Къызэрырахьэжьэрэ 65-нэу

Металлургым и махуэ
 

Зи гугъу тщIы Iуэхур гъэлъэпIэн щыщIадзар Хрущёв Никитэ ди къэралым и Iэтащхьэу щыщытарщ. Ар щытета илъэсхэм ящыщу I957 гъэм СССР-м и Совет Нэхъыщхьэм и Президиумым и унафэкIэ Металлургым и махуэр хагъэунэхукIат. 

Къызыхахари гурыIуэгъуэт. Хэку зауэшхуэм и лъэхъэнэм ди къэралым и экономикэм хэщIыныгъэ ин игъуэтат. Ар зэтегъэувэжынымрэ зэрыщытам нэхърэ нэхъ лъэщыжу зыкъегъэIэтынымкIэ металлургие промышленностым и мыхьэнэр зэрыин дыдэр къалъытэри, зэрыхаIэтыкI махуи абы хухахат. 
Совет Союзыр лъэлъэжа иужькIи, Металлургым и махуэр ди къэралым гъэлъэпIэн щыщагъэтакъым. ИкIи, къызэрырахьэжьэрэ 65-нэу, мы гъэми СНГ-м хыхьэ къэралхэм ящыщу гулъытэ хэха абы щыхуащI УФ-м, Беларусым, Къэзахъстаным.
Металлургым и махуэр зэдаIэт гъущI лIэужьыгъуэхэм ящыщу фIыцIафэ зытеуахэми, щхъуэкIэплъыкIэу ялъагъухэми хэлэжьыхьыжынкIэ Iэзэ IэщIагъэлIхэми, къырылъэ щIыпIэхэм пцIий къыщIэзых шахтёрхэми, нэгъуэщIхэми. 
Ди гуапэ зэрыхъунщи, металлургие промышленностым телажьэ IуэхущIапIэхэр дызэрыт лъэхъэнэми ди къэралым щымащIэкъым. Абыхэм уащрохьэлIэ Челябинск, Магнитогорск, Старый Оскол, Липецк, Череповец хуэдэ къалэшхуэхэм, нэгъуэщIхэми. 
Металлургием мыхьэнэ ин щрат щIыналъэхэм а махуэм гуфIэгъуэ Iуэхухэр щыкуэдщ: абыкIэ яIэ ехъулIэныгъэхэр щагъэнэрылъагъу парадхэр ирагъэкIуэкI, спорт зэхьэзэхуэхэр, зэпеуэ зэмылIэужьыгъуэхэр щIыпIэ-щIыпIэкIэрэ къыщызэрагъэпэщ, IэнатIэм телажьэ заводышхуэхэм зыщрагъэплъыхь, мастер-классхэр щаухэс, IуэхущIапIэхэм IэмэпсымэщIэхэр щагъэув, гъуазджэм хуэIэзэхэм я IэдакъэщIэкIхэр щагъэлъагъуэ. 
Металлургым и махуэр гъэмахуэкум зэрырагъэхьэлIам и фIыгъэкIэ, гуфIэгъуэ Iуэхугъуэхэм я нэхъыбэр пщIантIэхэм, уэрамхэм, уеблэмэ щIыуэпсым нэхъ пэгъунэгъу утыку зэлъыIухаишхуэхэм щызэхашэ. Ауэ щыхъукIи, а Iуэхугъуэхэри ящыщщ махуэщIым хэтыну хуейхэм я бжыгъэр нэхъыбэж зыщIым.