И кIуэцIыр нэщIрэ

         Пщы гуэрым кхъэлэгъунэ иригъэщIащ:

         «СылIэмэ сыщIэфлъхьэжынщ», - жери.

         - Кхъэлэгъунэ езгъэщIащи, къакIуи къызэхъуэхъу, - жери пщыр Жэбагъы еджащ.

         Жэбагъы къэкIуащ, мэрэмэжьей фалъэр иубыдри хъуэхъуащ:

         - И кIуэцIыр нэщIрэ и щIыфэр щIэращIэу тхьэм куэдрэ дигъэлъагъу мы кхъэлэгъунэр, - жери.

         Пщым къыгурыIуакъым абы къикIыр.

         - Сыт уи псалъэм къипхыр? – жери пщыр Жэбагъы еупщIащ.

         - Кхъэлэгъунэм и кIуэцIыр нэщIмэ, щIэх ущIалъхьэнукъым: уи гъащIэр кIыхь ухъу жыхуэсIэщ. И щIыфэр щIэращIэмэ, уи фэ ираплъынущ, - жери Жэбагъы ежьэжащ.

                                     Жэбагъы и хъуэхъу

         Зыпщ къуэ къыхуалъхуати, хьэщIэ къыхуепсыхауэ здэхъуахъуэм, Къэзанокъуэ Жэбагъы пщым и жылэмкIэ зэрыблэкIыр къыжраIащ.

         - Жэбагъы дгъэхъуэхъуэнщ, - жари хьэщIэщым ирашащ:

         - Пщым ехъуэхъу, Жэбагъы: къуэ къыхуалъхуащ.

         - Нобэ дунейм къытехьа щIалэр хьэнэу, джэдыпэу, фызыгуу, и цIэкIэ къемыджэу гъэпсэу! – жери хъуахъуэщ, шэсыжри и гъуэгу техьэжащ Жэбагъы.

         Гупыр егупсысри, Жэбагъы и хъуэхъур зэхащIыкIакъым.

         - Къыдохъуэхъу жытIэурэ къыдэхъуэнащ: фыкIуи къевгъэгъазэ, - жари Жэбагъы шу лърагъэжьащ. Гупым къахыхьэжри, хъуэхъум къригъэкIар къажриIащ Жэбагъы:

         - Хьэм и нэм нэхъ жан щыIэкъым, джэдым и пэм нэхъ шэрыуэ щыIэкъым, жьэгум щыдэсым деж фызым нэхърэ нэхъ гушхуэ щыIэкъым, нэхъыжь щхьэщытыху, щIалэм и цIэкIэ еджэркъым. Нобэ дунейм къытехьа щIалэм нэ жан, шэрыуэ, гушхуэ зыкIуэцIылъ ирехъу, и нэхъыжь куэдрэ къыщхьэщырет. Аращ сызэрехъуэхъур.

                                          Делэм сэ сыфIокI

         Жэбагъы и акъылрэ и псалъэкIэ цIэрыIуэ хъуауэ, зылI къыхуепсыхащ.

         - Жылэр къодаIуэ, уи псалъэм фIэмылIыкI срихьэлIакъым, - къыжриIащ лIым. – СыткIэ зэгурыбгъаIуэрэ жылэр, цIыхум дауэ уазэрыхэзагъэр?

         - Зыри хэлъкъым, жиIащ Жэбагъы. – Делэм сэ сыфIокI, губзыгъэр езыр къысфIокI.

                                      БлэкIам фыкIэлъымыджэ

         Шым уанэ трилъхьэри, нэху мыщ щIыкIэ дэшэсыкIащ Жэбагъы, гъуэгу кIыхь къыщIэлъти: Псыжь кIуэн хуейт, Iуэху къылъыкъуэкIауэ.

         Жэбагъы гъуэгу зэрытехьар зэхахри, шу гуп лъежьащ, щIыхьэри жраIащ:

         - ЩIэх къэбгъэзэнукъым. Къэбгъэзэху дызэрыпсэун псалъэ къыджеIэ.

         - БлэкIам фыкIэлъымыджэ, - къажриIащ Жэбагъы. – Нэхъыбэм къаублэр хабзэщи, абы феувалIэ.

Къэрмокъуэ Хьэмид зэхуихьэсыжа IуэрыIуатэм щыщщ.