Тхьэщэрыпхъу и къуэмрэ и пхъумрэНартхэ я Тхьэщэрыпхъу зэтIолъхуэныкъуэу щIалэрэ хъыджэбзрэ игъуэтащ. Зэдэлъхузэшыпхъур гущэ зырызым хипхэри, Тхьэщэрыпхъу псыхьэ ежьащ. Я анэр щIэкIрэ пэт, хъыджэбз цIыкIур гущэм къыхэпсэлъыкIащ: - Си дэлъху цIыкIу, ди анэр псыхьэ ежьащ, шыпсэ къызжеIи, сытегъэу, - жери. Ар щызэхихым, Тхьэщэрыпхъу бжэщхьэIум къыщызэтеувыIащ: - Тхьэр къызэуи: мы зэхэсхыр сыт щIагъуэ! ЩIалэ цIыкIури къыхэпсэлъыкIащ гущэм: - Си шыпхъу цIыкIу, утезгъэун хьэмэ узгъэбэмпIэн? Тхьэщэрыпхъу и жьэр Iурыхуащ: - Зыр згъэщIагъуэурэ нэхъ щIагъуэжыр зэхэсхаи! Зэдэлъхузэшыпхъум я анэр унэм щIэкIри, пщIантIэм къыдэуващ: - Мы тIум жаIэм седэIуэнщ, – жери. ЩIалэ цIыкIур гущэм къыхэплъри, щхьэгъубжэм дэплъащ. - Сыт плъагъурэ? – къеупщIащ и шыпхъу цIыкIур. -Дыгъужьибгъу аргъуей куэпкъ бгъэдэсщи, яхуэшхыркъым – аращ слъагъур, – жиIащ щIалэ цIыкIум. - Дыгъужь шыр хъунщ, – къыпидзыжащ хъыджэбз цIыкIум. - Шыр-мышырми, илъэсищкIэ ягъэхъуа выр ираудри яшхащ, – жиIащ щIалэ цIыкIум. - Вы хъункъым, шкIащIэ цIыкIу хъунщ. - ШкIащIэ-мышкIащIэми, жыг лъабжьэм щIоувэри, жыгыщхьэм фIэлъ хъумбылэр ехъу. - Жыг хъункъым, чыцэ лъагуэ цIыкIу хъунщ. - Чыцэ лъагуэ цIыкIууи щIы: лIыр дэплъеймэ, и пыIэр щхьэроху. - ЛIы хъункъым, щIалэ цIыкIу хъунщ. - ЩIалэ цIыкIууи жыIэ: махуищэкIэ иратIыха псыкъуийм йоIэбыхри, псы кърех. - Махуэр махуэ кIэщI хъунщ. - Махуэр кIэщI-мыкIэщIми, пщэдджыжьым хъуакIуэ дэкIа танэр вы хъуауэ пщыхьэщхьэм къыдохьэж, – жиIащ щIалэ цIыкIум. - Ирикъункъэ узэрызгъэбэмпIар, си шыпхъу цIыкIу? Тхьэщэрыпхъу пщIантIэм дэкIащ, псыхьэ ежьати: - Тхьэм фIы къытхудигъакIуэ: зэрыхъун хъуауэ къалъхуащ зэдэлъхузэшыпхъур.
Поделиться:
Читать также:
17.05.2024 - 11:18 →
Къахьар Сосрыкъуэ ихьыжащ
16.05.2024 - 16:28 →
Бзэ тыншкIэ тхэуэ щытащ
15.05.2024 - 15:00 →
Я Лъахэ цIыкIу - «Прометей и лъахэ»
15.05.2024 - 12:44 →
ФIыуэ флъагъухэм закъевгъащIэ!
08.05.2024 - 13:05 →
ЩIэныгъэлI усакIуэхэр
|