«Динамо»-р ягъэлъапIэ

Мэлыжьыхьым и 18-м «Динамо» урысей-псо физкультурэ-спорт зэгу­хьэныгъэр илъэ­­сищэ зэрырикъум теу­хуауэ Iуэхугъуэ зэмылIэужьы­гъуэхэр къызэрагъэпэщ. «Ди­намо»-м и Къэбэрдей-Балъкъэр къудамэм  и унафэщIым и къуэдзэ Джэданэ Залым къызэ­рыджиIамкIэ, Урысейм абы егъэ­щIылIауэ щекIуэкIыну спорт зэхьэзэхуэ 13-м  хэтынущ ди лIыкIуэхэр.

Куэд мыщIэу мы махуэр Мэзкуу щагъэ­лъэпIэнущ. ГуфIэгъуэ зэхыхьэр ири­гъэ­кIуэ­кIы­нущ «Динамо» спорт зэгу­хьэ­ныгъэм и унафэщI Гулевс­кий Анатолий. Абы щыIэну ди спортсмен, тренер пажэхэм фэеплъ дамыгъэхэр, саугъэт лъапIэхэр, щытхъу тхылъхэр иратынущ.
«Ди дежкIэ мыхьэнэшхуэ зиIэ Iуэ­хугъуэщ ар. «Динамо» зэгухьэныгъэм и спортсмену Урысейм и командэ къыхэхахэм процент 70-р зэ­пымыууэ хэтщ. Хэкумрэ спортымрэ нэ­хъуеиншэу фIыуэ зэралъагъум ар и щыхьэту къызолъытэ», - жиIащ Джэданэ Залым.
Ди псэлъэгъум къызэрыдигъэщIамкIэ, хабзэ зэрыхъуам тету, «Динамо» обществэм хэтхэу, ди республикэм ­къи­­щынэмыщIауэ, Шэшэным, Къэрэшей-Шэрджэсым, Башкортостаным, Мэзкуу, Санкт-Петербург, Удмуртием, Вологдэ, Белоруссием, нэгъуэщIхэми я лIыкIуэхэр гупышхуэу Iуащхьэмахуэ дэкIынущ.