NASA зэгухьэныгъэм (США) хуэлажьэ щIэныгъэлIхэм уахэ жыжьэм и зы плIанэпэм гу щылъатащ вагъуэ гуэрэнышхуэрэ абрагъуэу абдежым щызэхэт къэщIыгъэхэм (галактикэхэм) ящыщу тIур гъунэгъу дыдэ зэрызэхуэхъуам.
Телъыджэлажьэ ящыхъуа а Iуэхугъуэр зэрекIуэкIым астрономхэр зэман гуэркIэ кIэлъыплъащ ЩIым и хъуреягъыр езыр-езыру къэзылъэтыхь спутникхэм ящыщ зым хащIыхьа Хаббл телескопымкIэ.
ЩIэныгъэлIхэм къызэрахутамкIэ, уахэ лъащIэм щызэхуэкIуэж галактикэхэр «Антеннэ» зи фIэщыгъэ нэгъуэщI вагъуэ гуэрэным и гъунэгъущ. А тIур нэхъапэхэм хабжэрт уэгу жыжьэм нэхъ «зыщызымыхъунщIэ» къэщIыгъэ зэпIэзэрытхэм, абы къыхэкIыуи, ахэр нэхъ зрагъэщхьыр дыщыпсэу вагъуэ зэрыбыну ШыхулъагъуэкIэ дызэджэр арат.
АрщхьэкIэ, NASA-м иригъэкIуэкIа иужьрей къэхутэныгъэ-хэм къызэрагъэлъэгъуамкIэ, зи гугъу тщIы вагъуэ гуэрэнхэм «сабырафэ» етплъыныр абдежым къыщыдгъэнэжми хъунущ. Ар дэнэ къэна, щIэныгъэлIхэм гу зэрылъатамкIэ, зэхыхьэжын Iуэхур мы къэщIыгъитIым я дежкIэ хуабжьу «зыгъэсымаджэу» къыщIэкIащ.
Галактикэхэр гъунэгъу щызэхуэхъум, я зэхуаку къызэрыдэнамкIэ зи кIэн къимыкIа вагъуэхэу ящыщ дэтхэнэри ди Дыгъэм нэхърэ куэдкIэ нэхъ инхэр узыгъэгушхуэн хуэдизи къахэмынэу зэпкърыщэщащ. Абыхэм я пIэкIэ галактикитIым я «гухъум» къыдэунэхукIащ гъуэзыпшэ гуэрэну зыхэзыша лъагъуэ шынагъуэр. А «бажэкIэм» япэщIыкIэ плъыжьыфэ-дыщафэу, иужьым щIыхуфэ хъужарэ зыми хуумыгъэдэн теплъэ иIэу астрономхэм закъригъэлъэгъуащ.
ЩIым и хъуреягъыр къэзылъэтыхь спутникхэм хэт лъэщапIэхэм ящыщ зым хащIыхьа Хаббл телескопу ищхьэкIэ зи гугъу тщIам мыбы хуэдэ Iуэхухэр уахэ жыжьэм зэрыщекIуэкIым гу лъимытэнкIэ Iэмал иIакъым. ЩакIэлъыплъым, хьэршым галактикитI зэрыщызэхыхьэжыр къэзыгъэнаIуэ видео-теплъэгъуэхэр, нэхум и ультрафиолет спектрым къыхиубыдыкIахэр, трихащ.
ЩIэныгъэлIхэм къызэралъытэмкIэ, уэгу пхыдзам нэрылъагъуу зыщызэблэзыхъу плъыфэбэр и щыхьэтщ а щIыпIэм щызэрихьэлIа вагъуэхэр шынагъуэ дыдэу зэрыщызэжьэхэуэм, уеблэмэ абдежым «дыгъэщIэхэри» къызэрыщыунэхум.
Уахэ жыжьэм щызэжьэхэуа галактикитIу UGC 2369 нагъыщэмкIэ хагъэунэхукIар зыхиубыдэр астрономхэм «Овен» зыфIаща вагъуэ гуэрэн абрагъуэрщ. АтIэми, NASA-м щылажьэ щIэныгъэлIхэм зэрыжаIэмкIэ, мы тIур зэхыхьэжын щIадза къудейщи, мы зэманым ди нэгу къызэрыIуидзэм тетщIыхьмэ, кърикIуэну (е кърикIуа) псори дэркIэ зэрызэхэгъэкIа щыIэкъым. ИджыпстукIэ щыхьэт дызытехъуэр, ищхьэкIи зэрыщыжытIащи, я зэхуаку къыщыунэхуа «бажэкIэм» екIуэтэлIа «дыгъэхэр», хуей-хуэмейми, зэхигъэткIухьу зэрызыхилыпщIэрщ. Ауэ, а Iуэхур уахътэм апхуэдизу щыукъуэдиищащи, зэману текIуэдэнури, мыцIыкIуфэкIуу, илъэс мелуан зыщыплI къудейщ. КIэлъыплъхэм зэрыжаIэмкIэ, апхуэдиз дэкIа иужькIэщ, къэщIыгъитIыр зэхыхьэжыпэу зы галактикэм щыхуэкIуэжынури.
Мыр я гъуазэрэ щапхъэу, астрономхэм зэхагъэкIыну я мурадщ дыщыпсэу Шыхулъагъуэмрэ (Млечный путь) абы псом нэхърэ нэхъ къыпэгъунэгъу Андромедэмрэ къапэплъэр зыхуэдэри, сыту жыпIэмэ, мы иужьреитIри зэхыхьэжын IуэхукIэ зэхуеIэхэм ящыщщи. АрщхьэкIэ, абыхэм апхуэдэ къащыщыщIынкIэ хъунур, къызэрабжамкIэ, илъэс меларди 4 дэкIа иужькIэщ. А щIыкIэм тету къэунэхуну зыхуагъэфащэ галактикэщIэм астрономхэм, тIэкIу епэсэуами, цIэуэ фIащари гъэщIэгъуэнщ - «Млекомедэ».