Псысэ телъыджэхэр зытхар

Андерсен Ганс Кристиан дуней псом щыцIэрыIуэ тхакIуэщ. «Гадкий утёнок», «Принцесса на горошине», «Снежная королева», «Дюймовочка» псысэхэр хэти ецIыху. И тхыгъэхэр бзи 150-кIэ зэрадзэкIащ икIи абыхэм я щIэщыгъуагъыр зэи икIыркъым. Андерсен къигъэщIа лIыхъужьхэр жьыми щIэми яцIыху.

Хэт ар езыр - Андерсен? И сабиигъуэр къызэрыгуэкI унагъуэм щыкIуащ. И адэр вакъэщIыжт, и анэр жьыщIакIуэт. Литературэр езыгъэцIыхуар и адэрщ. Къыхуеджэрейуэ щытащ «Жэщ 1001-рэ» шыпсэм.

Илъэс 14-м иту ар Копенгаген кIуат, актеру еджэну. Ауэ ар актер хъуакъым, атIэ дуней псом щыцIэрыIуэ тхакIуэ къыхэкIащ.

Андерсен Ганс Кристиан итхырт усэхэр, романхэр, повестхэр, балладэхэр. Ауэ псом хуэмыдэу цIэрыIуэ зыщIар и таурыхъхэрщ. Таурыхъи 156-рэ и Iэдакъэ къыщIэкIащ.

Нало Заур зэридзэкIауэ «Принцессэр джэш хьэдзэм зэрытесар» таурыхъ щIагъуэм дыкъевгъаджэ!

ГУГЪУЭТ Заремэ.

Принцессэр джэш хьэдзэм зэрытесар

Еуэрэ-еуэрэт, жи зы принц, пащтыхьыкъуэ, псэути, абы игу къохьэ принцессэ, пащтыхьыпхъу, къишэну, ауэ принцессэ нэс фIэкIа идэрткъым. Мы дуней псор къикIухьащ абы, итIани игу ирихьын хуэдэ къэшэн игъуэтакъым. Принцессэр гъунэжт, ауэ принцессэ нэсымрэ нэпцIымрэ хузэхэгъэкIыртэкъым. Псоми зыгуэр къахуэтт. Арати, принцым и щхьэр къыфIэхуауэ къэкIуэжащ – принцессэ нэсым Iейуэ хуэпабгъэрт ар.

Йоуэри, зы пщыхьэщхьэ гуэрым уэлбанэ къохъу: уафэр мэгъуагъуэ, уафэр мэхъуэпскI, уэшхыр уридэкIуеину къошх.

А зэманым къалэ куэбжэм зыгуэр къытоуIуэри, пащтыхьыжьыр макIуэ Iуихыну.

Iуехри - куэбжэпэм принцессэ щытт. Ауэ сызижагъуэн и махуэт абы и теплъэр. Уэшхыпсыр и щхьэцым къыпож, и бостейм къожэхри, и туфлъэ лъапэм толъадэр аби, лъэдакъэмкIэ йожэхыж. ИтIани абы принцессэ нэсу щиIуэжырт.

«Деплъынкъэ!» - игу къокI пащтыхь гуащэжьми, цIутI жимыIэу хъыджэбз лэгъунэм макIуэ. ГъуэлъыпIэм тепIэн –щIэлъыну илъыр къредзри, пхъэбгъу пцIанэм джэш хьэдзэ трелъхьэ, ар хьэуазэ уэншэку пщыкIутIым щIрегъэубыдэри, абы ящIыIужкIэ къауц уэншэку пщыкIутI гуэр трелъхьэж.

Мис а пIэм принцессэр хегъэгъуалъхьэри, нэху щыху хегъэлъ.

Пщэдджыжьым йоупщI: «Дауэ ужея?» - жеIэри.

- Ах, сыжея мыгъуэ сэ! - жи принцессэм. - Жэщ псом си набзыпэ зэтеслъхьакъым. Тхьэм ещIэ а си пIэм ныщIэхуар! Зы быдэ гуэрым сытелъти, си щIыфэр зэфэзэщу уфIыцIащ. Сызижагъуэн и махуэт ар!

Мис абдеж псоми къагуроIуэ ар зэрыпринцессэ нэсыр - хьэуазэ уэншэку пщыкIутIрэ къауц уэншэку пщыкIутIрэ щIэлъа пэтми, а джэш хьэдзэ закъуэр зыхищIащ. Апхуэдэ зыхэзыщIэнкIэ хъунур принцессэ нэсращ.

Мис итIанэ принцым къешэ ар - иджы шэч къытрихьэжыртэкъым абы принцессэ нэс къызэрыпэщIэхуам. Джэш хьэдзэр музейм иратауэ ноби щIэлъщ, ямыдыгъуамэ. Шэч къытумыхьэ мыр зэрыхъыбар пэжым!