Еханэ дыщэр зыIэрегъэхьэ

Къэбэрдей-Балъкъэрым щыщ лъагэу дэлъеинымкIэ спортсмен цIэры­Iуэ Ласицкене Марие пашэныгъэр ­щиубыдащ атлетикэ псынщIэмкIэ Урысей чемпионатым. 

Чувашием и щыхьэр Чебоксары ­къалэм мы махуэхэм щызэхэта зэ­хьэзэхуэм шэч къызытумыхьэн текIуэ­ны­гъэ къыщызыхьа ди лъахэгъум сантиметри 194-рэ къызэринэкIа нэужь и хьэрхуэрэгъухэм ящыщу къылъэ­щIы­хьэжын къахэкIакъым. АрщхьэкIэ мет­ритI лъагапIэм щхьэпрылъыну мурад зыщIа прохладнэдэсыр ерыщт икIи ещанэ бгъэдыхьэгъуэм ари зригъэхъу­лIащ. КъыкIэлъыкIуэу Къэбэрдей-­Балъкъэрым щыщ пщащэм лъагапIэр иригъэIэтащ сантиметр 204-кIэ, ауэ дуней псом щагъэува рекордыр зэкIэ ­къы­зэ­ринэкIыфакъым. 
Къэралым и чемпионатхэм къриу­быдэу иджырейр Ласицкене и дежкIэ еханэ (!) дыщэ медалщ. Марие Токио щекIуэкIа Олимп джэгухэм я чем­пионщ. ЦIыхухъухэми цIыхубзхэми ­ящыщу абы и закъуэщ дунейпсо чем­пионатищым я дыщэ медалхэр зы­Iэрызыгъэхьар. 
Махуэ зыбжанэ дэкIмэ Ласицкене ­Марие хэтынущ «Синяев Евгений и мемориал» зэхьэзэхуэу Брянск щекIуэ­кIынум.