«Sabah» тырку газетым и еплъыкIэ

УФ-м и лIыкIуэу Анкара щыIа Карлов Андрей 2016 гъэм езыгъэукIауэ щытар, зэрыхуагъэфащэмкIэ, Алсанджак Темельщ. Ар США-м и Техас штатым щопсэу. Апхуэдэ тхыгъэ къытехуащ «Sabah» тырку газетым. А газетым зэрыжиIэмкIэ, Алсанджак Темель компание нэпцIу плIы тыркум къыщызэригъэпэщащ. Ахэр лIыукI Iуэхум хэтынымкIэ сэбэп хъуахэщ.

Газетым къызэрыхигъэщымкIэ, Алсанджакыр тырку тхакIуэ Гюлен Фетхуллах 1970 гъэм къызэригъэпэща зэгухьэныгъэм - ФЕТО зыфIащам хэтащ. Тыркум и къэрал унафэщIхэм зэрыхуагъэфащэмкIэ, а Гюленыр хущIэкъуащ 20I6 гъэм къэралым зэхъуэкIыныгъэ къыщигъэхъуу, властыр иубыдыну. ФЕТО гупыр къэралым къилъытащ террорист зэгухьэныгъэу. Къыхэгъэщыпхъэщ Алсанджак Темель щыпсэу Далласым щиIэ и виллэм и уасэр доллар мелуан 1,2-м зэрынэсыр.

Гюлен жеIэ Тыркум властыр щытедзыным ехьэлIа Iуэхухэм зыкIи хэмытауэ, икIи абы хуегъэфащэ Эрдоган къэрал аппаратымрэ дзэмрэ «игъэкъэбзэн» папщIэ апхуэдэ зэхъуэкIыныгъэ нэпцIыр къызэригъэпэщауэ.

«Sabah»-м зэрыжиIэмкIэ, Алсанджак Темель къызэригъэпэща компание нэпцIхэм ФЕТО зэгухьэныгъэм хэтхэм Iэмал яритащ США-м и визэ къыдахыну. Компаниеу 4-м щыщу 2-р зэхуищIыжащ.

Газетым къызэрыхигъэщымкIэ, 2016 гъэм дыгъэгъазэм и I6-м, Карловыр яукIыным и пэ махуэ зыбжанэ къихуэу, Тыркум и лъэпкъ тIасхъэщIэх зэгухьэныгъэ «MIT»-м и офицер Акалын Кюршард УФ-м и лIыкIуэр дэнэ кIуэми, гюленистхэм абыкIэ хъыбар яригъащIэу щытащ. Аращ Карловыр зыукIа Алтынташ Мавлют Iуэхум хуэзыгъэхьэзырари. Акалыныр яубыда нэужь, илъэс 15-кIэ щысыну суд тращIыхьащ. Зи гугъу тщIы укIыгъэр къызэгъэпэщыным хэтащ Анкара Тургут Озал и цIэр зэрихьэу дэт университетым и лэжьакIуэ Карат Демалрэ хъыбарегъащIэ технологие зэпыщIэныгъэхэмкIэ IуэхущIапIэу Тыркум щыIэм и къулыкъущIэ Баджэ Хъусенрэ.

 УкIыгъэр къызэзыгъэпэщыну зи пщэ далъхьа Карат Демал игъэзэщIэн хуей унафэм ехьэлIа хъыбарыр Iэригъэхьэу щытащ «Today`s Zaman» газетым и журналист Бозкурт Абдулэхь. Апхуэдэуи, а Iуэхум хэтауэ «Sabah»-м етх Массачусетс дэт технологие университетым щылажьэ тыркуитIи.

Sabah-м къытехуа тхыгъэм и гугъу зэрыщищIымкIэ, ФЕТО-м и къалэну щытар террорист зэгухьэныгъэхэм УФ-м и лIыкIуэр зэраукIар тырку унафэщIхэм ярипхыу, Урысеймрэ Тыркумрэ зэхуаIэ зэпыщIэныгъэр къызэпиуду, къэралитIым я зэхуакум зауэ къыдилъхьэнырщ.

Карлов Андрей «Урысейр Калининград къыщыщIэдзауэ Камчаткэм нэскIэ» сурэт гъэлъэгъуэныгъэ Анкара къыщызэрагъэпэщар къызэIуихыну кIуауэ, гуузу щаукIауэ щытащ дыгъэгъазэм иI9-м Карловыр зыукIа, полицэм и лэжьакIуэ Алтынташ Мевлют абдеж дыдэм хабзэхъумэхэм щаукIыжащ. А укIыгъэр къызэзыгъэпэщауэ хуагъэфащэ цIыхуитхум игъащIэкIэ тутнакъэщым исыну, цIыхуихым илъэситхум къыщыщIэдзауэ илъэсибгъукIэ щысыну унафэ тращIыхьащ202I гъэм и гъатхэпэм.