ГукъэкIыж

Къардэн Мурат, спортсмен, Олимп чемпион:

 

    Мы гъэм илъэс плIыщIрэ тIурэ хъуащ ди къэралым и къалащхьэм щекIуэкIа Олимпиадэ-80-р зэрызыхуащIыжрэ. А зэманым телевиденэм нобэ хуэдэу, дауи, зиужьатэкъым, ауэ фIыцIэрэ хужьу фIэкIа къимыгъэлъагъуэми, экраным дыкIэрыпщIауэ дыкIэрыст, зэхьэзэхуэр зэрекIуэкIым зыри блэдмыгъэкIыу деплъыну дыхущIэкъуу. Сэ абы щыгъуэ си ныбжьыр илъэсибгъу хъуа къудейт, сышколакIуэт, къуажэм сыдэст. Ар щIыжысIэр, си сабиигъуэм и гукъэкIыж нэхъыфI дыдэхэм ящыщ зыщ ари аращ. Нобэми хуэдэу си нэгу щIэтщ штангист Варданян Юрэ Мэзкуу щекIуэкI Олимпиадэм рекорд зыбжанэ зэрыщигъэувауэ щытар. Хуабжьу дригушхуэрт зэхьэзэхуэр къыщызэIуахым Совет Союзым и бэракъыр иIыгъыну зыхуагъэфэща, алыдж-урым бэнэкIэмкIэ спортсмен цIэрыIуэ Балбошин Николай. Олимпиадэм къыдигъэцIыхуа спортсмен гъуэзэджэхэм ятеухуа тхыгъэхэр, сурэтхэр газетхэм къыхэдгъэжурэ блынхэм фIэддзэрт, абыхэм ещхь дыхъуныр ди хъуэпсапIэти.

ЕхъулIэныгъэ къыпхуэзыхьынур ерыщагъырщ
    Сыкъыщалъхуа Зэрэгъыж къуажэм и школым физкультурэмкIэ и егъэджакIуэ ГъуэплъащIэ Замир игъасэ гупым сыхагъэхьэн щхьэкIэ тхьэмахуэ енкIэ сылъэIуэн хуей хъуат. Абы щыгъуэм сэ сыдихьэхакIэт осетин бэнакIуэ цIэрыIуэ Андиев Сослъэн икIи 1976, 1980 гъэхэм ар Олимп чемпион щыхъуам сызэрыгуфIар пхуэмыIуэтэнт. Дэнэ щысщIэнт илъэс тIощI дэкIмэ апхуэдэ ехъулIэныгъэ сэри сиIэну.
Сэ икъусыкъужкIэ сахуэарэзыщ япэ лъэбакъуэр сэзыгъэчауэ къэслъытэ ГъуэплъащIэ Замири, си тренеру щыта Къалмыкъ Юри, си зэфIэкIыр зи фIэщ хъуа псоми. Налшык дыкъэIэпхъуа иужь, сэ зыхезгъэтхащ бэнэкIэмкIэ секцэм, ауэ сызыхэхуар сызыхуей бэнэкIэ хуитыракъым, атIэ алыдж-урым бэнэкIэращ. Зи нэIэ сыщIэхуа Лобжанидзе Владимир а спорт лIэужьыгъуэр фIыуэ сигъэлъэгъуащ, игъащIэ псокIэ зэрысхъуэжын щымыIэуи сищIащ.

ГуфIэгъуэ фыщымыщIэну
    Сабиигъуэ насыпыфIэ иIэну сыхуейщ дэтхэнэ зы сабийми. Я гъащIэр дахэу, я махуэр щIэращIэу, зыхуейм я Iэр техуэу, я адэ-анэм я жыIэм щIэдэIурэ зыхуэпабгъэр фIэкIыпIэ имыIэу къайхъулIэу дунейм тетынхэу сахуохъуахъуэ.

Зытхыжар БЛИЙ Даянэщ.
Поделиться: