школым япэ увыпIэ, щIыналъэм - етIуанэ увыпIэ къыщысхьат. А зэпеуэм сыхэту гу къыслъызыта Пшыншэ Хьэлым (КъБР-м щэнхабзэмкIэ щIыхь зиIэ и лэжьакIуэщ) куэдкIэ сэбэп къысхуэхъуащ. Курыт еджапIэр къэзухыху Пшыншэм деж сыщеджащ, абы уэрэд жыIэным и мызакъуэу, гъуазджэм и дунейм цIыхуу укъызэрыщынэным и щэхухэми сыхуигъэсат.
Курыт еджапIэр къыщызухым сэ хьэкъыу сщIэрт «щхьэхуимыту» къыхызагъэха IэнатIэм сызэрыхуеджэнур. Арати, 2000 гъэм ГъуазджэхэмкIэ Кавказ Ищхъэрэ институтым сыщIэтIысхьэну тезухуащ. Урысейм и цIыхубэ артисткэ Гъэсашэ Наталье экзаменхэр щытIихым, си уэрэд жыIэкIэм едаIуа иужь, езым и деж сыщеджэну сыкъищтауэ щытащ.
ИлъэсиплIрэ ныкъуэкIэ сыщIэсащ институтым. А пIалъэм си насып кърихьэкIри сольфеджиомрэ пшынэмкIэ Хьэсанэ Мусэ сригъэджауэ щытащ. А цIыху телъыджэм и зэфIэкI лъагэхэм гъуазджэм и нэIуасэ дэтхэнэри щыгъуазэщ. ЕгъэджакIуэр зыхуеину ткIиягъыр, щIагъыбзэр, гушыIэ дахэр, пэжыр зи гъуазэ, зэхэщIыкI ин зыхэлъ цIыхут ар. СэркIэ Хьэсанэр цIыху ныкъусаныгъэншэт, икIи сыт и лъэныкъуэкIи абы ещхь сызэрыхъуным сыхущIэкъурт.
Къызэрыхэзгъэщащи, уэрэд жыIэным сыхуезыгъэджар Гъэсашэ Натальещ. Абы хэлъ щэхухэм сыщыгъуазэми, сызыхурагъэджар цIыхубэ уэрэдхэрати, академическэ жыIэкIэм, оперэр, ариер, романсыр зищIысыр сигъэщIащ. Гъэсашэр къызэрымыкIуэу зэфIэкI ин зиIэ уэрэджыIакIуэщ, езым бгъэдэлъ щIэныгъэр гурыIуэгъуэу цIыхум бгъэдэзылъхьэфщ.
- Роль бгъэзэщIахэм ящыщу нэхъ уигу къинэжахэм я гугъу уэзгъэщIынут.
- ЗгъэзэщIа роль псори зэхуэдэу фIыуэ солъагъу. Сэ сызэреплъымкIэ, артистым дежкIэ къылъыса ролыр нэхъыщхьэрэ къызэрыгуэкIкIэ игуэшын хуейкъым, дэтхэнэри и зэфIэкI емыблэжу утыкум екIуу щигъэлъэгъуэн, и къалэным хыхьэ псори къанэ щымыIэу игъэзэщIапхъэщ. Ролым и мызакъуэу, театрым и лэжьыгъэр зэрыщыту апхуэдэущ зэрыщытыпхъэр. Сыхьэтым и щIыкIэм ебгъэщхь хъуну къысщохъу театрыр: и зы Iыхьэ къэтмэ, лэжьыгъэр къэувыIэнущ. Си псэм нэхъ фIэфI ролхэм я гугъу пщIымэ, апхуэдэщ сэркIэ хьэл мыхъумыщIэ, ныкъусаныгъэ зыхэлъ лIыхъужьхэр. А ролхэр псэкIэ спэгъунэгъуу схужыIэнукъым. МыхъумыщIагъэм къишэ лейр, псалъэ жагъуэм цIыхугур зэрыриудыр, Iейм Iей къызэрыпэкIуэр къэзгъэлъэгъуэну сыхуейуэ аращ. ЕпцIыжыныгъэм и гуащIагъыр, нэпсейм и хьэлыншагъэр, нэгъуэщI хьэл гуемыIухэр къэзгъэлъагъуэкIэрэ, апхуэдэ цIыхухэм, хьэлым гущыкI хуезгъэщIынырщ сызыхущIэкъур. Зы цIыхум нэхъ мыхъуми а гупсысэр и гум къыщыхъуэпскIмэ, ролыр къызэхъулIауэ къэслъытэнущ.
- Уи репертуарым хэт уэрэдхэм укъытхутепсэлъыхьын?
- Си репертуарым езым си уэрэд зэрыхэмытым, уэрэджыIакIуэ цIэрыIуэхэм ейхэр зэрызгъэзащIэм абыхэм я жьауэм сыкъыщIэнэнкIэ шынагъуэ зэрыщыIэр мызэ-мытIэу къызаIуэкIащ, ауэ сэркIэ апхуэдэхэм я жьауэ сыщIэтыныр пщIэшхуэщ. Сэ жысIэ уэрэдхэм мыхьэнэ ин яIэщ, хуабагъэшхуэ яхэлъщ, гупсысэкIэ гъэнщIащ. Магомаев Муслимрэ Бабаджанян Арнорэ зэгъусэу ягъэзэщIахэм лIэщIыгъуэ псом щIэлъ хуабагъыр къащыхуэгъэлъэгъуащ. Абыхэм ирагъэжьа Iуэхум къыпысщэным, зымащIэкIэ нэхъ мыхъуми абы щыщ Iыхьэ сыхъуфыныр сэркIэ насыпщ.
- Уи мурадхэмкIэ укъыддэгуэшамэ ди гуапэт.
Иджыпсту си мурадхэм сатепсэлъыхьыну сыхуейкъым. Шэч хэмылъу ахэр куэд мэхъу, ауэ мы зэманым сэркIэ нэхъыщхьэр си лэжьыгъэм и щэху нэхъыбэ згъэунэхунырщ, илъэс 20 - 30 хуэдиз дэкIмэ, уэрэджыIакIуэ ныбжьыщIэхэм чэнджэщ щхьэпэ естыфын, гъуэгу захуэ тезгъэувэфын хуэдэу.
