Санкт-Петербург щекIуэкIащ Спорт лIэужьыгъуитху къызэщIэзыубыдэ Урысейпсо зэпеуэ. Абы етIуанэ увыпIэр къыщихьащ ди республикэм щыщ Iэпщэ Тембулэт.
Къалэм и спорт IуэхущIапIэ зыбжанэм спортсменхэр махуищкIэ щыщIэбэнащ Олимп чемпион Новиков Игорь и Кубокыр къэхьыным.
Спорт лIэужьыгъуиплIкIэ зэхьэзэхуахэм илъэс 19 нэхърэ мынэхъыжь щIалэгъуалэу 34-рэ хэтащ. Ахэр ди къэралым и щIыпIэ зэмылIэужьыгъуэу 12-м къикIат.
Псы есынымкIи, фехтованиемкIи, къэжэнымкIи, нэщанэ еуэнымкIи зэфIэкI хъарзынэхэр къигъэлъагъуэри, Iэпщэ Тембулэт дыжьын медалыр къихьащ. Мэскъал жыхуэпIэн хуэдизщ ар япэ увыпIэр къэзыхьа, Самарэ къикIа Попов Тимофей къызэрыпикIуэтар. Ещанэ увыпIэр Башкортостаным щыщ Ахмадиев Вячеслав иубыдащ.
Ди спортсменым и гъэсакIуэр Зенин Игорщ.
Ди бэнакIуэр щытокIуэ
Хабзэ дахэ хъуауэ, Дагъыстэным щрагъэкIуэкI бэнэкIэ хуитымкIэ тхуэнейрэ дунейпсо чемпион япэ дыдэу хъуауэ щыта Алиев Алий и щIыхькIэ зэхьэзэхуэ. 53-нэу Каспийск къалэм къыщызэрагъэпэща мы зэпеуэм къэрал 19-м къикIауэ спортсмен 280-рэ хэтащ.
Зэхьэзэхуэм и пщIэр зэрылъагэр, бэнакIуэхэмрэ ахэр къыздикIахэмрэ я бжыгъэр, зэпеуэр щекIуэкIа щIыналъэр зэрыцIэрыIуэр къэплъытэм, егъэлеяуэ узэрыгуфIэ хъунщ ди адыгэ щIалэ Шэрий Иналбэч япэ увыпIэ къызэрихьар. Килограмм 70 зи хьэлъагъ гупырт ар зыхэтари, япэу зэбэнаищым зэпеуэм хухаха зэманыр и кIэм нэмысу ар ятекIуащ. Ди спортсменыр псори зэхэту бэнакIуитхум япэщIэтати, гугъу демыхьу псори хигъэщIащ. Къыхэгъэщыпхъэщ кIэух текIуэныгъэр - къебэнар езы Дагъыстэным и спортсмен Нурахмаев Ахьмэдт. Ахэр икъукIэ зэрылъэщым дуней псор щыгъуазэщ.
Алыдж-урым бэнэкIэмкIи дыхуэмыхуакъым
Владимирскэ областым хыхьэ Суздаль къалэм Урысейм и ЛIыхъужь, генерал-лейтенант Кутузов Роман и щIыхькIэ щрагъэкIуэкIа зэхьэзэхуэм Къэбэрдей-Балъкъэрым и спортсменхэм медалу хы къыщахьащ. Мыбы хэтащ, ди къэралым нэмыщI, Белоруссием, Ираным, Къэзахъстаным, Азербайджаным, Къыргъызым, Молдавием къикIа спортсмени 140-рэ.
Ди гуапэ зэрыхъунщи, ди республикэм и бэнакIуэхэм медалу 6 къахьащ. Я хьэлъагъ елъытакIэ зыхэта гупым япэ увыпIэр щаубыдащ Локьяев Жамболэтрэ (килограмм 63-рэ) Гъуэныбэ Iэуесрэ (килограмм 82-рэ), етIуанэ хъуахэщ Желдашев Валерэрэ (килограмм 72-рэ) КIэмпIарэ Мэратрэ (килограмми 130-рэ). Ещанэ увыпIэр къахьащ Гъэужьей Адэмрэ (килограмм 67-рэ) Абазэ Тембулэтрэ (килограмм 87-рэ).
