Спорт хъыбархэр

Пятиборье

Челябинск домбеякъыр къыщахь

КъБР-м пятиборьемкIэ и командэ къыхэхар Челябинск щекIуэкIа урысейпсо зэхьэзэхуэм хэтащ. Абы кърихьэлIат Урысейм и щIыналъэхэм къикIа, илъэс 13 - 19-м ит спортсмен 400-м нэблагъэ.

Псым есынымкIэ псоми ефIэкIащ Кубаев Сабир. Абы очко 898-рэ къихьащ. Ауэ абы къэжыхьынымкIэ, нэщанэ еуэнымкIэ и Iуэху къызэримыкIам къыхэкIкIэ, домбеякъ къыхуагъэфэщащ.

Командэ зэхьэзэхуэхэми ди щIалэхэм домбеякъыр къыщахьащ, зы мащIэкIэщ увыпIэ нэхъыщхьэхэр къэзыхьахэу, Москва къалэм, Краснодар крайм щыщхэм къазэрыкIэрыхуар.

Спортсменхэр зэхьэзэхуэм хуигъэхьэзыращ Зенин Сергей.

БэнэкIэ хуит

Урысейпсо зэпеуэм хэтынущ

Грознэ къалэм щекIуэкIащ Кавказ Ищхъэрэ ЩIыналъэхэм щыщ спортсменхэм бэнэкIэ хуитымкIэ я зэхьэзэхуэ. Абы кърихьэлIащ Шэшэным, Дагъыстэным, Ингушым, КъБР-м, КъШР-м, Осетие Ищхъэр - Аланием, Ставрополь крайм къикIа, илъэс 18 иримыкъуа цIыху 350-м нэблагъэ.

Зэпеуэм хэтащ Къэбэрдей-Балъкъэрым и бэнакIуэ 44-рэ. Зэхьэзэхуэм дыжьын медаль къыщихьащ Шахмурзаев Тамерлан (кг 92-рэ). Домбеякъыр я Iэрылъхьэщ Хасаов Смаил (кг 65-рэ), Бит ТIэхьир (кг 71-рэ), Бит Тамерлан (кг 48-рэ) сымэ.

Зэхьэзэхуэм щытекIуахэмрэ къыщыхэжаныкIахэмрэ Iэмал ягъуэтащ мэлыжьыхьым и 2-7 махуэхэм Наро-Фоминск бэнэкIэ хуитымкIэ щекIуэкIыну урысейпсо зэпеуэм хэтыну.
 

Хъыбар гуапэ

ФIыщIэ тхылъ къыхуагъэфащэ

Физическэ щэнхабзэмрэ спортымрэ хэлъхьэныгъэшхуэ зэрыхуищIам, апхуэдэуи и лэжьыгъэ IэнатIэм хьэлэлу зэрыбгъэдэтым папщIэ, УФ-м бэнэкIэ хуитымкIэ и командэ къыхэхам и тренер нэхъыжь Тембот Андзор УФ-м и Федеральнэ Зэхуэсым ФедерацэмкIэ и Советым и тхьэмадэм къыбгъэдэкI фIыщIэ тхылъ къратащ.

Шахмэт

ЕджакIуэхэм я зэпеуэ

ШколакIуэхэм шахматымкIэ я урысейпсо гуп зэпеуэм щыщ Iыхьэу Налшык къыщызэрагъэпэщам и япэ къалэ зэхьэзэхуэр екIуэкIащ.

 «Ладья хужь-2023» зыфIаща зэхьэзэхуэм хэтащ 2009 гъэм къалъхуахэмрэ ныбжькIэ нэхъыщIэхэмрэ - псори зэхэту сабий 40-м нэблагъэ.

ШколакIуэхэр къыздикIа еджапIэ елъытауэ, гуп-гупурэ зэпрагъэуащ.

Зэпеуэм щытекIуащ 14-нэ гимназием и еджакIуэхэу Текуев Эмир, Токъуий Валерэ, Ахматовэ Iэминэ, Геккиевэ Софье сымэ.

ЕтIуанэ хъуахэщ 32-нэ школым и гъэсэнхэу Темрокъуэ Инал, Темрокъуэ Амир, Жамбей Артур, Джыназ Ритэ.

Ещанэр увыпIэр яубыдащ 27-нэ школым къикIа Гусейнов Ибрэхьим, Денисенкэ Артемий, Бэян Алджэрий, Щэрмэт Даянэ сымэ.

