Шабзэ
ШабзэкIэ уэным и чемпионат зэIуха Налшык къалэ щекIуэкIащ. А зэхьэзэхуэм хэтащ Кавказ Ищхъэрэ федеральнэ щIыналъэм, Ипщэ федеральнэ щIыналъэм къикIа спортсмен 80-м нэблагъэ.
Къэбэрдей-Балъкъэрым и шабзауэхэр а зэхьэзэхуэм щытекIуащ. Япэ увыпIэр яубыдащ Щоджэн Сэлимэ, ДыщэкI Рустам, Кулюшинэ Наталье сымэ. ЕтIуанэ хъуащ Кулюшинэ Янэ. Домбеякъыр зыIэрагъэхьащ Бжьахъуэ ФатIимэ, Уэртэбей Дамир сымэ.
Гуп зэпеуэм КъБР-м и спортсменхэм япэ увыпIэр щаубыдащ, цIыхухъухэр етIуанэ хъуащ.
Алыдж-урым бэнэкIэ
Дунейпсо зэхьэзэхуэм зыхуагъэхьэзыр
Ярыгин Иван и фэеплъу Красноярск къалэм алыдж-урым бэнэкIэмкIэ щекIуэкIыну дунейпсо зэхьэзэхуэм хэтыну ди щIалэхэм а зэпеуэм зыхуагъэхьэзыр.
Ярыгиным и фэеплъ зэхьэзэхуэр щIышылэм и 24-м къыщыщIэдзауэ 28 пщIондэ екIуэкIынущ. КъБР-м и командэ къыхэхар а зэпеуэм хуэзыгъэхьэзырхэм ящыщщ алыдж-урым бэнэкIэмкIэ олимп джэгухэм тIэунейрэ, дуней псом щэнейрэ и чемпион, Европэм плIэнейрэ и чемпион хъуа Власов Роман.
Ди щIалэхэм япэ тхьэмахуэр хухахащ психологие, апхуэдэуи физическэ гъэсэныгъэм, иджы бэнэкIэм и Iэмалхэм зэрыхуэIэзэр алэрыбгъум къыщагъэлъагъуэ.
Зи гугъу тщIа зэхьэзэхуэм хэтынущ Жыласэ Рустам, Закуевхэ Анзоррэ Азэмэтрэ, Шаваев Малик, БищIо Тимур, Хатанов Идар, Шэру Иналбэч, Улымбащ Азрэт, Бэгъэтыр Руслан сымэ.
Регби
БлэкIар ягу къагъэкIыжу
Санкт-Петербург ныбжьыщIэхэм регбимкIэ я урысейпсо зэхьэзэхуэ щекIуэкIащ. Ар къызэрагъэпэщащ «Къамыщтэфа Ленинград» фIэщыгъэм щIэту, Ленинград къэухъуреихьыныгъэм къыщикIауэ щыта махуэми ирырагъэхьэлIащ.
А зэхьэзэхуэм хэтащ урысейм и щIыналъэхэм икIа командэ 28-рэ. КъБР-м и командэ къыхэхам а зэпеуэм ещанэ увыпIэр къыщихьащ. Финалым и Iыхьэ плIанэм ди спортсменхэм Къэзань щыщ гупыр 20:0-у щыхагъэщIащ. Финал ныкъуэм Енисейск щыщ гупым 25:5-уэ ди спортсменхэр къыхагъэщIащ, ауэ Санкт-Петербург щыщ «Застава» командэм 25-0-у текIуэри, ещанэ увыпIэр ди щIалэхэм яубыдащ.
Атлетикэ псынщIэ
Ласицкене и ехъулIэныгъэщIэ
«Лукашевичрэ Середкинрэ я мемориал» атлетикэ псынщIэмкIэ зэхьэзэхуэу Челябинск щекIуэкIам Ласицкене Марие текIуэныгъэ къыщихьащ. Ар дэлъеящ метр I,95-кIэ.
