Техник ныбжьыщIэхэм я зэпеуэ

Нало Заур и цIэр зэрихьэу Нарткъалэ дэт, Техник ныбжьыщIэхэм я станцым дыгъэгъазэм и 18-м щекIуэкIащ автомодель спортымкIэ «Iуащхьэмахуэ и кубокыр» къэхьыным теухуа зэхьэзэхуэр. А зэпеуэм хэтащ Осетие Ищхъэрэ - Аланием, Ставрополь крайм, КъБР-м щыщ ныбжьыщIэхэр. 

Япэ Iыхьэм – щхьэзакъуэ зэпеуэм щытекIуащ КъБР-м щыщ ныбжьыщIэхэр. Япэ увыпIэр къихьащ Соколов Алан, етIуанэ увыпIэр лъысащ Отаров Къурмэн-Алим, ещанэ хъуащ Шыгъушх Андемыркъан.
«Iуащхьэмахуэ и кубокыр» къэхьыным теухуа зэпеуэм и Iыхьэ псоми щытекIуауэ къалъытащ Соколов Алан. ЕтIуанэр Отаров Къурмэн-Алимщ, ещанэ увыпIэр Къудей Алихъан иубыдащ. 
И гъэсэнхэм зэхьэзэхуэм бжьыпэр зэрыщаубыдам ипкъ иткIэ «Iуащхьэмахуэ и кубокыр» къылъысащ Техник ныбжьыщIэхэм я станцым и гъэсакIуэ Гулэжын Тимур. ЕтIуанэ хъуахэщ Ставрополь крайм и спортсменхэр.
Мыпхуэдэ зэхьэзэхуэхэр гъэ къэсыху ирагъэкIуэкI, щIалэгъуалэ нэхъыбэ къызэрыхашэным яужь иту.