Iуэхум и къежьапIэр

ХьэтIохъущокъуэм и жыг хадэм накъыгъэм и 27-м щекIуэкIынущ «скандинав зекIуэкIэмкIэ» урысейпсо спорт акцэм и япэ республикэ теуэгъуэр.

Фигу къэдгъэкIыжынщи, «скандинав зекIуэкIэр» Урысейм  къыщащта спорт лIэужьыгъуэхэм 2019 гъэм хагъэхьащ, цIыхум я узыншагъэр егъэфIэкIуэнымкIэ зэрысэбэпыр къалъытэри. АтIэ сыт хуэдэу спортым хущыт ар къэзыгупсысыжа скандинав къэралхэр?

Норвегием и закъуэ къэтщтэнщи, абы щыпсэухэр спортым зэрыхущытым гъэщIэгъуэныщэу тетхыхьауэ щытащ урысей журналист Песков Василий.

ЦIыху мин щэ бжыгъэхэр щыпсэу Ослэ къалэр «бауэу» пщIэнукъым тхьэмахуэ махуэхэм. Ныбжь зиIэхэр (илъэс 70 - 75-рэ хъухэр) щIалэгъуалэр, сабийхэр зи гъусэ адэ-анэхэр - псори дунеяплъэ йожьэ. ЩIымахуэм ахэр лыжэм тетщ, дунейр щыхуабэм, башитIыр яIыгъыу, километр 50 - 60-р махуэ щапхъэу якIу. А гъуэгуанэр, щхьэж зэрыхуейуэ, хэти хуэму, хэти псынщIэу  зэпеч. Уэлбанэ е щIыIэ къатехъуэрэ - а Iуэхум хуэщIа унэ цIыкIухэм дэнэкIи ущрохьэлIэ, ирехъу ар мэзылъэ, гъуэгубгъу, псы Iуфэ. Абыхэм я дэтхэнэми гъуэгурыкIуэм къыщигъуэтынущ хьэкур зэригъэплъын пхъэ къута, мафIэдз, шэху уэздыгъэ - ухуеймэ нэху къыщекI.

Спортым гулъытэ ин хуэзыщI скандинавхэм я деж къыщыбгъуэтынущ сыт хуэдэ лыжэ, баш лIэужьыгъуэхэри. Норвегием фIэкIа зы къэрал дунейм теткъым  а спорт лIэужьыгъуэхэм ехьэлIа Iэмэпсымэхэм я музей здэщыIи. Бгымрэ гуэлхэмрэ я щIыпIэу къалъытэ Скандинавием лыжэмрэ къызэракIухь башымрэ щIэупщIэ щаIэщ икIи дуней псом къапэхъун темыту егугъуу ящI. Ахэр къызыхащIыкIыр а щIыналъэхэм куэду къыщыкI пхъэхуейхэмрэ, шэд гуарцэм  (торф лъащIэм) илъэсищэ бжыгъэкIэ щIэлъурэ гъущIым хуэдэу быдэ хъуа гикори пхъэ лIэужьыгъуэмрэщ.

Ди республикэми увыпIэ хъарзынэ щигъуэтащ скандинав къэкIухьыкIэмкIэ спортым. Абы дихьэххэм я бжыгъэм къызэрыхэхъуэр нэрылъагъуу, ахэр щыплъагъунущ къалэм и паркхэмрэ лъэс зекIуапIэхэмрэ. ЕкIуэкIыну акцэм цIыху куэд зэрыхэтынум шэч хэлъкъым.

Шэрэдж Дисэ.