СССР-м спортымкIэ и мастер Лукашевич Юрэрэ Челябинск къалэм щIыхь зиIэ и цIыху Середкин Вячеславрэ я фэеплъу къызэрагъэпэщ зэхьэзэхуэр Челябинск иджы 4I-нэрэ щокIуэкI. Абы щызэпеуащ Олимп джэгухэм я чемпионхэр, дунейм, Европэм я чемпионхэр, апхуэдэуи, дунейпсо, урысейпсо зэхьэзэхуэм щытекIуахэр.
ММА
КИФЩI-м и зэхьэзэхуэм зыхуагъэхьэзыр
Налшык щекIуэкIащ КъБР-м ММА-мкIэ и чемпионат. Апхуэдэуи, зи гугъу тщIы зэзауэ спорт лIэужьыгъуэмкIэ къызэрагъэпэщат зи ныбжьыр илъэси 8 - 9, апхуэдэуи, 10 - 11-хэм итхэм я спарринг гъэсэныгъэр.
Кавказ Ищхъэрэ федеральнэ щIыналъэм и зэхьэзэхуэм хэтынухэр къыщыхаха чемпионатым спортсмен 200-м щIигъу кърихьэлIат. Ахэр я ныбжь елъытауэ гуэшауэ щытащ - илъэс 12 - 13, 14 - 15, 16 - 17, 18 - 20, 21-м щIигъухэр щхьэхуэу зэпеуащ.
Командэхэм къахьа очкохэр щызэпалъытым, «ФайтЗона» гупым япэ увыпIэр яубыдауэ къыщIэкIащ, «Гладиатор»-р (Налшык) етIуанэщ. «Баксаненок» (Бахъсэненкэ) ещанэщ.
Зэпеуэм щытекIуахэмрэ къыщыхэжаныкIахэмрэ саугъэтхэмрэ медалхэмрэ, фIыщIэ тхылъхэр иратащ.
Кавказ Ищхъэрэ федеральнэ щIыналъэм и зэхьэзэхуэр мазаем и 20 – 23-хэм Налшык къалэм щекIуэкIынущ. Абы хэтынущ илъэс 12 - 13, 14 – 15-хэм итхэр.
БэнэкIэ хуит
Ныбжьыщэхэм я ехъулIэныгъэ
СССР-м бэнэкIэ хуитымкIэ и мастер Бабухадие Теймураз и фэеплъу, щIыналъэхэм я зэхьэзэхуэ Черкесск къалэм щекIуэкIащ. Абы хэтащ ди къэралым и щIыналъэ 14-м икIа, 2010 - 2014 гъэхэм къалъхуа бэнакIуэ 320-рэ.
А зэхьэзэхуэм кIуащ КъБР-м и спортсмен 37-рэ. Зэпеуэм япэ увыпIэр щаубыдащ Уэзынджокъуэ Камран (кг 18), Таучэ Сэлим (кг 20), КIуэкIуэ Къантемыр (кг 22-рэ), Нот Iэмин (кг 23-рэ), Къарэмызэ Кемран (кг 26-рэ), ТIэхъуш Тимур (кг 29-рэ), ДыщэкI Ратмир (кг 30), БищIо Имран (кг 32-рэ), Балаев Алий (кг 41-рэ) сымэ.
Дыжьыныр къахьащ Мамышэ Самир (кг 23-рэ), ЦIыпIынэ Ренат (кг 32-рэ), Гулиев Мухьэмэд (кг 42-рэ) сымэ.
Бэлэтокъуэ Ислам (кг 22-рэ), Чочуев Мансур (кг 24-рэ), Джэршыш Тимур (кг 30), ГъуэплъащIэ Iэдэм (кг 30), Дыкъынэ Руслан (кг 30), Байчекуев Эльдар (кг 32-рэ), Уэтэр Айдэмыр (кг 35-рэ), Тэнащ Аслъэнбэч (кг 35-рэ), Жанатаев Исмэхьил (кг 50) сымэ домбеякъыр зыIэрагъэхьащ.
