БхартрихариБхартрихари (570-651) къызэрежьар пащтыхьущ. Индием нэхъ лъагэ дыдэу къыщалъытэ брахман лIакъуэм щыщ и адэр дунейм ехыжа нэужь, тепщэгъуэр къыIэрыхьэри, унафэр илъэс зыбжанэкIэ IэщIэлъауэ, Бхартрихари и лъагъуныгъэ насыпыншэр щхьэусыгъуэ хуэхъури, инд щихъхэм зэращIым ещхьу, мэзым щIыхьэжащ, уни жьэгуи къигъанэри. Зи пычыгъуэ къэтхь «Шатакатрая» усэ тхылъыр дунейм къыщытехьар а зэманырщ, зэрытхар санкскрит пасэрей бзэрщ. 1 Сыт тэмакъкIыхьхэм Iэщэ зэращIынур? Сыт тэмакъкIэщIхэм бий къыщIалъыхъуэр? Благъэ зиIэр блэм щремышынэ. ЩIэныгъэ лъагэм теIэбар мылъку хуэныкъуэж? ЩэныфIэм сыт дыщэхэкIкIэ зыщIигъэщIэращIэр? Зыгуэрым ухуэIэзэмэ, сыт къулыкъу зэрыпщIынур? 2 ЩэныфIэм акъылыншэу теIукIащ, цIыху зэтетым – къызыфIэщIыжауэ. ЦIыху пэжыр яфIэнэпсейщ, хахуэр яфIэгущIэгъуншэщ, хьэрэмыгъэншэм жыжьэ нэмысу хужаIэ, нэмысыфIэу псалъэр лIыгъэншэщ, жьакIуэр яфIэпсэлъэрейщ. КIэрымылъ гуэр зыкIэрамылъхьа цIыху нэгъэса щыIэу пIэрэ, мыхьэнэншэхэм ямыгъэпудауэ? 3 Зэм щIым ущыукIурийуэ ущыжеинкIи хъунщ, зэм – пIэ щабэм. Зэм бгъуэтIамэ къэбулъэпхъэщынщи, къэкIыгъэхэкIкIэ зыбгъэнщIынщ, зэми – ерыскъы хэплъыхьа къыпIухуэнщ. Дыгъуасэ щыгъын ныкъуэлажьэ пщыгъащ, нобэ зыкъыбохыпэ. ЩылIи щытхъи, гу зыкIуэцIылъыр къимыкIуэту и плъапIэм хуокIуэ. 4 ЩIэныгъэншэр арэзы пщIыну тыншщ жыпIэмэ, цIыху Iущыр арэзы пщIыну нэхъ тыншыжщ. Ауэ езы Тхьэшхуэми арэзы хуэхъунукъым хэт нэхъри нэхъыбэ ищIэу зыкъызыщыхъуж акъылыншэр. 5 Мыхьэнэншэр зыбгъэдэхун хуейщ, щIэныгъэкIэ гъэщIэрэщIами. ДыщэхэкI кIэрыщIа щхьэкIэ, блэм ущышынэн къанэрэ? 6 Щымыр бзагуэ къафIэщIынущ, жьакIуэр зи жьэ зэщIэмыхьэ псэлъэрейуэ, гъунэгъуу щытыр нэмысыншэу, IукIуэтар - гу зыкIуэцIымылъу, тэмакъкIыхьыр – шынэкъэрабгъэу, тэмакъкIэщIыр – къызыхэкIар мыщIагъуэу. ЩэныфIагъым и щэхур бзыщIащ, псори зыщIэ цIыхушхуэхэми ящIэркъым ар. ЗэзыдзэкIар ЧЭРИМ Марианнэщ.
Поделиться:
Читать также:
02.05.2024 - 14:17 →
Дунейхэм я щIэплъыпIэм
02.05.2024 - 12:34 →
Насыпыр сыт зэлъытар?
27.04.2024 - 19:53 →
Хъыджэбз мэкъуауэ
27.04.2024 - 11:18 →
Hapт Ермыдэ иныжьхэр зэриукIар
26.04.2024 - 17:20 →
Абазэ таурыхъхэр
|