Бахъсэндэсхэр спортым и телъхьэщ

Бахъсэн къалэм ЩоджэнцIыкIу Алий и цIэр зэрихьэу дэт курыт еджапIэ №2-м иджыблагъэ щекIуэкIащ стIолыщхьэ теннисымкIэ зэхьэзэхуэ. Абы кърихьэлIащ КъБР-м и Парламентым и депутат Бещто Артур, республикэм и Парламентым и ЩIалэгъуалэ палатэм хэтхэу Нэгъуей Арианнэ, АфэщIагъуэ Анзор, Къаскъул Аскэр сымэ, нэгъуэщIхэри.

Парламентым и ЩIалэгъуалэ палатэмрэ Бахъсэн къалэм и ЩIалэгъуалэ советымрэ я жэрдэмкIэ къызэрагъэпэща зэхьэзэхуэм и мурад нэхъыщхьэу щытар цIыхур спортым дегъэхьэхынырт, и узыншагъэр егъэфIэкIуэным, и Iэпкълъэпкъыр псыхьыным къыхуеджэнырт.
Курыт еджапIэм и унафэщI Нэгъуей Ахьмэд къызэхуэсахэмрэ спортсменхэмрэ псалъэ гуапэкIэ захуигъэза нэужь, зэпеуэм щIадзащ икIи ипэм щегъэжьауэ икIэм нэсыху гуащIэу икIи удихьэхыу ар екIуэкIащ. 
Зэхьэзэхуэм кърикIуахэр зэхалъхьэжа нэужь наIуэ къэхъуащ япэ увыпIэр Мыд Мухьэмэдин, етIуанэр Уэзы Аслъэн, ещанэр Джэдгъэф Ахьмэд сымэ къызэрахьар.
НыбжьыщIэ цIыкIухэм я деж япэ щыхъуащ Джэдгъэф Аленэ. Ерыжокъуэ Сулеймэн етIуанэщ, ещанэ увыпIэр Ерыжокъуэ Мансуррэ Ташу Ахьмэдрэ зэдагуэшащ. 
КъыхэжаныкIахэм медалхэмрэ щIыхь тхылъхэмрэ иратащ.