Бзум уэрэд жиIэу

Бзум и уэрэд зэхихащ хэти… Ауэ хэт илъэгъуа бзум уэрэд жиIэу?! Апхуэди щыIэщ. Бзу уэрэдыр дунейм яригъэлъэгъуащ сурэттех Катрин Свобода. 2019 гъэм Audubon photography awards зэпеуэм щытекIуащ абы триха сурэт телъыджэр. Пщэдджыжьыпэм, США-м Вирджини штатым щыIэ Медоуз Хантли паркым щытрихащ сурэт щIагъуэр. Сурэтым щыдолъагъу бзуупцIэ дамэплъым бахъэ тхыпхъэхэр къызэрыжьэдэкIыр, ар хъурейуэрэ хьэуа щIыIэм зэрыхэкIуасэр. Катрин куэдрэ и ужь итащ бзум и бахъэр къызэрыщ сурэтыр трихыну. А щIыпIэм деж бзуупцIэм щытриха нэгъуэщI сурэтхэри иIэщ, Iубахъэр къимыщу. ИкIэм-икIэжым, къехъулIащ и мурадыр. Апхуэдэ сурэтыр тепхыныр насыпырыхьу къыщIэкIынущ. Ар елъытауэ щытыфынущ сытми: дунейм и щытыкIэм, хьэуам иIыгъ псыIагъэм, жьым и къепщэкIэм, дыгъэм… Сурэтым феплъынщи фыщIэупщIэнщ: абы уэрэд жиIэрэ е бахъэ къудей къыжьэдихурэ хэт зэхигъэкIа? АтIэ, уэрэдщ. Ари къахутащ. Бзухэм езыхэм я хьэл, гуфIэкIэ, къэфэкIэ, уэрэд жыIэкIэ яIэжщ. Сурэтым къищ бзуупцIэм уэрэд къызэрыришым щыхьэт тохъуэ абы и теплъэр: и дамитIри, и кIэри ину зэIухащ, и тэмакъыщIэр къигъэпщащ. Апхуэдэу бзухэм зыкъыщызэIуахыр уэрэд щыжаIэрщ. Щхьэ тхыпхъэ хъурейуэрэ къызэрыкIрэ бзум и Iубахъэр?! Абы и тэмакъыщIэм макъ къызэрыкI дазэ иIэщ - ар къызэIуихыпащи, Iубахъэр хъурей щIэхъури аращ. ГъэщIэгъуэнкъэ, бзум и макъамэри бджы мэхъу. МеданитI хуэдизкIэ узэдаIуэ зы макъамэ къэIугъуэр нотэ нэхъ кIэщIу тIурэ зы нотэ шэщIарэ мэхъу. Макъамэр компьютер программэм щIагъэувэри яджащ. 
Мыри гъэщIэгъуэнщ: зы бзуупцIэ дамэплъым къылъысу уэрэди 2-м щегъэжьауэ 8-м нэсыху хуогъэзащIэ. Бзум и дамэплъыр, хуей хъумэ, егъэпщкIуф.