Спорт бэнэкIэхэр

Урысейм и  Кубокым щIэбэну

Уфа къалэм щекIуэкIащ Урысейм и кубокыр алыдж-урым бэнэкIэмкIэ къэхьыным хуэунэтIа щхьэзакъуэ, гуп зэхьэзэхуэхэр. Зэпеуэм кърихьэлIат къэралым и щIыналъэ зэхуэмыдэхэм къикIа спортсмени 190-рэ. Ахэр щIэбэнащ Башкортостаным и Iэтащхьэм и саугъэтми.

         Гупхэм я зэхьэзэхуэм Къэбэрдей-Балъкъэрым етIуанэ увыпIэр къихьащ, Новосибирск областым и спортсменхэр япэ иригъэщри.

         Щхьэзакъуэ зэпеуэхэм, я хьэлъагъ елъытауэ зыхэта гупхэм, япэ увыпIэр къыщахьащ КIэмпIарэ Маратрэ (кг 130-рэ) ГуIэжьей Iэдэмрэ (кг 67-рэ). ЕтIуанэ хъуащ Жолдащ Валерэ (кг 72-рэ), ещанэщ Щад Уэсмэнрэ (кг 130-рэ) Аслъэн Алихъанрэ (кг 55-рэ).

Спортыр террорым и бийщ

         «Спортыр террорым и бийщ» къыхуеджэныгъэм щIэту Налшык къалэм и «Налшык» спорткомплексым иджыблагъэ щекIуэкIащ кёкусинкаймкIэ КъБР-м пашэныгъэр къыщыхьыным хуэунэтIауэ ныбжьыщIэхэмрэ щIалэгъуалэмрэ я зэхьэзэхуэ. Абы хэтащ республикэм и щIыналъэхэм щыщхэр, Къэрэшей-Шэрджэсым къикIа хьэщIэхэр - псори зэхэту спортсмен 200-м нэблагъэ.

         Зэхьэзэхуэм къыщыхэжаныкIахэр Къэбэрдей-Балъкъэрым и командэ къыхэхам хагъэхьащ, Кавказ Ищхъэрэм хыхьэ щIыналъэхэм я зэпеуэу Дон Iус Ростов къалэм щэкIуэгъуэм и кIэхэм щекIуэкIынум хагъэтыну.

         КъБР-м КёкусинкаимкIэ и федерацэм фIыщIэ хуищIащ республикэм СпортымкIэ и министерствэм, зэхьэзэхуэр егъэкIуэкIынымкIэ къызэрыдэIэпыкъуам папщIэ.

         «Спортыр террорым и бийщ» зэхьэзэхуэр ирагъэкIуэкI «КъБР-м терроризмэмрэ экстремизмэмрэ щымыгъэIэн» къэрал программ ипкъ иткIэ.

                                                                 ХЬЭЩЫКЪУЕЙ Олег.