Спартакиадэр йокIуэкI

Мы махуэхэм «ЕджакIуэхэм я XI гъэмахуэ спартакиадэ 2022». Абы и саугъэт нэхъыщхьэхэм спортсмен минипщIым нэблагъэ щIобэн. Жэпуэгъуэм и 2 пщIондэ зэхьэзэхуэм хэтынухэр щызэхьэзэхуэнущ спорт лIэужьыгъуэ 40-м.
Зэхьэзэхуэм хагъэхьа спорт лIэужьыгъуэхэр «Олимпиадэ-2024»-м къыщыгъэлъэгъуахэращ. Зэпеуэхэм я нэхъыбэр щекIуэкIынущ Мэзкуурэ Мэзкуу областымрэ, Спартакиадэм и къалэ нэхъыщхьэхэм ящыщщ Санкт-Петербургрэ Къэзанрэ.
ШыщхьэуIум и 20-26-хэм Тэтэрстаным щокIуэкI спорт бэнэкIэмкIэ зэхьэзэхуэхэр. Программэр алыдж-урым бэнэкIэмкIэ спортсменхэм къызэIуахынущ, абыхэм къакIэлъыкIуэнущ цIыхубзхэр, зэхьэзэхуэр бэнэкIэ хуитымкIэ спортсменхэм зэхуащIыжынущ.
Спартакиадэм хыхьэу дзюдомкIэ зэпэщIэтыныгъэхэр щышхьэуIум и 23-24-хэм а Тэтэрстаным и къалащхьэм щызэхэтынущ. Къэбэрдей-Балъкъэрым щыщу абы утыку къыщихьэнущ Мисиров Исмэхьил, Балъкъэр Алим, Циканов Ислъам сымэ.
КъыкIэлъыкIуэу теннисистхэр щызэхьэзэхуэнущ Салават къалэм. КъБР-м и цIэкIэ а спорт лIэужьыгъуэм зыкъыщагъэлъэгъуэнущ Битюцкая Иринэ, Дэхъу Дианэ, Котовэ Анастасие, Сундиевэ Елизаветэ сымэ.
Алыдж-урым бэнэмкIэ зэхьэзэхуэм хэтащ Урысей Федерацэм и щIыналъэ куэдым щыщ спортсмени 140-рэ. Я хьэлъагъ елъытауэ зыхэта гупхэм дыжьын медалхэр къыщахьащ Къэбэрдей-Балъкъэрым щыщ КIэблахъуэ Нодаррэ (кг 92-м нэблагъэ) Емкъуж Исмэхьилрэ (кг 48-м нэблагъэ). Ди щIалэхэр зэхьэзэхуэм хуагъэхьэзыращ Нэчо Сэфарбий, Мырзэкъан Заур, Умар Тимур сымэ.