Шабзауэхэр зэпеуащ

Налшык щекIуэкIащ Къэбэрдей-Балъкъэрым и шабзауэхэм я чемпионат зэIуха. Кавказ Ищхъэрэм и нэхъ спортсмен лъэрызехьэу 70 мыбы хэтащ. А псоми ятекIуащ ди республикэм и командэр.
Псом япэу къыхэгъэщыпхъэщ текIуэныгъэм хэлъхьэныгъэшхуэ зэрыхуащIар зи узыншагъэм сэкъат иIэ ди спортсменхэм. Дагъуэ зимыIэхэм зыкIи зыкъыкIэрамыгъэхуу зэхьэзэхуэм хэтащ ахэр. 
НэхъыщIэхэр зыхэта гупым метр 30-50-кIэ пэIэщIэу нэщанэ еуэнымкIэ Балъкъэр Дисанэ нэхъ шэрыуэ къахэкIакъым, КIыщ Ахьмэд ещанэ увыпIэр къихьащ. Апхуэдэу зыхэта гупым бжьыпэр щаубыдащ ди шабзауэхэу Кулишинэ Наталье (метр 70), Сасыкъ Тембулэт (метр 70).
Зыхэта зэпеуэ лIэужьыгъуэ щхьэхуэмкIэ етIуанэ увыпIэр къихьащ Стрельниковэ Аннэ, ещанэ хъуахэщ Уэртэбей Дамиррэ Щоджэн Салимэрэ.
Гупу щызэпеуам, ди цIыхухъухэми (ДыщэкI Рустам, Уэртэбей Дамир, Сасыкъ Тембулэт) цIыхубзхэми (Кулюшинэ Янэ, Щоджэн Салимэ, Стрельниковэ Аннэ) япэ увыпIэр къахьащ.
Къэбэрдей-Балъкъэрым СпортымкIэ и министерствэм хъыбар къызэрыдигъэщIамкIэ, бадзэуэгъуэм и 18-21-хэм Урысейм и чемпионат Владивосток щекIуэкIынум ди шабзауитI хэтынущ. Ахэр зи зэфIэкIыр ину къалъыта ДыщэкI Рустамрэ Кулюшинэ Янэрэщ.