ЩIымахуэри лъэхъэнэ гъуэзэджэщ

Уэсым и дунейпсо махуэр щагъэлъапIэр щIышылэм и ещанэ тхьэмахуэ махуэрщ. Гъэ дызэрытым ар техуащ щIышылэм и 15-м.

Уэсым и дунейпсо махуэр (World Snow Day) хуэгъэзащ спорт лIэужьыгъуэу щIымахуэм щызэкIэлъагъакIуэхэмрэ гъащIэр жыджэру ехьэкIынымкIэ щхьэпэ IуэхущIафэхэмрэ гулъытэ хэIэтыкIа хуэщIыным. Ар къэгъэунэхунымкIэ жэрдэмыр 2007 гъэм къыхэзылъхьауэ щытар Лыжэ спортымкIэ къэрал зэхуаку федерацэрщ (Fédération Internationale de Ski - FIS).

ЩIы Хъурейм тет бгы лыжэ зыгъэпсэхупIэ псоми, Урысей Федерацэри хэту, а махуэр зэдагъэлъапIэ.

Зыгъэпсэхугъуэ махуэм трагъахуэ гуфIэгъуэ зэхыхьэхэм балигъхэри сабийхэри хэтщ, спортым зыдрагъэхьэхын, къэзыухъуреихь Iэхэлъахэм дахагъэу щыIэр зыхуэдэм гу зэдылъатэн папщIэ.

FIS зэгухьэныгъэм хэтхэм зэрагъэувам тету, мы махуэм «уэсым и фестиваль» зыфIаща гуфIэгъуэ зэхуэсхэри ирагъэкIуэкI, лъэрыжэкIэ, лыжэкIэ, сноубордкIэ къэжыхьынымкIэ зэхьэзэхуэхэу балигъхэри ныбжьыщIэхэри зрашалIэхэр къызэрагъэпэщ.

Мы Iуэхур япэщIыкIэ зэдащтащ къэрал 20-м. ЕтIуанэ илъэсым зи гугъу тщIы къэрал зэхуаку фестивалхэм хэтыну гупыж зыщIахэм я бжыгъэр 40-м нэблэгъат. ГъэщIэгъуэныр аращи, абыхэм «захезыгъэтхахэр» бгы лыжэ курортхэр лIэщIыгъуэкIэрэ здэщыIэ къэралхэм (Швейцарием, Финляндием, Норвегием, нэгъуэщIхэми) я закъуэтэкъым, атIэ, апхуэдэхэм «хуэчэм» хэгъэгухэри (псалъэм папщIэ, Венгриер, Япониер, Эстониер, уеблэмэ Пакистанри) къахыхьат.