ГТО-р къызэрапщытэ Iэмэпсымэхэр

 «Спортыр гъащIэм и мардэщ» къэрал проектым и гъэзэщIэным къызэщIиубыдэу 2019 гъэ лъандэрэ Къэбэрдей-Балъкъэрым щокIуэкI ГТО-м и мардэхэр къыщапщытэ спорт ухуэныгъэхэр зыхуэныкъуэхэмкIэ къызэгъэпэщыным ехьэлIа Iуэхугъуэхэр.

Апхуэдэу илъэс блэкIахэм Налшык, Нарткъалэ, Тэрч къалэхэм, Янтарное, Къулъкъужын Ипщэ, Жэмтхьэлэ, Каменномост къуажэм спорт утыкухэр ирагъэфIакIуэ. Дэтхэнэ зыми метр зэбгъузэнатIэ 300-м щIигъу къызэщIеубыдэ икIи ГТО-м и мардэхэр къызэрапщытэну тренажёрхэмкIэрэ иджырей IэмэпсымэхэмкIэ къызэгъэпэщащ, резинэ лъагъухэр тралъхьащ.  Утыкухэр жыджэру цIыхубэм къагъэсэбэп, зыгъэсэныгъэхэр щрагъэкIуэкI.

Утыкухэр зыхуэныкъуэхэмкIэ къызэгъэпэщыным мы гъэми йолэжь. Программэм ипкъ иткIэ ГТО-м и мардэхэр къыщапщытэн IэмэпсымэхэмкIэ къызэгъэпэща хъуащ Прохладнэ къалэри. Утыкур щагъэувынущ Комсомолым и цIэр зезыхьэ жыг хадэм ит стадионым. Абы щагъэувыну спорт-технологие Iэмэпсымэхэр Къэбэрдей-Балъкъэрым СпортымкIэ и министерствэм Урысей Федерацэм и адрей субъектхэми дэщIыгъуу къищэхунущ икIи игъэувынущ.