«Ладья хужь-2023» республикэпсо зэхьэзэхуэр Налшык щекIуэкIынущ гъатхэпэм икIэхэм.

Киокусинкай

ЛIымахуэ Сэлим и ехъулIэныгъэ

Москва щекIуэкIащ IFK киокусинкай XXXlll урысейпсо чемпионатымрэ ныбжьыщIэхэм я урысейпсо зэхьэзэхуэшхуэмрэ. Абы хэтащ илъэс 12 - 13, 14 - 15, илъэс 16 - 17 хъу щIалэхэмрэ хъыджэбзхэмрэ.

Зэхьэзэхуэм хэтащ щIыналъэ 45-м къикIа спортсмен 800-м нэблагъэ. КъБР-м и спортсмен 20 а зэпеуэм хэтащ. ИкIи зэхьэзэхуэм кърикIуахэм япкъ иткIэ, нэхъыщIэхэм я деж ЛIымахуэ Сэлим (кг 50) домбеякъ медалыр къыщихьащ.

Спортсменыр зэхьэзэхуэм хуигъэхьэзыращ Зэхъуэхъу Мурат.

МинитIым щIигъу щагъасэ

Олимп лIэужьыгъуэхэм хухэмыха спорт школыр КъБР-м къыщызэIуахауэ щытащ 2010 гъэм. Зи гугъу тщIы школым щыхурагъасэ Iэпщэрыбанэм, универсалънэ зэуэкIэм, кикбоксингым, каратэм, киокусинкайм, шахматым, тхэквондо ИТФ-м, ММА-м.

НобэкIэ зыгъэсапIэм къокIуалIэ КъБР-м и щIыналъэ псоми щыщ спортсмен мини 2-м щIигъу. Тренер 52-рэ щолажьэри, абыхэм яхэтщ щIыхь зиIэ тренерхэр, чемпиону щытахэр.

Мы еджапIэм и гъэсэн 33-рэ къедбжэкIа спорт лIэужьыгъуэхэмкIэ УФ-м и командэ къыхэхахэм хэтщ. 2022 гъэм къыщыщIэдзауэ ехъулIэныгъэхэри къагъэлъагъуэ.

Мы гъэсапIэм къыщIигъэкIа спортсмени 113-рэ дунейпсо зэхьэзэхуэхэм хэтащ, увыпIэ нэхъыщхьэхэри къыщахьащ. 47-р Дунейпсо, Европэ зэхьэзэхуэхэм, 1847-р урысейпсо зэпеуэхэм щытекIуащ, увыпIэ зэхуэмыдэхэри къыщахьащ.

Атлетикэ хьэлъэ

КъБР-м щыщ спортсменыр псоми ятокIуэ

 Москва щекIуэкIащ атлетикэ хьэлъэмкIэ урысейпсо зэхьэзэхуэ. «Гераклион и гъущI лигэ» зыфIаща зэпеуэм хэтащ Урысейм и щIыналъэхэм къикIа щIалэ, хъыджэбз 270-м нэблагъэ.

«ГъущI лигэр» дунейпсо зэхьэзэхуэщ. Апхуэдэ мыхьэнэ зиIэ нэгъуэщI къэралхэм щекIуэкIыркъым. Хьэлъэ къэIэтыныр фIыуэ зылъагъу атлетикэ ныбжьыщIэхэр, а спорт лIэужьыгъуэм хуэIэижьхэр я зэфIэкIым щоплъыж абы.

 Къэбэрдей-Балъкъэрым икIауэ спортсменищ а зэхьэзэхуэм хэтащ. Илъэс I4 зи ныбжь Зобов Денис абы япэ увыпIэр къыщихьащ. НыбжьыщIэр и гъэсэнщ тренер Хьэщпакъ Муса.

Алыдж-урым бэнэкIэ

Уэртэным и текIуэныгъэ

Телеграмм-каналым и «Wrestlers of KBR» сайтым къызэрыралъхьамкIэ, Самарэ къалэм и спорт уардэунэм щекIуэкIащ алыдж-урым бэнэкIэмкIэ урысейпсо зэхьэзэхуэ. Абы хэтащ зи ныбжьыр илъэс 18 иримыкъуахэр. Килограмм 55-рэ зи хьэлъагъхэм я деж финал ныкъуэм щыбанэу, ди республикэм щыщ Уэртэн Руслан и хьэрхуэрэгъу, Санкт-Петербург щыщ Сэлихь Айрат 7-1-уэ хигъэщIащ икIи дыщэ медалыр къихьащ.