1
Зы щакIуэ мэз лъапэм техьауэ, мэзым зы бланэ къыхэжащ. «Бланэр тхьэм къызитащ», - жери щакIуэм и шабзэр зэIуидзащ. ЩакIуэм и шабзэр зэIуидза къудейуэ, мэзым зы шу къыхэжащ, бланэм къыкIэлъысри, зэ уэгъуэм и пIэ къригъэкIакъым. Шур епсыхри, бланэм бгъэдэуващ.
Шум бланэр зэIихыху, щакIуэр лъэныкъуэкIэ щытащ.
Бланэр зэIихри, шур щакIуэм къеджащ:
- Мыдэ къакIуэт, - жери.
Шум блатхьэр къыщIигъэхури, щакIуэм къыхуигъэтIылъащ.
ЩакIуэм блатхьэр къыхуэIэтакъым.
- Нартхэ ди ужь къихъуэнум гуащIэ яIэжынукъым къыджаIэрти, си нэгу щIэбгъэкIащ, - жиIащ шум. - Уэ пхуэдэ защIэ ди ужь къихъуэнур?
- Схуэдэщ, - жиIащ щакIуэм. - Уэ усыт лъэпкъ?
- Сынарт лъэпкъщ, - жиIащ шум. - Нарт ШукIасэ слъэгъуащ жыпIэмэ, ущыуэнукъым.
Шум блатхьэр щакIуэм и шыплIэм къыдилъхьащ. ЩакIуэм и шыр блатхьэм игъэтIысащ.
- Мыр шы пхуэхъункъым, щIалэфI, - къыжриIащ шум. - Си лъэужьым урикIуэмэ, шы пхуэхъун уэстынщ. Си лъэужьыр илъэсиблкIэ кIуэдыжынукъым.
Бланэм и лыр фэм кIуэцIишыхьыжщ, и шыплIэм дилъхьэри, нарт шур мэзым хыхьэжащ.
2
Зы щIалэ хьэжэбажащэ ежьауэ зылI ирихьэлIащ. ЛIым бланэ къиукIауэ зэIихырти, бгъэдыхьэн ирикуакъым. КIэлъыплъурэ, лIым бланэр зэIихащ, лыр фэм кIуэцIишыхьыжщ, и шыплIэм дилъхьэри шэсыжащ.
«Мыр здэкIуэм сеплъынщ», - жери щIалэр лIым и ужь иуващ.
КъызэплъэкIри, щIалэм гу къылъитащ лIым. Гу къыщылъитэм, шыр къыжьэдикъуэри, щIалэм къеджащ:
- Мыдэ къакIуэт, щIалэфI, - жери.
ЩIалэр лIым бгъэдыхьащ.
- ЩакIуэм я хабзэщ, - лIым блатхьэр къыщIигъэхури, гъуэгум къытрилъхьащ.
ЛIыр ежьэжащ. ЕIэбыха щхьэкIэ, щIалэм блатхьэр къыхуэIэтакъым. КъыщыхуэмыIэтым, лIым къигъэзэжри, блатхьэр щIалэм и шыплIэм къыдилъхьащ.
- Хэт ухуэза жаIэмэ, хэт и цIэ исIуэнур? - еупщIащ щIалэр лIым.
- Нарт ШукIасэ сыхуэзащ яжеIэ. Нартым я ужь къинар сэращ.
Ар къыжриIэри, лIыр ежьэжащ, итIани, шыр къыжьэдикъуэжри, щIалэр зыбгъэдишащ.
- Сызыхуейуэ укъызихьэлIащ, - къыжриIащ лIым. - Сэ зы гъэщ къысхуэнэжар - си гъащIэр сухащ. Зы гъэ дэкIмэ, мыпхуэдэ щIыпIэм некIуалIи, сыщIэлъхьэж.
ЛIымрэ щIалэмрэ зэбгъэдэкIыжащ. Зы гъэ дэкIри, щIалэр лIым къыхуигъэлъэгъуа щIыпIэм кIуащ, ШукIасэ лIауэ ирихьэлIэри, и хьэдэр абдеж щыщIилъхьэжащ.
ШукIасэ и кхъащхьэкIэ йоджэ иужьрей нартыр щыщIалъхьа Iуащхьэм. Iуащхьэр Щхьэгуащэ псыхъуэ дэтщ.
